أذكر الخلاّق في مبدا السطور = أحمدالله والتجي له واشكره
واحد(ن) معبود تواب(ن) غفور= ماحد(ن) غيره وسيع المغفره
أكتب القيفان في كل البحور = أكتبه منظوم واحيان انثره
خبرة الأيام مدت لي جسور = من إله الكون جتني مقدره
أشعر الشعّار من شعري غيور= في زمان(ن) كل شعره ثرثره
ماعدا بعض النجوم اتشع نور = بس نور الشعر عندي يجهره
في أصول الشعر ضارب له جذور = مرهف الاحساس سحره يسحره
من يقول الشعر عندي به كسور = فكره المعدوم طبعأ يكسره
أتفكر في زمان(ن) به فجور = كل شي(ن) في زمنا مسخره
سيطر اهل الحقد واصحاب الشرور = صار للانسان أكبر مجزره
بالقلوب الحاقده مات الشعور = مابقى شي(ن) أبد تستشعره
العبوا فيهاالحمايم والصقور = دولة(ن) عظمى تحب الشوشره
ماحد(ن) عنده من احساس(ن) يثور= كل منهم نايم(ن) في مجحره
والشباب اللي طلع في ذا العصور = مالبس شي(ن) لجسمه يستره
بنطلونه يشحن الأنفس نفور = نازلن شبرين من تحت اظهره
دايمن يمشي دلع كله سرور = يمشط ابشعره ويمسك منظره
كنّه ابنيّه لها عمر الزهور = الاسم رجال والمنظر مره
والنسا صارت تبادر بالسفور = تلبس الموضه تحب الفشخره
عن أصول الدين دايم في دبور = تتبع اهل الغرب تمشي بختره
الشعر مفتول من فوق النحور = والصدر مكشوف للي ينظره
تدهل الأسواق فيها اقوى عطور = كل من شم العطر مد ابصره
ماتذكّرنا أبد يوم النشور = يوم نبعث من تراب المقبره
للحشر سرنا حفا مثل الطبور = عاريين(ن) موقفن يامااكبره
والسراط اللي صعيب(ن) بالعبور = طالبين الله يومه نعبره
كان بالجنه مع ابنيات حور = والاّ في نار(ن) سعيره تسعره
ذي قصيده فجّرت قلب الصبور = فاق غيظ الزير ويّا عنتره
باجعل القيفان للفاسق ثبور = في كتابتها وازمجر زمجره
ماكتبت الشعر في قافي فخور = ما أحب الزود ويّا المفخره
قلتها غضبان بالصوت الجهور = والعن الشيطان فيها وادحره
لاتقولون الرجل عنده غرور = معذره والمعذره والمعذره