وأنتي اللي كل مايبسـت لهاتـي
في زمانـي وابتلانـي وابتليتـه
وانقفل باب الرجـاء والمقبـلات
مابقى إلا انتي على الدنيا وجيته
ياصلاتـي ريحينـي ياصـلاتـي
همي اللي في ضلوعي ماقويتـه
وأغسلي مع دمعة العين وسكاتي
ماعرفـت وماتركـت وماكنيتـه
آدمي (ن)ٍ والخطايا بعض ذاتـي
ذنـبٍ ادريبـه وذنـبٍ مادريتـه
والسنين آمالها تخلـف وصاتـي
ماكتبته بالصـراط ومـا قريتـه
وإن ذكرت اللي حداني عن مباتي
عز ملكه والعظيم اللـي خشيتـه
كن تحتي جمر وتقض عبراتـي
من حيا وإليا دريت إني عصيتـه
لين أكبر وأستغيثه عـن ثباتـي
بين بسم الله وراسـي لا حنيتـه
يا صلاتـي كـل حـي للمماتـي
والكفن ما يستره والقبـر بيتـه
ليتك آخر من عرفته في وفاتـي
لاأرتخـت سبابتـي ممـا لقيتـه
والحياة أمست رسوم الذارياتـي
وانهدم في الفانية صـرح بنيتـه
ياصلاتـي واذكرينـي ياصلاتـي
لانساني بالبكاء مـن لا نسيتـه