[ميزان عدل]

المشاركة الأصلية كتبت بواسطة مملكة الاحساس

خاطري اعرف ليه كل شيء يصير بالعيون دايم يتلقى نقد هدام وان كان فيه ناس تنتقد نقد بناء إلا انه لايخلو من التشكيك في بعض الامور

اغلب المشاركات تركزت على نقد الاشخاص فقط وعلى الوجهاء ووين تروح ال 200 ريال
طيب الوجهاء هم ونيتهم وهم وضمائرهم وما اكتبه ليس دفاع عنهم ولاضدهم انا ماعرفهم أصلا علشان أسخر قلمي لمدحهم او ذمهم
اما بالنسبه للفلوس الي هي 200 ريال تعالوا حسبوها بالعقل والتفاهم
وتعالوا ننظر نظرة أيجابيه لهذا المشروع ومنو المستفيد الحقيقي للمشروع طبعا
طبعا المستفيد هو الطفل وأولياء الأمور مو معقوله يدفعون فلوس في شيء غير مفيد لأطفالهم اكيد سألين عن خطة هالمشروع ومدى أستفادة الطلبه منه
خلونا نغض النظر عن موضوع المشروع واسمه أحلى الهدايا ونتخيل ان مافيه هدايا
تعالوا نشوف وش استفاد الطفل من هالمشروع
اولا راح يكون الطفل في أيدي أمينه تعلمهم شيء يستفيدون منه في امور الدين والدنيا
احد أبناء أسرتي مشترك في هالبرنامج واليوم تم القاء بعض الكلمات عليهم في كيفية امور الوضوء والصلاة وتم توزيع ملفات واوراق مسابقات راح يتم تسلميها يوم السبت القادم إن شاء الله
كما تم توزيع أستبيان لتعزيز الطفل وتشجيعه للمحافظه على الصلاة
وطبعا هذا الاستبيان يجاوب عليه الاب او الام او احد افراد العائله ومن ضمن الاسئلة الي شفتها
_ هل حافظ الطفل على الوضوء الصحيح هذا الاسبوع_هل حافظ الطفل على الصلاة جماعة في المسجد_..............الخ من الاسئله الي تساعد في تعزيز نفسية الطفل ولاتنسون حفظكم الله:
أن هالمشروع تم فيه اختيار الاطفال الي يدرسون من الصف الرابع والخامس والسادس اطفال محتاجين لتهذيب انفسهم وغرس الدين اكثر في حياتهم
واعمارهم غالبا من 9 الى 12 سنه اعمار قريبه من سن المراهقة او هي في بداية سن المراهقة واطفالنابحاجه ماسه جدا لمن يهتم فيهم بهذا الوقت
طيب الي عرفته ان المشروع راح تكون مدته 3 أسابيع من يوم السبت الى الثلاثاء وكل ثلاثاء راح يودونهم رحله لأماكن يستفيدون منها مثل سايتك وغيرها
وراح كل يوم يقدمون لهم برامج منوعه ووجبات.
حنا ليه ماننظر للجانب الأيجابي في هالموضوع
الطفل مانبسط ولا أستانس في هالوقت الي جلس فيه بهالمركز او بهالمشروع؟؟؟
المفروض النقد يجي بعد المشروع وبعد أنتهاء المدة
وتشوفون المشروع هل نجح ولافشل انا ماعتقد انه راح يفشل بس في نفس الوقت اي مشروع في بداية أمره لازم يكون فيه بعض من النقصان
الي لو ربي أراد راح يتفادونها في الصيف القادم إن شاء الله
هم زين منهم فكروا من اجل شيء ينفع الاطفال بدل ماأطفالنا جالسين 24 ساعه على الاجهزة الي دمرت اعيونهم
مشاريع حركيه مثل هذه المشاريع الي تقام في بلدنا انا اعتبرها خطوة جميله لمصلحة أطفالنا
وأن كان الهم هو 200 ريال الي يدفعونها وين تروح.................؟؟؟؟؟ الطفل الحين ما أكل وشرب ولعب وامبسط وراح رحلات وجاء؟؟؟طيب وش بقى من 200ريال
خلوني اقولكم شغله الحين انا لما ابغي اودي طفلين من اهلي العثيم علشان العبهم هناك كم راح ادفع؟؟؟؟
الالعااب والوجبه كم بتكلفني في يوم واحد اقلها 300 ريال او 400 ريال تقريبا والطفل دامك جبته لمكان ترفيهي جايبه يمبسط مو جايه تحرمه من لعبه
يعني من فيكم يقدر يودي طفل لمدينة ترفيهيه ويقوله هذه العبه لاتلعبهاوهذه العبه العبها علشان الرخص والغلاء حنا جبنا اطفالنا نبسطهم مو نحرمهم
وماعتقد ان فيه احد يدخل مدينه ترفيهيه ويطلع منها باكله وشربه ولعبه وهداياه حق اطفاله بـــــــ100ريال بس؟؟؟؟ باليوم الواحد
يعني علينا ان نقارن 200 ريال في 3 اسابيع بــــــ 300 ريال في يوم واحد
ولاحد يقول الحين منو يقدر على 200 ريال الكل حاليا يقدر حتى الايتام والفقراء حفظهم الله يقدرون الضمان الاجتماعي الحمدلله مراعي هالفئة بشكل كبير
بعض الناس موضروري نلقى هالنعمه في بيوتهم وعلى اثاثهم او على الشكل الخارجي للبيت لا اغلب الناس تصرف الفلوس على اكلهم وشربهم ونفسهم
يعني كثير من اطفال الاسره المحتاجه في العيون نلقى معلقين في رقبتهم بلاك بيري ولا جلكسي ولاغيره من الايباد وربي يرزقهم من واسع فضله آمين يعني ما اتوقع فيه احد معدم في العيون إلا من رحم ربي
وعلى ماسمعت ان اليوم كثير من اولياء الامور راحوا يسجلون اطفالهم بهالمشروع لكن الي يسجلون ارفضوا او بمعنى اصح العدد مايتحمل اكثر من 80 طفل لتسجيل؟؟؟
يعني لو كان هدف القائمين على المشروع مادي كان خذوا الفلوس ولاهمهم عدد الاطفال الي يدخلون ومدى أستفادتهم والتركيز لصالحهم ومنفعتهم؟؟؟
وعلشان ما اخرج من صلب الموضوع
خاطري أسأل ياساده ياكرام وسؤالي للجميع اتمنى انكم تجاوبون عليه
من منكم عنده أستعداد كامل لمدة اسبوع كامل لتحمل اطفال العيون كلهم انه يسوي لهم برنامج كامل يلعبهم ويأكلهم من جيبه ويوديهم رحله ترفيهيه ويسلمهم باخر يوم هدايا على حسابه ؟؟؟
ياليت نتحول من النقد الهدام الى النقد البناء الخالص لوجه الله
والي وده يستفسر يروح لمقر المشروع ويتقابل مع الاشخاص الي فكروا في هالمشروع وياخذ منهم معلومات مفيده ويجي يسجلها هنا عندنا في هالملتقى الطيب
دامكم قدرتوا على النقد اكيد انكم قادرين على أفادتنا عن هالمشروع بصورة جميله مشرفه لأبناء العيون
أما ان كل مشروع بيجي بننظر له من الجانب السيء ولا ننظر للجانب المشرق وكل ناس نكسر مجاديفهم اعتقد ماراح تقام اي مشاريع في العيون؟؟؟

المفروض الناقد الوحيد لهذا المشروع ولي لازم يؤخذ برأيه هو الأطفال المشاركين في هالمركز ونسألهم بعد أنتهاء المركز
هل أستفادوا من هذالمشروع ولالا؟؟؟
في الختام ارجع واكرر سؤالي الي قبل
احد فيكم قادر يتحمل مسؤلية اطفالنا لمدة اسبوع كامل في لعبهم وشربهم وهداياهم ورحلاتهم على حسابه؟؟؟؟؟
اتمنى نبني بلدنا بالنقد الرائع المفيد الخالص لوجه الله سبحانه وتعالى
ولاننسى قول الشاعر:

تعمدني بنصحك في انفرادي *** وجنبني النصيحة في الجماعة

فإن النصح بين ايه لناس نوع *** من التوبيخ لا أرضى استماعه

وبارك ربي في الجميع

المبلغ مبالغ فيه ..وفيه فرق بين المبلغ الجماعي والمبلغ الذي يدفعه ولي أمر لأبناءه في رحلة ترفيهية !!

والدفاع في غير محله .
والمشكلة ليست في البرنامج بل في تدخل التنمية الأسرية التي حاشره نفسها في كل شي .


ما بقي موقع ما أستعرضوا فيه إنجازاتهم الوهمية .. الإصلاح بين الناس يتم في سرية .. والذي يجب أن يمسك منصب التنمية الأسرية
شخص ملم بالنواحي النفسية وكبير سن وعنده دورات من مراكز معتمدة , وشهادة في هذا التخصص . مش واسطة وحب خشوم وترز ز عند فلان وفلان
ما أستفدنا من الكبير حتى نستفيد من الصغير .. على التنمية الأسرية السلام ..وعليه العوض ومنه العوض .