[المتفائلة]

السلام عليكم ورحمة الله وبركاته :
جزاك الله خير الجزاء أختي ليدي ع قبولك استضفاتي ف طفولة عضو .
بسم الله نبدأ

ما هي اكثر وافضل لعبة كنت تلعبها و أنت صغيير؟؟؟
بحكم كنت البنت الصغيره بين خواتي وبنت عمي فغالبا كنت أحب اللعب مع الاولاد لان بنات الحي مادري وش فيهن ثقيلات ماعندهن سالفه , لذلك كنت احب لعبة طب جبل ماشاء الله علي كنت بارعه في القفزبرجل وحده ودايم اذا لعبنا دايم فريقنا يفوز الحمدلله ..احم احم

نشيد كنت تحبه أيامم الطفوله ؟؟ شخصيه كرتونيه كنت تحبها ؟؟
كنت احب نشيد الله رب الخلق .. امدنابالرزق خذيته ف اول ابتدائي وللحين اتذكره .
والشخصيه الكرتونيه اللي احبها كثيره بس ف المقدمه (( هايدي بلا منازع وسنان وفلونه ولوسي ولاانسى كابتن ماجد ماعني ماحب الكره كيف تجي مادري ..خخخخخخخخخخخخخخخ

كيف كنت ايام طفولتك شيطاني ولامؤدب ؟؟
كنت مؤدبه بس لابد من الحركات اللي من تحت لتحت .

ماهو الموقف اللي عرضت فيها اهلك للاحراج؟؟
كنت مره راكبه السياره مع ولد عمي يكشخ فيني حركات لاوالله عشان اذا فحط اوسوا حركات بالسياره اكون شاهده , المهم واحنابالسياره ماقصر سرعه وتفحيط فجأه مادري ؤوش صار اتذكر ارتطم راسي بزجاج السياره وصارت ورمه وش كبرها وصرت اصيح وهو يسكت فيني المهم لما جينا البيت ولد عمي عمي قال لي اذا سألوك قول طحنا في حفره وماشفناها والا ماتروحين مع ولا مكان جا عمي وابوي وسألوني فقلت نفس الكلام بس ماصدقوا ابوي انحرج كثير وحرمني من الطلعه عشان اعترف بس ماكو انا وعدت ومااخلفت بس انقهرت من الحرمان ايام وش حلوها .

هل كنت شخص ذو شخصيه قويه أم مغلوب عليه ؟؟
لا والله مغلوب عليها خصوصا بين الاولاد اذا سوا شئ حطوه فيني , بس مع كذا كنت حب العب معهم القط دايم يحب خناقه ..الله يخلف علي ..

موقف حصل في طفولتك كان له دور في تغيير مجرى حياتك؟؟
يمكن فيه يمكن لا.. الله اعلم .. ماتذكر .. الكبر شين ..

اكبر عيديه جمعته كم ؟؟ ومن مين ؟؟
حوالي 20ريال جمعتها من ابوي وعمي الله يطول ف عمرهم وعم ابوي صالح الله يرحمه وولده , صدق قليله لكن كانت تسوس شئ كثير, وخصوصا اذا كانت خرده ..

يوم كنتي صغيره تسوين جدايل والا كاريه ؟؟
طبعا جدايل وش حلاتها والشعر طويل ماشاء الله مواللحين قصات وصبغات الله يخلف علينا بالخير قولوا آمين ..

يوم كنتي طفله تلعبين بكمبيوتر العائله ؟؟
كنت العب بس مو كثيرواتذكر لعبة الاتاري ..

يوم كنتي طفله تلبسين مريول المدرسه وشباصات ميكي ماوس وشرايط بيض ؟؟
اكيد مريول لونه رصاصي وشباصات اشكال والوان وشرايط لونها أزرق ..

من كـان يدلعك أكثر أبوك ِ او أمك ؟
طبعا الاثنين بس ابوي كان يستانس مني وانا ف المدرسه لاني كنت ممتازه والحمدلله ودايم كان ابوي وعمي يقارنوني بالاولاد لانهم كسالا الله يخلف عليهم وهم عاد بعدين مايقصرون فيني الله يسامحهم ..

اســم دلعك بالطفوله لحد الان ينادونك فيـه ؟؟ وماهو ؟؟
طبعاً.................... بس حلو واكيد اذا قلته راح تعرفون اسمي خلونا ع المتفائله أحسن لنا ..

لحقت تتابعين سبيستون ؟ ولا القناه الاولي بالصبح والعصريه كم افلام كرتون بالدش ؟؟
اتذكر بباي والنمر الوردي في القناه الاولى مره الصبح ومره العصريه ..

بطفولتك كنت / ي تبكي إذا ماجلستي بالاول بالطابور اوالفصل ؟؟
لا بالعكس اغلب شئ اكون ف الطابور والصف الاول طبعا لحكم قصري وانا ف ابتدائي ..

عندك لعبه موجوده من صغرك إلى الآلآن ؟ وماهي ؟؟
كان عندي مهفه عن الحراره مطبقه ع بعضها فيها رسومات حلوه تذكرونها بس اللحين للامانه مادري وينها منقهره ..يمكن بالدولاب القديم ..

وش اكـثـر حلاوة كنـت تحـبهاا ..؟ايش اسم اول مـدرس/ ـه درستك ..؟
كنت احب حلاوة طابوق وحلاوة بيضاء اللون شكل اعواد تشبه السيجاره وكانت هشه مرررره وحلاوه قرطاسهاطويل داخلها حلويات دائرية الشكل ولها الوان وطعمها حلو وحامض كنا نحطها ع الدفاية ف الشتا عشان تكون هشه بس حسافه انقطعت واتذكر شربت بالفواكه وفيه مزاز علبته شفافه ..
اسم المرسه : ابلا حصه

هـل كـنت تـعانـي مـن اخـطاء فـي مخـارج الحـروف ..؟
حرف الخاء انطقه حاء بس بسرعه تجاوزت المشكله لاني كنت اتدرب .. حركات

ما هو اجمل موقف او اجمل ذكرى تتذكرها من طفولتك ؟
مره لما كنت ف صف رابع رحنا جبل قاره بصحبة ابوي ومعه خويه وكنت لابسه نعال الله يعزكم خش وكان ف ذاك الوقت موضه لونه اسود وفيه حديده المهم دخلنا ومشينا وابوي ومع خويه يتقدمونا ف المشي وفجأه صقعت رجلي الظاهر بحصاه اوشئ من كذا وطارت وحده من النعال الله يخلف علي رجلي ضعيفه تفشل .خخخخخخخخخخ .. وبعدين اصقعت النعال تتوقعون من ؟؟ خوي ابوي ومسك النعال ومعصب يبي يعرف من حاذفها وانا دورني ماتلقوني ابي نعالي بس كيف والباقي ضحك مو طبيعي بعدين قلت انها لي وعطاني اياها وهويقول انتيهي مره ثانيه ..

ما هو أصعب أو أحزن موقف مر عليك في طفولتك ؟
لماكنت ف صف ثاني طلبت من ابوي عبايه وشرى لي وكنت مستانسه فيها لكن ف صف سادس قالو لازم تتغطين وزعلت وكرهت العبايه والغطا بعدين خلاص عرفت ان العبايه عباده وليس عاده وانها ستر وحشمه لنا .. الله يستر علينا .. اللهم آمين ..

ما هي أجمل هدية تلقيتها في طفولتك ولم تنساها لليوم ؟
خاتم ذهب من امي عشان رضيت ادخل المدرسه لان ولد عمي كان يخوفني منها .. الله يسامحه

هل هناك انسان معين كرهته في طفولتك .. ولماذا ؟
مو كره بس منقهره منها ف صف اول ابتدائي كانت تجلس وراي طالبه هذره كثير وهي اكبر منا لانها كانت ترسب المهم الابلا تحسب انا وانا اقولها مو انا المهم خذت الابلا الطبشور ورمته ع وجهي وكانت فيني الصيحه بس كتمتها .. وسبحان الله للحين هذه الابلا موجوده وتدرس بنت اختي وبنت اختي ماشاء الله عليها تعرف كيف تاخذ حقها .. جيل ذا الزمن ..

كلنا انضربـنا اكيد... ولكن ما هي اصعب مرة انضربت فيها ؟؟ ولا زالت محفورة في ذاكرتك وسبب الضـرب وش كان؟
كنا جالسين ف حوش البيت طبعا بحكم بيتنا سابقا واحد بس مقسوم بينا وبين عمي وفيها باب من داخل دخل عمي علينا وهو معصب ويلحق ولده اصعرمتي وتخبا تحتنا وعمي ماسك العسو بالعكس بيضرب ولده جات الضربه ف يدي وعمي اذا عصب مايشوف الله يهديه ورفضت الروح المستشفى مع عمي فوداني ابوي للمجبر الله يرحمه وقال انها مو كسر شديد بسيطه ان شاء الله واتذكر لفها بتيب لونه بيج ..

هل كنت غيور بطفولتك من اخوانك وتحس فيه تمييز بينك وبينه؟
لا والله ماحس بالغيره كانو هم اللي يغيرون مني خصوصا الاولاد وكنت حمالة الاسيه بحكم اني الوسطى بين اخواني ..

هل ستربي اولادك بنفس الطريقة التي تربيت بها في طفولتك؟
تلحقون خير ان شاء الله مع ان هذا الوقت يبي له الله يعين واحنا ان شاء الله قد المسؤوليه واللي عان اهلنا ع تربيتا يعينا والمهم لاننسى قيمنا وتعاليم ديننا الصحيحه ..

اوصف طفولتك بجملة واحدة ؟
طفوله ممتعه بكل معنى الكلمه .. لانفاق لاكره .. بريئه .. حلوه وناسه ..شقاوه بس ع خفيف ..

وف الختام اتمنى ان اكون ضيف خفيف عليكم وجزاك الله الجنّه اختي ليدي انك رجعتيتا للذكريات الحلوه وصدقيني وانا اكتب كنت مستمتعه جداً وانا اتذكر ايام الطفوله .. ودمتم بود ..