لحظة الفرقا

[الفضلي]

لحـظـة الفـرقا صعيـبه ياجمـاعـه مـرجـفـه = لحظة(ن) فيها الحبيب يصيح منهو يسعفه

كـل أصنـاف العــذاب وكـل أصنـاف الألم = ذاقـها واصبـح يولول والمصـايـب تـعصفه

كـل آمال(ن) بنوها صارت بـحكم السراب = حـلـمـهـم غـالي عليــهم والليــالي تـخـطفه

صـارت الأنــوار دايـم عنـدهم شبه الظلام = مـن حقـايـق فاجـأتـهـم آه منـــها مــؤسـفه

يـاقـلـم وصّف لقـاهم كيف لحظات الجنون = مـن عـقـب طـول القطاعه والحياة المقرفـه

العنـاق اللي بـعـد فـرقـا ونـظرات العيــون = والرعاش الزايد وشوق الوله من يـعرفـه

والجـحيم المصطـلي بالصدر ودموع الفرح = والعـرق ليـمن تـصبـب والبـروده تـرجفـه

كيف نوصف لحظة(ن)يصعب بها نطق الكلام = أفـصـح العـالم يتـمتـم في كـلامه تخلفه

الفـرح مـن زود مـابــه وصّلــه حـد الـسـما = طـايـر (ن) فـوق السحـايب دون أيّـة تكلفه

يامـحبـة لـمـلمـيـنـا واضـوي الأكـوان نـور = واجـعليـنا في نعيم(ن) صعب نقدر نوصفه