زوجوني من فتاة قبيحة.. قصة روعة (بالبحريني)

[مخاوي الليل]

السلام عليكم

يقول احد الأشخاص:

كنت في يوم من الايام .. قاعد في الغرفة بروحي لا لي ولا علي .. قاعد اسمع مسجل ..من الملل ويش اسوي( الشكوى لله ) كانو اهلي مسافرين .. وما في البيت إلا انا والوالد .. والوالد منشغل في تجارته الكبيرة ... منشغل في محل الخضرة اللي فاتحنه في اخر اشارع ... والمشكلة ان ما فيه احد يشتري ...يجي اخر الاسبوع ويوزع البضاعة على الجيران .. والجيران ياكلون والمستشفيات تستقبل حالات تسمم من فريقنا بالهبل ... تصدقون ان فريقنا محد بقى فيها إلا إحنا بس .. إللي مات ضحية تسمم .. وإللي تحوّل من الفريق عباله فيها مرض وبائي يعدم الناس .. ؟ المهم

كنت قاعد اسمع المسجل ما شفت إلا هذيك الرجفه إللي جت في باب الغرفة وانفتح .. من قوة الرجفة ... الباب تكلم قال ( آي الضربة تعور ) .. دخل علي الوالد وهو متضايق .. كأنه شايل هموم الدنيا كلها على راسه.. قعد صوبي وقالي . يا ولدي انا في مشكلة .. وابيك اتطلعني منها .. انت آخر أمل لي .. صراحه انا يوم شفت الوالد يقول جذي على طول طفيت المسجل .. وقلت للوالد خير .. قالي ابيك يا ولدي تضحي عشاني .. خلص الوالد كلامه على طول انا وقفت وضربت صدري وقلت .. ان شاء الله ابوي من عيوووني .. طالعني وقالي اقعد واسمعني زين لا احط حرتي فيك .

طالعني ابوي بنظرة .. حسيت انه يطالع قرد في حديقة حيوان بعده مافتحوها .. طالعني وقالي .. انت فاهم غلط يا ولدي .. انا ... انا ... انا ابيك تتزوج ... يوم قال جذي قلت في نفسي شكله الوالد ... اكل من محل الخضرة ماله .. وهذي اول علامات التسمم .. المهم قلت للوالد ابويي انا ما فهمت شي ... تأفف وقالي كلمه ما راح انساها بالمرة . قالي من وين جايب الغباء ... الظاهر ماخذنه من واحد من ربعك ما اذكر انا غبي وإلا امك .. انا يوم قام يزف قلت ابويي ادخل في الموضوع .. ويش تبي تقولي .. طالعني وقالي :
اسمع يا ولدي .. انا تسلفت من ريال .. كريه .. كريه حده .. لو تشوف شكله كأنه قير عادي .. الريال هذا الحين يطالبني بالدين اللي عليي وانت تعرف يا ولدي ان ما عندي بيزات .. فلما قلت له ما اقدر الحين.. قالي ....

يتبع...

في أمان الله