[أبو طلال]

هذا واحد يكون ولد عم صاحب لي
صاحبي ونعم الرجل ، إنسان ماشاء الله عليه

عنده ولد عم عجيب ، ما أقدر أصنفه من أي الأشخاص هو

بيجي الإسبوع الجاي لولد عمه ، وولد عمه إتصل علي وقال لازم أقابله

بقول لكم عن أول لقاء بيني وبين ولد عمه الفلته الخطير


كنا جالسين عند صاحبي في بيته
طلبنا بيتزا وجاتنا البيتزا وأكلنا البيتزا
وصاحبي خلى بيتزا وسط على جنب وقال هذه حق ولد عمي اللي جالس عندي من إسبوع وهو في الدوام وعلى جية قريب
جاء ولد عمه وسلم علينا ودخل يغير ملابسه وقال له أن عشاه في المطبخ
جالسين في الصالة ونسمع هذا في المطبخ يقربع في الصحون
قال له صاحبي وش تسوي ؟
قال له أسخن البيتزا
مارد عليه بس قال كلام سمعناه ومافهمنا مقصوده
قال : الله يستر
إحنا مانعرف ولد عمه
بس قال الله يستر يعني هو عارف أنه فيه شي بيصير
قعدنا نسولف ونهذر ونضحك
إلا وجاء الأخ هذا ومعاه صينية عليها صحن وفيه البيتزا
جلس الرجال وصاحبي يطالع فيه ويقول نفس كلمته السابقة
الله يستر
احنا سكتنا وقعدنا نطالع
الرجال بدأ ياكل
مد يده وأخذ من البيتزا ورفعها عشان ياكل
فيه شي غريب الصراحة
البيتزا تنقط وشكلها مبلول ماي
قعدنا نطالع لصاحبنا اللي عرف أن إحنا نبي نعرف
سأل ولد عمه هاه سخنت البيتزا
قال إيه وهذا هي حارة
قال له كيف سخنتها ؟
قال له بسيطه ، جبت قدر وحطيت فيه ماي ولما سخن حطيت البيتزا فيه لين سخنت شلتها وحطيتها في صحن وهذا هي وش زينها

تخيلوا كم كانت صدمتنا وفترة سكوت غير طويلة لأننا قمنا نضحك لين دمعنا

هذا أول لقاء وتوالت اللقاءات التي تتسم بالتنسيم المنسم تنسيما عظيما


مرة رحنا نشرب قهوة فرنسية في محل داخل مجمع تجاري
طلبنا القهوة وأنا وصاحبي والأخ معانا أنا وصاحبي نشرب بدون سكر
والسكر بالعادة يكون على الطاولة بأكياس طولية داخل علبة مخصصة
سولفنا وشربنا قهوتنا وقمنا نبي نروح
مرينا على طاولة فيها شباب توهم يحطون سكر في قهوتهم
سألنا الأخ وقال وش اللي يحطون
قلنا سكر
قال ليه ماعندنا سكر زيهم
قلنا موجود على الطاولة
قال والله ورجع يركض للطاولة
وفيها شباب جلسوا
أخذ العلبة وفكها ولقى السكر
قام يفتح أكياس السكر ويكت في فمه
يبلع كيس ورى كيس والناس تناظر
شافهم يطالعون فيه
قال ترى دفعنا حق القهوة وشربناها بدون سكر وهذا حقنا تبوني أخليه لهم
ياللي مخليه والله وهاتك بلع وأنا وصاحبي تلطمنا وعالدرج ركض


أتصل علي صاحبي مرة وقال لي تعال نروح الشرطة
شفيه وش صاير
قال أتصلوا علي عشان ولد عمي مسوي شي
الأخ وش مسوي ؟
هو ساكن في مجمع غرف حق عزاب
كل غرفه لها حمامها
هههههههههههههههههههههههههه
إشتهى دجاج مشوي
وجهز الدجاج وبهره وملحه
شرى حطب وشبه داخل غرفته
والدخنة عجت بالعمارة هههههههههههههههه
بلغوا المطافي وجاوا
الرجال متلطم وقاعد يشوي داخل غرفته


وغيرها من السوالف لو تبون بقولها لكم بس الحين وش الراي أروح أقابله وإلا أطنش
لأني لو رحت بأبلش فيه وفي سوالفه اللي مدري شقايلة