[عَذْبَھْہّ]

... الأمومة .. الوظيفة الأصعب في الدنيا . والأحلى بنفس الوقت . دايماً يقولون ، الزواج نقطة تحول في حياة الأنثى ، بس أنا أشوف إنه الإنجاب هو نقطة التحول الكبرى .. لأنك بعد ماكنتي روح في جسد ، صرتي روح في جسدين .. من غير ما أطول عليكم.. خلونا نشوف الـ outline للموضوع : 1/ التعامل مع حديث الولادة 2/ صحة الطفل : أ – تغذيته : - الرضاعة. - الطعام ( 4 شهور – 12 شهر ) ب – التطعيمات : - جدول التطعيمات - تعليمات بخصوص التطعيم ج – المشاكل الصحية: - إرتفاع الحرارة 3/ نمو الطفل : أ – النمو العقلي و الحركي ب – ظهور الأسنان : - وقت ظهور الأسنان - أعراض التسنين وعلاجها 4/ مصادر ثقافية : أ – كتب للأم والطفل ب – مواقع مفيدة. . .

نبدأ بسم الله .. نوستالجيا في الموضوع السابق تكلمت عن كتاب " The Happiest Baby on the Block" وإختصرت لنا الكتاب بنقاط مرة مهمة لكيفية التعامل مع الرضيع لما يبكي .. -الكتاب تكلم عن الفترة الرابعة الناقصة ، فـ مراحل الحمل هي الـ 3 شهور الأولى ، الـ 3 شهور الثانية ، والـ 3 شهور الثالثة ، وإعتبري أول 3 شهور من عمر الطقل هي الـ 3 شهور الرابعة ، لأن الطفل محتاج وقت عشان يستوعب العالم الي حوله والي مختلف تماماً عن رحم الأم . -رحم الأم كان دافي ، وملموم ، وصوت الرحم كان عالي ، حتى أعلى من صوت المكنسة الكهربائية ، عشان كذا الهدوء الشديد يزعج الطفل .. -لما ينزعج الطفل عندك 5 خطوات تسوينها : 1/المهاد : وهذا أهم شي ، لأن الطفل يتحرك لا إرادياً ، وحركة يدينه ورجلينه تزعجه ، إضافة لأن المهاد يخليه يحس بنفس الإحساس الي كان يحسه في بطن أمه . وهذي الصورة توضح طريقة لف الطفل بالمهاد . 2/ وضعيه الجنب أو البطن: بعد ما تلفينه مضبوط ، إمسكيه على جنبه أو على بطنه ، وتكون يدينك وحده تحت راسه ووحده فوقه .. الطريقة هذي حلو بعد لو الطفل عنده مغص ، تخفف عنه الألم كثير . 3/ الهز: إذا كان يبكي مرة ، هزي يدك الي تحت راسه بحركة خفيفة بس سريعة ، عشان يحس كأنه في بطنك. 4/ هششش: قربي فمك من إذنه وقولي (هششششش) ، هذا الصوت كان يسمعه حوالي 9 شهور !! ولما يسمعه بيحس بالأمان .. حتى صوت المكنسة ممكن يهديه – لو ضاقت بك الحيل شغلي المكنسة – ويهدأ . 5/ التلهية: بعدها أعطي الطفل مصاصته أو رضعيه ، وبكذا تكون إنتهت المشكلة إن شاء الله . ... شكراً نوستالجيا ..

[FONT=DecoType Naskh Variants][SIZE=5][FONT=DecoType Naskh Variants]

[SIZE=5] أ – تغذيته : الرضاعة الطبيعية : الرضاعة الطبيعية هي الأفضل ، لأنها ببساطة طبيعية وفيها جميع إحتياجات الطفل ، وتغني حتى عن الماء .. فيه موضوع نزلته الحلوة "وجد" ، تكلمت عن الرضاعة الطبيعية بإسهاب ، الموضوع متكامل ما شاء الله ، وممكن ترجعون له للفائدة . ["]http://vb.eqla3.com/showthread.php?t=494379"][ لا تحرمي نفسك! لاتحرمي طفلك! B r e a s t f e e d i n g[/URL] http://vb.eqla3.com/showthread.php?t=494379"] [/URL] الرضاعة الصناعية : -مرات الأم تضطر للرضاعة الصناعية لأسباب كثيرة ، لكن فيه إمكانية إنها توازن بين الطبيعي والصناعي ، وبكذا ما تحرم طفلها . -إستخدمي الرضاعات الزجاجية لما يكون الطفل صغير وما يقدر يرميها أو يكسرها، الرضاعة الزجاجية تستحمل الحرارة ، لأنك راح تسوين الرضعة بموية دافية . -مثل ما ذكرنا ، الرضعة لازم تكون دافية ، خصوصاً للطفل أقل من 6 شهور ، عشان تتفادين المغص . -إحرصي على نظافة الماء المستخدم ، وعقمي الرضاعة من فترة لفترة ، بواسطة غليها وتجفيفها . -إسألي الطبيب عن أنسب نوع حليب لطفلك ، ولا تغيرين الحليب بشكل مفاجيء ، لأن تغيير نوع الحليب يتعب بعض الأطفال . -لو بقى من الرضعة شي لا تخلينه وقت طويل ، ساعة بالكثير وتخلصي منه ، وخصوصاً المواليد ، لأن معدة الطفل حساسة . -حاولي تعطين الطفل رضعة التمر من فترة لفترة ، وهي عبارة عن تمر منقوع بماء حار ومهروس ، تشخلينه زين وتعطينه الطفل ، كويسه لو الطفل عنده إمساك ، بس مشكلتها تسبب مغص أحياناً .. إطعام الطفل ( 4 شهور – 18 شهر ) -ممكن تبدين بإعطاء الطفل طعام من عمر 4 شهور ، مع إنه بعض الأطباء ما ينصحون بإطعام الطفل قبل 6 شهور. -إبتعدي قد ما تقدرين عن أي شي فيه مواد حافظة ، حتى لو كان مخصص لأطفال ، وإعتمدي على الأكل الطازج . -(4 شهور) أعطي الطفل فواكه مثل التفاح المهروس والموز والبرتقال ، والخضار مثل الكوسه والبطاطس والقرع والجزر ، طبعاً الخضار تكون مسلوقة بمويه بدون ملح ، لأنه ممكن يضر الطفل ، وإهرسيها زين وأعطيها طفلك . -الرز المصري المهروس ومهلبية الأطفال من الأغذية الي تناسب الطفل بهالعمر . -حاولي تعطين طفلك بالبداية كل نوع لحال، عشان لو كان عنده حساسية من شي يبين معك ، بعدها ممكن تخلطين له أكثر من نوع يكون ألذ له . -راح يتعبك الطفل بالبداية لأنه ما راح يتقبل الطعم ولا راح يتقبل الملعقة ، حاولي تعطينه بيدك وجيبي له ملعقة بلاستيك مخصصة للرضع لأنها ألين له ومناسبة لحجم فمه ، مثل هذي -بعد الأكل إسقيه شوي مويه ، بالفنجال أو الملقعة أو حطي له مويه بالرضعة . -(6 شهور) ممكن تدخلين البيض المسلوق لغذاء الطفل ، وخصوصاً الصفار . -الشوفان ، أعملي له شوربة خضار أو عدس ، وتقدرين تعطينه فول . -سيريلاك ، خوذي النوع المناسب لعمره ، فيه أنواع حلوة بالتمر أو العسل . -الزبادي ، فيه أطباء يعتقدون إنه الطفل أقل من سنة ما يستحمل الزبادي لأنه يحتوي على بكتيريا ، لكن إذا كان الطفل تعود على الأكل فطبيعي إن معدته بتكون أقوى تحمل ، وكل أم أعرف بالي يناسب طفلها . -الخبز والشاهي ( وجبة أطفال سعودية ) يمكن ما فيها فايدة تذكر ، لكن ميزتها تشبع ، ممكن تخلينها وجبة ما قبل النوم ، وصدقيني بتنامين زي الأوادم ليلتها . -(8 شهور) هنا ممكن يبدأ الطفل بتناول اللحوم البيضاء ، الدجاج والسمك ، والسمك بالذات مفيد جداً للطفل، فتتيه زين وأعطيه لطفلك . -(12 شهر) بهالسن الطفل ممكن ياكل معكم من أكل البيت عادي ، المهم تكون بهاراته خفيفة ، والقطع صغيرة عشان ما يغص، وحلو تعطينه لحوم حمراء ، لأنها غنية بالحديد والبروتين. -إنتبهي من الماجي !! إذا عندك أطفال تحت السنتين ياكلون معكم ، حاولي ما تستخدمينه أبداً بالطبخ ، لأنه ضار جداً لعقل الطفل ، ويسبب عدوانية الأطفال ، هالكلام سمعته في برنامج التفاح الأخضر، طبعاً فيه أشياء ثانية تحتوي على نفس مكونات الماجي ، مثل الإندومي والشوربة سريعة التحضير.

ب- التطعيمات: جدول التطعيمات : ( من موقع وزارة الصحة ) تعليمات بخصوص التطعيم: -الطبيب راح يكشف على الطفل قبل التطعيم ، علشان يتأكد إذا وضعه يناسب للتطعيم الحين وإلا لا . -يؤجل التطعيم إذا كان عند الطفل إرتفاع في درجة الحرارة أو إسهال أو إستفراغ . -لا تعطي طفلك رضعة قبل التطعيم بنص ساعة ولا بعد التطعيم بنص ساعة ، خصوصاً تطعيمة شلل الأطفال – هالمعلومة قالها لي دكتور أطفال . -وعموماً إذا كانت التطعيمة عن طريق الفم تجنبي الرضاعة، عشان ما يتقيأ الطفل وتضطرين تعيدين التطعيمة . -بعد التطعيم كمدي مكان الإبرة بكمادة باردة في أول يوم ، وفي اليوم الي بعده كمادات دافية. -إنتبهي لحرارة الطفل خلال الثلاث أيام التالية للتطعيم ، وضروري تعطينه خافض حرارة كل 8 ساعات أو على حسب الي يوصفه الطبيب . ج – المشاكل الصحية : المشاكل الصحية الي ممكن يتعرض لها الطفل كثيرة ، منها الإختناق – التشنج – الوقوع من مكان عال – التسمم بالأدوية أو المنظفات .... إلخ. وهذي المشاكل ممكن الأم تبحث عنها وتثقف نفسها .. لكن المشكلة الصحية الي بتكلم عنها هنا ، هي الأهم ، والي لازم يمر فيها كل طفل ، مهما كانت صحته ممتازة . إرتفاع الحرارة : -ترتفع حرارة الجسم إذا كان فيه شي دخيل عليه ، سواء فايروس ، ميكروب ، أو غيرهم .. -أكثر أسباب إرتفاع الحرارة عند الطفل دون السنتين هو التطعيم والتسنين . -إذا لاحظتي راس الطفل حار ، قيسي حرارته ، إذا كانت : 37,5 فهو إن شاء الله طبيعي لكن إحتمال ترتفع أكثر 38 تعتبر مرتفعة وإبدأي أعطيه خافظ وكمديه بكمادات باردة شوي. 39 مرتفعة جداً لو ما نفع الخافض والتكميد ، روشي الطفل بموية فاترة. 40 خطيرة ، ولازم تاخذينه للمستشفى -أجهزة قياس الحرارة تختلف في إعطاء الدرجة الصحيحة على حسب مكان القياس : القياس من تحت الذراع > زيدي على الناتج نص درجة القياس من الشرج > نقصي نص درجة القياس من تحت اللسان > يعطي الدرجة مضبوطة -الكمادة أفضل شي تستخدمين قماش قطن . -إنتبهي تروشين الطفل بموية باردة ، ممكن يسبب له تشنج لا سمح الله ، حتى الحوض أو البانيو الي بتحطينه فيه لا يكون بارد ، لأن الجسم يكون حار ويتفاجأ بالبرودة . -بالنسبة للطفل الي عمره 9 شهور فأكبر – إذا كانت حرارته عالية – فـ التحاميل أفضل له من الشراب ،وأسرع نتيجة ، بس أهم شي تتأكدين إنها تناسب عمره . -فيه ناس تستخدم الخل لخفض الحرارة ، لبسي الطفل شرابات مبللة بالخل ، وراح تساعد على خفض الحرارة بإذن الله . -وفيه لصقات تنباع بالصيدليات تتلصق على جبهة الطفل وعشان تخفض حرارته . -نقطة أخيرة ، عند إصابة الطفل بأي عارض صحي لا تنسين الرقية الشرعية ، على الأقل إقرأي سورة الفاتحة 7 مرات وإنفثي على طفلك – سورة الفاتحة تسمى الشافية .