[كلمة حق]

أواه ، ، يـا ذات الدسـر واللـوايـح
اللي من (الطوفان) نجا بهـا (نـوح)
أحـس دمـي داخـل الصـدر فايـح
وأحسنـي بالشعـر يلزمنـي البـوح
من وين أنا جيت؟ وعلى وين رايـح؟
ما أدري أنا من وين ؟ ولوين باروح ؟!
تداخلـت فينـي خـلايـا الشـرايـح
من هاجسٍ ماهوب للنـاس مشـروح
أشوفني فـي هامـش الأرض سايـح
أرقب على سوحٍ وأعدي علـى سـوح
في واقعي مسـرح شجونـي جوايـح
وسوالفي عن واقعـي توجـع الـروح
مـن وعيهـا فينـي نزيـف القرايـح
والقلب منها بيـن الأضـلاع مجـروح
وش عاد لو إني على الـدرب طايـح
يضل شوفـي بالأمـل نايـد الشـوح
كـم رابـح خسارتـه بالربـايـح ؟!
وكم واحدٍ يركض على غير مصلوح ؟!
وأنا ومن مثلي من (أهـل النصايـح)
جميعنـا مهمـش ومنحـي ومكبـوح
نعيـش دنيانـا علـى كـل (لايــح)
ونصيبنـا ، مـا قـدر الله ب(اللـوح)
معنا التفاهـم فـي حـدود الصفايـح
ما للصحايـف بأمرنـا رأي مرجـوح
ومـداه مـا للحـق يصيـح صايـح
ويعمنا الإصـلاح بإخـلاص ونصـوح
وتزورنـا أيـام الـفـرح بالفـرايـح
وقت الربيع ومزهـر القـاع مسـروح
تصدح حروفي عقب ما هـي بحايـح
ويأتي صداها صوتْ ماهـوب مبحـوح
على هـوى نسمـة هبـوب الروايـح
ما للنكد في جونـا (وجـهْ مكشـوح)
سعادتـي ، لحظاتـهـا بالوشـايـح
يلمع ، وسام العز فيها علـى الضـوح