[مملكة الاحساس]

بسم الله الرحمن الرحيم


السلام عليكم ورحمة الله وبركاتة

سؤال يستفز الكثير من الناس لما أحد يسالهم

وش اسم امك؟

هل فعلا اسم الام عيب؟؟؟
او اسم الزوجة؟؟؟ او الاخت؟؟أو البنت؟

كلامي مو موجه للرجال لا بل وللنساء
لان بعض النساء يستفزهن هذا السؤال ايضا
اذا احد سالهن في الاماكن العامة

يمكن احد منكم يقول هذا السؤال قديم
وماله داعي نتناقش فيه
طيب تعالوا معي لنهاية الحوار وبعدها قرروا اذا كان هالسؤال يستاهل المناقشة ولالا.

أذا نظرنا له ان هالشي مشكلة دينية

ابدا هذه ليست مشكلة دينية

واذا اردت الدليل لا اجد دليل وقدوة اكثر من الحبيب محمد صلى الله عليه وسلم
حنا نعرف ان أمنة بنت وهب هي ام الرسول الكريم
ومرضعتة حليمة السعدية
واحد زوجاتة خديجة
ولديه اربع من البنات كلهن قد ذكر اسمائهن
زينب ورقية وام كلثوم وفاطمة
والرسول صلى الله عليه وسلم امتدح زوجته خديجة
وكذالك ذكر اسم ابنتة في حادثة المراة المخزومية التي سرقت
فقال: (وايم الله ! لو أن فاطمة بنت محمدسرقت لقطعت يدها ....الخ الحديث)
لماذا لم يتحرج الرسول الكريم من ذكر اسم ابنته عند مجلس الرجال
ولونظرنا لسور القران الكريم لوجدنا سورة كاملة تسمى بأسم أمرأة (مريم)
إذا هي ليست مشكلة دينية
طيب ممكن نقول أنها مشكلة اجتماعية متوارثة؟
ايضا لا لو رجعنا لزمن الجاهلية والإسلام لوجدنا أن صخراً كان يعتز لكونه اخاً للخنساء.
ولوجينا لقبل زمنا بشوي كان العرب ينتخون ويفتخرون باسم اخواتهم
امثال الملك عبدالعزيز يسمى بــــــــــــــ أخونورة
كذالك ال صباح ينتخون باسم اختهم مريم.
يعني هذه الظاهرة دخيلة علينا؟
لاتقولون هذه الظاهره مو موجوده عندنا بالعيون الا موجوده
كانت تقول لي احد الاخوات لما انخطبت وملكت جا عندها اخوها يقول لها ان عنده صديق له متزوج . صديقه هذا يوم عرف ان عنده اخت مخطوبه قاله تدري لو ادري ان عندك اخت ماتزوجت كان خطبتها؟؟؟؟؟؟؟ قبل لا اتزوج؟ هذا خووية الي يقول؟؟؟؟ مو واحد من بعيد.
ليت هالامر توقف عند الكبار لا الامر وصل للتمهيدي.
طفل بالروضة راح مره مع ابوه بمجلس شباب هالشباب حبوا يغيضونه قالوا له :وش اسم أبلتك؟ الولد من حبه لأبلته ماعلم باسمها؟ بس تدرون وش سوى عطاهم اسم غير اسمهاعلشان مايعلم باسمها الحقيقي؟
! ذكي هالولد
والي شاهد المقطع يشوف ان كبار السن
ابدا ماعندهم مشكلة انهم يقولون اسم امهاتهم
المشكلة بالشباب يحسون انه عيب يقولون اسم امهم
مع انهم مادروا ان العيب هو الي يحسبونه عيب.

وكثير من الامهات والزوجات تهمشت شخصياتهن لان ازواجهن لايفتخرون بهن.
وكثير بنات جلسن في البيوت لان مافي احد يدري عنهن اصلا انهن موجودات.
بل ان البعض من الرجال ينادي زوجته وام عياله ياولد ولا ياهيه؟؟ او يابنت او.......؟؟؟؟

هذه مو مبالغه هذه ظاهرة حاصلة

تقول احداهن في احد التحقيقات بجريدة الرياض

لم اسمع اسمى

تشاركنا فاطمة سعد برأيها قائلة: أنا متزوجة منذ خمس سنوات لم أسمع اسمي يتردد على لسان زوجي إلا ثلاث أو أربع مرات غمرتني الفرحة حينها، لأبعد الحدود لأنه مازال يتذكر اسمي الذي ظننت بأنه نساه مع كثرة ندائه لي، بمفردة ياهيه فهي كلمة جافة تشعرني بالإحباط عند سماعها وعدم استجابتي له بسرعة عند مناداتي بها خاصة إذا كنا بمفردنا وأكثر ما يرددها أمام أسرته وأهلي، أو إذا كان لدينا عدد من الضيوف من الأقارب والذين يعرفون اسمي ومع هذا يحرج من مناداتي به، وأذكر أنه في أحد المناسبات نادى علي لتحضير مستلزمات، الضيافة للرجال بقوله "ياهيه" بصوت مرتفع سمعته عدد من الضيفات المتواجدات وبدأن في الضحك على ذلك الأسلوب المجحف في حقي، وفي الحال رددت عليه وبصوت مرتفع أنتظر قليلا "ياهوه" فشعر بمدى الإحراج الذي شعرت به.
وترى ان سبب تكرار تلك الكلمات كبرياؤه وعدم مبالاته بمشاعرها بالرغم من كل اعتراضاتها ومطالبتها بان يناديها باسمها أو بكنيتها "أم فارس"

من القيم والعلاجات النفسية ان ذكر اسم الشخص وتكراره سبب في كثير لعلاج المرض النفسي لانه يؤدي الى شعور الشخص المريض باهتمام من حوله به

خلوني اعطيكم مثال بسيط جدا في حياتنا اليومية

لما توقف عند محطة بنزين وتنادي عامل بـــــــــــ يا محمد
راح تلاحظ تغير وجهه بس لاحظ لما تسأله عن اسمه وتناديه به على طول راح تلاقية ابتسم وامبسط
حتى المرأة لماتنادي شغالتها ياهيه او انتِ ماراح تستجيب لها كثر ماتستجيب لماتناديها باسمها؟
فهؤلا اغراب عنا ويسعدون بهذا الشي فكيف من هم اهلنا وارحامنا؟


الكثير يسمي امه اخته زوجته بنته عمته خالته.... الخ الاهل
وكم تضيع حقوق ناس بهالكلمة
اكيد هي عز وفخر
لكن ماتنفع في بعض المواقف

مثال

وياليت تعطوني رايكم يابنات الملتقى

طلب منك اخوك المتزوج تصلحين له بعض الاطباق لانك فنانه بالطبخ
علشان عنده عزومه للشباب
وقمتي من الظهر لين العشاءوصلحتي له 13 طبق او 5 اطباق او حتى نوع واحد
وفي وقت العزيمه سأل احد الشباب من وين شريت هالحلا
قال اخوك لا والله مو شاريه الاهل مسويينه؟
اي اهل امك اختك زوجتك بنتك؟؟؟؟
هو على طول بيفتكر زوجتك
ويضيع حق اختك
انتي وش رايك يالاخت بتنقهرين ولا عادي؟
طيب هل فيها شي لو قال الرز مسويته امي مريم ربي يحفظها
والحلا اختي نورة مصلحته
وزوجتي حصة هي الي صلحت ورق العنب
هل نقص من عمرك شي يوم قلت هالشي؟
طيب ممكن سؤال هالرجال مو تطفل لا يمكن قصده يبحث عن زوجه طباخه وحب يسألك لانه ناوي يناسبك
حتى اختك لو احرصت على مدحك لها مافيها شي لعل الله ان يسوق على يديك رجل صالح تقي نقي يخطبها
وحب المدح مو عيب
ويكفيني عزا وفخر ان اتي من كلام الله مثلا فالله عز وجل يحب ان يُحمد
ولله المثل الاعلى


-برايكم ماهو السبب؟
-هل هو تهميش للمراة؟
-هل هو فهم الدين الخاطىء بقوله ان المرأة كلها عورة؟
فاصبحت كالضمير المستتر؟
بينما في استطاعتها ان تكون ضمير مخاطبا ؟
وكذالك ضمير متكلما؟
-ام هو حرص الرجل على المراةوخوفه عليها؟
-هل هوهضم لحق الام التي انجبت وربت وافتخرت بولدها؟
-الايحق لها ان يفخرهو بها كما تفخر هي به؟
-هل هذه الظاهرة عادة تعودنا عليها؟
-ام هي موضه وقلدناها؟
-البعض من النساء والرجال يخافون ذكر اسما امهاتهم
- خوفا من السحر؟ هل انتَ/انتِ من هذه الفئة؟

والسؤال المهم الذي نبحث له عن أجابه بهذه المناقشة،
- من المسئول عن تأصيل تلك المفردات في حياتنا اليومية هل هي التربية؟
ام التقليد الاعمى؟



اخر سؤال : وش اسم امك؟
امزح؟لاتصارخون

اعتذر على الإطالة
قد اكون تشعبت كثير في موضوعي لكن هو يتكلم بالنهاية عن موضوع واحد

اتمنى ان الموضوع توجد بها مشاركات مع اني اظن ان المشاهدات راح تكون من نصيب هذا الموضوع
وحتى لو لم تكن هناك مشاركات يكفيني فخر اطلاعكم ومشاهدتكم للموضوع واخذكم فكره عنه
دمتم بعافية