[شلال الظلام]

ياســر :وش فيك جالس لحـالك …
سعــود :لانــي أبي أجلس لحالي ياسـر وخر عنــي …
ياسـر :ليه جالس فوق راسك …
سعــود :اوووووف ياســر تراك مره رايق وخرعنــي لمصلحتك ..
ياســر :اوف اوف لهدرجــه عاد ..
سعــود :اناطالع بس أحذرك تلحقنـــي …
جلس ياسـربمكـانه دقايق بعدها أخذ الســلاح ولحقــه كيف تركه يطلــع لحـاله أدري اللحيــن بيستانس لو شاف الســلاحه وتصـويب فيـه بريحيـــــه …
كان جالس بعيـــد مررره أمداه يمشــي كل هالمسـافــه …مشــى له لين وقف وراه :سعــووود ….
مسك راسه بيـــــن يديـه وهويصــرخ :لأااااااا ليش رحت له ليــش هو حذرنـــي ليش لحقتـــــــه… أنا اللي ذبحتــــه انا السبب أنا ياليتنـــــــي ماطلعت وراه … كنت بســاعده تسببت بقتلـــــــه … وبدأ يضرب راســه بالجدار اللي وراه لين صار الألم لايحتمل وتوقف دفق ذكـــــريات … من مات سعــــود لا ليلــه ليل ولانهـاره نهـــــار عايش بالذكــرياته معــه لين آخــرموقف صــار اللي يخليــه مثل المجنــون ماهـو متحمــل يتذكــر اللي صـار ولاقادر يشيل المــوقف من راســــــه ….
اللي يشــوف ياسر مايعرفه بالشهــر واحد بس يصيبــه كل هالتغيـــــر والمصيبــه أن كل هذا مو بمصلـحتــه لأنه متهـــــم وكل الأدله ضده الموقف اللي كان عليــه وحكـاه الشهـــود يدينـــــه وهو ماهـو متكلم عشـان ينفــي هالتهمــــه عنــه ويقـول اذا كان متعمــد هالقتـل أوكان خاطــيء.. واللي يزيد الطيـن بله ويخليـــه متعمد القتــل أنه أخذ الســلاح ولحق السعــود اللي كان طالعه قبله بالدقايق يعنـــي مبيت النيـــــه ولاشلـــون ..؟!
أهله حاولو فيه يبغونــــــه ينطق ينفي التهم عنــه يقول كيف صار الحــادث بس هــــو ماعنـــده غير أن سعـــود مــا مـات بس لاغيـــر أثبتت عليـــــه التهمـــه يعنــــــــي مابقى الا أن اهل سعــود يتنازلون وهذا اللي مستحيل يصيــر خصوصاً أن أبو سعـــود بعد مــوته حس قد ايش مقصر فحقــــه يجــي اللحيــن ويضيع حقه بعـد مامات وأهله كلهم أخــوانه وجمــاعته محد يبي أبو سعـــــود يتنازل عن حقــــــه رغم المـبالغ الخيـاليه اللي عرضها أبوياســــر ديـــــه بس ولده يطلــع منهـــــا ...
يعنــــــي موكفـايه واحد ضــاع بعــز شبـابه والسبب مجهــول بيضيعــون الثانــي بعنجهيتهم ومبادئهم وتخــريفاتهم اللي مايعرفون فيهــا حق الواحد عليهــم الا بعــد مايمــوت ولا وينكم عــن سعـــود من زمــان ياســـــر هو اللي طــول عمــره معــــه واللحيـن بعــد مايمــوت سعـــود يدفن ياســـروهـوحــي بهالســجن …
تمـــر الأيــام ويصحـــى ياســــر على هالفجيعـــه ...
مو كفايه صديق عمـــره مات جايين يتهمـــون بقتلـــــه اللحيــن خلوه يستـــوعب أن سعــــود راح بلارجعـــــه بعـــدها تعالوا سووفيـــــــه اللي تبـــــونه وش تســـوى الدنيــا بكبـرها بعــد ماراح سعـــود.... اصلاً أي عقل صاحــي يصدق أنه يقتـــل أي شخص كيف اللحيــن يقولون أنه قتل سعـــود ... سعـــود اللي لو بيده يمنع عنــه المـــوت ماتردد لو يقدر يضحــي بالنفســه هو يمــوت وسعــود يرجــع يعيش مايتردد كيف يصدقــون أنــه قتلـــه كيف ... من عرفــوا بعــض فوق 12 سنــه ماتعدت هــوشاتهم الكــلام ماعمــر أحد منهم رفع يده على الثانــي الا بمــوقف واحد وكان على اتفاق مسبق بينهـــم ...
بس هالصحــوه المتأخــره مانفعت ياســر لأنه للحيــن رافض يقــول وش صــار كل الأسئله أجــوبتها عنــده انه ماقتــل سعــود فقط لاغيــــر ... واللي أثر فيــه كثير مـوقف أهل سعــود اللي مصدقيــن أنه قتل ولدهم كيف وهم اللي عــرفوه وتعامــلوا معه كيف يصدقــون أنه ممكــن يسوي هالشـــي موقفهم ذا زاد من اصــراره على السكـــوت عن حقـــــــه.. راضــي بأي حكــــم يصدر فحقـــه رغم أحسـاسه فالظلم بس المـــوت مظلــوم أهــون له من العيش بعــــد سعـــود ..
-------------------------
الأيام تمضــي من حــولها وهي عايشـــه بخيـالاتهـا مع سعــود اللي يسـوى عنـدها الدنيـا ومافيهـــا
ماعنــدها أحــد فغــلاته وبعــــــده كل البشر اللي حــولها مايهمـــونها تعلمت التحبــه من هي صغيــره أعتمدت عليــه وتعلقت فيـــــه طلع من حيــاتها ورجع لها وحبتــه أكثر واللحيــــن طلع من حيــاتها مره ثانيــه لكــن من غير رجعــــــــه سالي اللي أذا حبت تحب بأنانيـــه واذا اكرهـــت تكــــــره بحقـــــد .... ومابين هذا وهذا كان حبهــــــا لسعــــــود وكرها لياســـــــــر ... وياســر قتل سعــــود هذا فنظــرها قمــة الظـــلم (استغفـر الله العظيــم ) ليش مو العكــس ليش مامات ياســر اللي تكــــره ليش يمـــوت الخيــر ويبقــى الشـــــر ...
بقت على حالتها هذي مده طويله أستوعبــت بالنهـايه أن كل اللي تسـويه مامنــه فايده وأن اللي راح مايرجــع وصار لهــا هدف جـديد فالحيــاه ان تبذل كل اللي تقــدر عليه فالسبيــل أن ياســر يأخذ جزاته وحق سعــود مايضيـــع لأن الضغط من أهل ياســــر على أبو سعــود زاد وكان قريب من التنازل يوم نفضت سالي عنها ثوب الحزن وبدت تطالب فالحق سعـــــود ...!!
------------------------------
دخل البيت وشاف أمــه جالسـه فالصاله وعلى وجها ملامح حــزن ..
ناصر :الســلام عليكم ..
ام ناصر :هلا وعليكم السـلام ...
ناصــر :وش فيك يمـه عسى ماشــر ...
أم ناصر :اااه ياولدي ذبحتني خالتك هذي ..
ناصر:خالتي ليه وش مســويه ...
أم ناصر :وش مســويه يقالك ماتدري ماتشــوفها كل ماحـاولوا يتصالحــو خربت عليهــم ..
ناصر اللي مأيد خالته :مافيهـا شي تبــي حق أخــوها أخــوك يمــه ولا أنتي راضيــه بهالصلح اللي يحـاولون يســونه ... خالتي سالي هي الوحيــده اللي كاتبي غير حق سعـــود
ماهــو مثل باقي خــوالي أكبر همهم الديــــه وفارين مخ جدي معهــم ...
أم ناصر :ولد عمك اللي بيروح فيهــــا ..
ناصر بحقد :يستاهــل هو اللي جنــى على نفســـه ولاوصلة فيه المــواصيل يقتــل ياما سمعنا عنــه كلام وكذبنــاه ماصدقت لين شفت بعينـــي على باله كل شــي الفلوس تنفع فيــه اللحيــن بنشــوف الفلــوس كيف بتطلــعه منها ,, مأقول الا الله يقوي خالتــي على اللي تســويه فيــه ...
ام ناصر:أنا عارفه أن مأكلها فالأخيــر الا خالتك وبيجيلها يوم بتندم على كل اللي تســـويه ولا فيه وحده عاقلــه تبغى زوجهــا ينذبح هذا بدال ماتبذل الغالي والنفيس عشـان يطلـع منها ...
ناصــر :حتى لو كان هالزوج ظالم طاغيــه .. خليه يستاهل اللي جيــه وبنشــوف عمــي المحتــرم كيف بيطلــعه منها ......
أم ناصـر :خلاص يمـه قفل على هالمـوضوع ترى الشمـاته ماهي بالزينــه ..
ناصــر :صدقتي يمـه الشماته ماهي بالزينـه استغفر الله العظيم ...
كانت جالسهم معهم تسمعهـم وتداري دمـوعها لاتنزل أنتبه عليها ناصر وسألها :هدول حبيبتــي ليه ماتطلعيــن تلعبيــن ..
هديل :مأبي ماعنــدي أحد يلعب معــي ...
سكتــوا لأنهم عارفيــن وش بتقـــول خالو سعــود كان يلعب معـــي ... بس هي ماقدرت تسكـــت ... قالت والدمــوع تنزل على خدودها مثل السيل :حرام عليكم ليش تبغــون ياســر يمـــووت سعـــود كان يحبــــــه ولو كان عايش ماكان بيسكت لكم ... حرام عليكم والله حرام ليه تقــولون ياســر قتل سعـــود مافيــه أحد يقتــل صديقــه ..
وطلعت تركض عنهم ,, صدقتــي ياهديل لو سعــود كان عايش ماكان بيسكت لهـــم ... لحقهــا ناصر لأنها طلعت تركض للحديقـه طاح قلبه يــوم شاف باب الشـارع مفتــــــوح أول ماوصل للباب دخل سامــي وهو ماسكهــا ...
رفعهــا ناصر :هدول ليش تســوين كذا كم مره قلت لك لاتطلعيـن بالشـارع ...
هديل وهي تصـرخ :وانا كم مره قلت لكم ياســر ماقتل خالي سعــود ماقتلــه ...
دخل عنهم سامــي اللي دمعت عيــونــه غصب ...
ناصـر بقهــر :حتــى انت ... صد لهديل اللي للحيـن تبكــي :هدول حبيبتي أنتي ليش تبكـين اللحيــن عشان خالي سعــود مات ,, ولاعشـان .. وسكت شوي :ياســـر ...
هديل :لاعشــان ياســـــر ليه يقتلـــونه حرام ...
ناصــر :يعني موزعلانــه عشـان خالي سعـــود ..
هديل براءه :لا ليش أزعل عشـانه خالي سعــود أن شاءالله فالجنــه ...
ناصــر :ان شاءالله .. ولاتزعليـــن عشـان ياســــر الله معـــه ...
جالسه فالبلكــونه ومنها سمعت الحــوار اللي دار بينهم وبنفسهـا :لاياهديل الله عمــره ماكان مع ظالم حسبي الله عليـــه ...
من عرفتــه ماعرفت لحظــه حلــوه لدرجــه وصلت فيــه أنه يقتل ليش أستغرب وأنا اللي شفت الجحيـــم معـه هذا أنســان مجنـــون فيــه قسوه ماتــوجد الا بالحيــوانات واللي ماعنــدهم قلــوب أخذ أخــوي مني وهو يدري أنه أعز عنــدي من حيــاتي حتى الله ينتقــم منك ياياســــــر يارب ماتشــوف لحظــه زينــه فحيــاتك ....
جروحـي اللي بسبايبك للحيــن ماطابت ولاظني فيوم تطيب ..
أنا لازم ابقى صابره ثابته ماراح اسمح لهم ينفذون مبتغاهم ويتنازلون عن حق سعــود لو شو ماصار والأفضل لهم يبتعدون بمطــامعهم عــن سعـــــود ...
سعــود آآه ياسعـــود رحت وحملتنـــــي هم أكبر منــي هم حقك اللي لازم مأضيعه لو فيها أني أوقف بوجــه الدنيــا بأسره بأوقف وماراح أتخاذل ولاأمــــل ...
----------------------------
جالسه معــه وأفكــارها أبعد منــهم كانت بعيــونهن الأسئله اللي بيسألنهـا بس ماهن متجرأت .... لين قوة وحــده منهن نفسها وسألت ..
سمــر :بسوم حبيبـتي بسألك بس ترى مأقصد شــي من ورى هالسؤال ...
بسمــــه بغصــه :الجــواب نعم الخبـر اللي قريتيـه فالجريده يخص أخــوي مـوهذا الجـواب اللي تبغين تسمعينــه ..
سمــر :آآها بس ترى مأقصد شـــي ... وصحيح قتـــل سوري على الكلمـــه نسيبـــــه أخــو سالي ...
بسمـــه :صحيح اللي أنقتل أخــوي سالي بس أخــوي ياســر ماقتل وللحيــن ماثبتت عليـه التهمـــه ..
ساره :وأنتو وش بتســـون بتخلــونه كذا ..
بسمــه :لا أكيــد وأخــوي بريء وبيطلــع منهــا ...
وصدت عنــه وجلست تفرج على الرايح والجـاي يعنــي كل هالنــاس تدري أنها اخت ياســر اللي خلــوه مجــرم حرام عليهم والله حـــرام ,,,
آآه يأخـوي موكفايه أنك مظـلوم تجي الحقيــره ذي وتقهــرك بمــوقفها منك للحيــن ماني قادره أنســى سؤالك عنها والجـواب اللي تلقيتــه مثل الصدمـــه ... طــول الوقت كنت حاســه انهم أبد مو على وفاق لدرجــة حسيت فيهـا أنها متزوجتــه غصب بس شلت هالفكـره من راسي لأن سالي مستحيل أحد يغصبها على شي ماتبيــه ...
بس لهدرجــه توصل فيها الحقــاره انهــا توقف بوجـه أهلها عشـان مايتنازلــون وياســر يطلــع منهــا أكيــد تكــرهه ولاماســوت هالشي عشـان حبها بس لأخـــوها ...
وينك ياليت بس أشوفك عشـان أعلمك قد ايش حطمتــي أخــوي بس ياترى بتسمــع بتفهــم بتحــــس مأعتقــد لأنــي هذي حتى الأنسـانيه حرام تطلق عليهـــــا ...
بس ست الحســـن والجمــال ماتداوم حســن على أخــوها ياعســاه ... استغفر الله العظيم صرت اللحيــن أنا اردى منهـــا ...