أخوي الكبير مع البنغالي ضدي

[أبو طلال]

هذا ياجماعة الخير
عقب صلاة التراويح جاء البنغالي اللي يغسل سيارات إخواني

إخواني يعطونه بالشهر وأنا عيا لايغسل إلا بقيمة التغسيلة الوحدة
10 ريال سعودي فقط لاغير

أنا ضغطت عليه كثير وقلت له ماني معطيك إلا خمسة ريال
وقلت له تحمد ربك أني عطيتك شي لأن إخواني كلهم زباين لك
والمفروض أني ما أعطيك شي وأحسبها لي زي ماتبي
هدية مجانية صدقة رمضانية أي شي أهم شي أني ما أدفع
مع هذا عطيتك خمسة ريال ،،، ريال ينطح ريال

أنا أتكلم وأهرج وأقول وهو ساكت
قلت في نفسي اكيد أقتنع
مديت له الخمسة وأخذها وهو يضحك
ياسلام ضحك يعني راضي يعني الغسيل بيكون بإخلاص

دخلت البيت وتقهويت في المجلس
أخوي الكبير أسمع صوته يضحك
وهذا إذا ضحك أي شي قدامة يتكسر
لأنه يخبط بإيده على أي شي
الباب ، الطاولة ، جدار ، عياله ، سيارة أي شي
وصوت الضحكة تعرف منه إن كان الحدث قوي أو لا
وهذا الصوت يسمعونه اللي في برشلونه

طلعنا له نبي نعرف وش السالفة
ماقدر يتكلم بس قام يأشر
وصبعه متجه نحو سيارتي
رحنا عندها نلقي نظرة عابرة
كل اللي معاي إخواني وربعهم وربع أبوي والحارة اللي ظهرت على صوت ضحكة الأخ
أقول كلهم قاموا يضحكون إلا أنا
ضحكوا ضحك خفت عليهم وربي منه

والسبب أن البنغالي حسبي الله عليه
وعشاني عطيته خمس ريالات وهي نصف القيمة اللي طلبها
قام غسل نص السيارة بس
من النص عند مابين الباب الأمامي والخلفي إلى مقدمة السيارة والنص الخلفي ماغسله

تعال ليه ماغسلت الباقي
قال بالعربي المكسر
أنت يجيب نص فلوس أنا يغسل نص سيارة
أنت يجيب فلوس كامل أنا يغسل كامل

كل الموجودين سكتوا من الضحك
إلا الأخ الأكبر والأمثل
باقي ماسك الشجرة اللي قدام البيت وهاتك ياضحك

والمصيبة أنه عطى البنغالي 15 ريال عشان مايكمل الغسيل ويخليها كذا

القاها من هالبنغالي وإلا من هالأخو هذا اللي مدري وش يبي