رسالة من واتساب

[الفضلي]

رسالة من واتساب
أنا وتــسـاب ياللي تـدهلون النت سمعـوني = أنا بـرنـامـجٍ فيني رسالات اجتـمـاعيّـه

أنا باشـرح لكم حـالي ألا ياللي تعـذلـوني = أنـا مالي عـقـل واعـمالـكم فيني خيـاليـّه

أنا للخير اوصّل كان لاجل الخير تبغوني = واوصّـل شـرّكم كـلّه والافـلام الاباحيّـه

بـذور الشر منكم والبـلا وانتــوا بـليتـوني = تحبّــون الفتـن واعــمالكم فيـها عدائـيّـه

أنا مـتـصدّرٍ كـل البـرامج حـقّ شـوفـوني = صباحٍ والظهر والليل في وقت المسائيّه

أنا رمز التواصل بس ما ابغاكم تعبـدوني = حويت الشعر واخبـار وتعابير ارتجاليّه

أبي وقت القيادة لي مسكتوا الخط تنسوني = تروح ارواحـكم باهمال مافيها احتماليّه

عسى ماتـبصرون الشـر بعيشتكم تهنّـوني = تعيـشون الهنا ياذا البشر بالعمر حـاليـّه

وترجع لـمـة العيــله ومن بالخير يثـنـوني = ألا يـازيـنــها لـمّـه تـغطّـيـها الجـماليـّه
شعر /عبداللطيف سعد أحمد العلي الفضلي
حررت في يوم الأحد الموافق 11/3/1435هـ