من الصباح
عليك اسأل
كل عابر
كل راجع أو مسافر
وين راح ؟
وافترش حزن الطريق
فيني هم وفيني ضيق
أحاول اني أخدعه
وابتسم ما أوجعه
تنبت بروحي سنابل .. من حنين
يكبر بدمي غيابك
وقيح دمعي ألف عين
تخلط الملح ابجِراح
من الصباح
وآنا أسأل
وينك انت .. آنا ويني ؟
صرت أدورني عليك
أحتويك وتحتويني
صرت أنت في حياتي
سر واضح
ذنب فاضح
بس مُباح
تصدق
البارحه شفت جدران البيوت
تنعى موتك ألف موت
غمضت عيني
لمحت طيفك في رموشي يحتريني
بغرفتك لما نطير
أجنحه والروح سور
والسكون .. ال حوالينا يكون
يصير دهشه
واحنا نطلقها صياح
بغرفتي
كنا ندفن .. كل هموم الوقت ما نعرف جراح
نرسم الشباك مركب
وانتخيل .. سقفنا يمطر سحاب
والبحر .. الله ما أعمق بحرنا .. قصدي حبنا
لما كنا نرسمه في كل باب
والشواطي .. كنا نرسمها جدار
نركض ونرتاح بيها
لما يغلبنا دوار
ياااااااااااه ..
أمقته صوت الغبار
عاصفه تصرخ بصمتي
تقول: راح .. إيه راح
اهتز جرحي
كأني ريشه واقفه وسط الرياح
لا تقول إنك نسيت العاصفه
أوه قصدي العاطفه
لما كنا نمتطيها
ندور بيها
ندور بيها
ندور بيها
تدور بينا
ولو سمعنا أي صوت
نقول: إحنا ويش علينا
ما يهم .. قافلة حبنا تسير
ويش عليها من النباح
كنت اسافر في عيونك
وكنت آنا
كل محطاتك جنونك
ولما تبعد
كنت مع طيفك أخونك
كانت الدنيا صغييييييييييره
لكن احنا .. كنا نرسمها براح
يوووووووووه .. من الصباح
لا .. تصدق؟
صار لي كم يوم اسأل
كل عابر
كل راجع أو مسافر
وين راح؟ وين راح ؟
يغص بي صمتي واحس
توني هاللحظه أحس
إنه في غيابك جنوني
لما شفتك في عيوني
صوت تابوت وكفن
لما وجه امك توارى
خلف هالات الحزن
توني هاللحظه أقرر
مات يمكن ؟
ولا إنه .. انطفى نور الصباح