[غريب احساس]

بسم الله الرحمن الرحين
السلام عليكم ورحمة الله وبركاته


ألفية بني لام .. والتي ألقيت في أمسية بني لام الأولى((المغيره-الكثران-الفضول)) في دولة الكويت




ألفٍ أولف يالجماعة قصيدة = قصيدةٍ مني عليكم جديدة
ألفيّةٍ فيها البيوت العديدة = ألفيّةٍ فيها البيوت الجزيلات
أبيات جبناها على ما تريدون = مثل القصيد اللي علينا تجيبون
من خاطرٍ صافي ولا هو بمكنون = جبنا بيوتٍ من حروفٍ عديدات
..
والبا بغيت أكتبلكم يا جماعة = حقٍ عليّ أكتبلكم من قناعة
وانا لكم بالأمر سمعٍ وطاعة = مهمةٍ عندي من اغلى المهمات
مهمةٍ عندي ولا نيب مجبور = لا صرت أبكتبها بلا حس وشعور
لكنها من قلب بالحب ماسور = له في محبتكم وسوم وعلامات
..
والتا ترانا من بني لام من طيّ = من قوم حاتم مالنا بالكرم زيّ
ولا نبي لاحدٍ شهادة ولا شيّ = حنا مصابيح الظلام المنيرات
حنا مصابيح ولنا بالدجى نور = نورٍ كما نجمٍ مع الليل منثور
يضوي شعاعٍ كله أفراح وسرور = سحرٍ كما سحر العيون الظليلات

والثا ثبتنا لاجل سيد النبيين = في نصرة الإسلام والحق والدين
وصارت قبيلتنا من أوفى المزكين = وهذي علومٍ ثابتات وصحيحات
ومنا أهل علمٍ ومنا صحابة = ومنا أهل خيلٍ وشعر وكتابه
ومنا أهل حكمة وعقل وذرابه = وكلٍ يفاخر بالعلوم الجميلات

والجيم جينا من عصورٍ قديمة = جينا من ديار النفوس الكريمة
ديار طيّ اللي تفك الظليمة = وهذي علومٍ له سنينٍ قديمات
وجينا بنجد وجيشنا ينطح أكوام = ما تسمع اللي قال يشبع بني لام
وحنا حكمنا نجد أربع مية عام = من عام سبع إمية وكلٍ له إثبات

والحا حكمنا نجد كله غصيبة = ولا احدٍ عطانا نجد برضا وطيبة
يا ويّ هاك الوقت كلٍ دريبه = كلٍ درى وش لام في ذيك الأوقات
وكلٍ تحالف يوم سطوة بني لام = من غرب نجد ومن جنوبه مع الشام
ونعرف وقعة ظلم في ذيك الأيام = يوم انكسوا معهم جروحٍ عطيبات

والخا خلقنا الله شعوب وقبايل = قبايلٍ منها فخوذ وحمايل
متشعبة ما بين عدة عوايل = والله يدبرها على كيف ما جات
وحنا لنا فخوذ وحمايل كثيرة = من الفضول ومن كثير ومغيرة
حنا مصابيح الظلام المنيرة = اللي تسر العين وقت الملاقات

والدال درب الطيب كلٍ يدله = والطيب دار النا وحنا هلٍ له
وعيبٍ علينا ما نجي حدر ظله = ما دامنا من نسل أصولٍ كريمات
منا الفضول وحيها من قبيلة = أهل الحمول الكايدات الثقيلة
حمول خيل أهل المهار الأصيلة = مدلهين الجار في كل الأوقات

والذال ذا قولٍ قديمٍ سمعناه = قول البجيدي شاعرٍ ما نسيناه
يذكر به اللي غربلت فيه دنياه = دنياً تسوق الناس من غير مشهات
ذولا الفضول اللي لهم قدرٍ وشان = خرسان والصرخة وغزي وسلطان
أرفع بهم راسي على كل الأحيان = أهل الأصايل والسيوف الصقيلات

والرا رضعنا الطيب مع رضعة الديد = وفعل الجميلة للخوي عندنا عيد
ولا نخاوي راعي الحقد والكيد = واهل النفوس الناقصات الضعيفات
تشهد لنا بالطيب ناسٍ بعيدة = من غير ما ندفع ونشري قصيدة
قديمةٍ ما هيب حاجة جديدة = متوارثينه دون علم وشهادات

والزاي زان وطاب كيفي وبالي = يومن ذكرت أهل اليمان الطوالي
ذولا المغيرة ربعي وراس مالي = أهل المغازي والحروب الصعيبات
عشاير الغدفا وقوم الخياري = تاريخهم يبهر عقل كل قاري
قومٍ لهم في صفحة العز طاري = ويصعب علي الوصف في عدة أبيات

والسين ساسي من عريبين الأنساب = عز القرايب والحبايب والأصحاب
يحسب لهم وقت اللقا ميّة حساب = غاية تروح ابها جميع الوسيلات
ذولا هم الكثران ربعي وناسي = اللي تروض باللقا كل قاسي
نبهان مع عساف يا تاج راسي = ريف الخوي وقت الليال العسيرات

والشين شرفنا الولي بالصحابة = منا وفينا في كتاب الإصابة
يا ميزةٍ تفخر بها كل لابة = وحنا نسطرها بكل السجلات
عروة ابن مضرس مع خريم وبجير = عليهم الرضوان والذكر بالخير
وصلاة ربي عد ما غرّد الطير = على نبي الله في كل الأوقات

والصاد صامل بن هميجان منا = ولزام ابن عروج ذكره يغنا
أفعالهم لا شك ما يجهلنا = تذكر لنا من فوق قب الكحيلات
ومحمد وشافي عيال الخياري = وابذكر جغيمان في كل طاري
اللي عليه العلم لا صرت داري = ولا توفي جغيمان لو جن جزلات

والضاد ضقت إن قالوا الناس ناسي = لامن ذكرت جبال لام الرواسي
رجالٍ أرفع فيهم اليوم راسي = اللي رقوا بالمجد روس الطويلات
فريح ابن طامي وراضي وفلحان = وجساس وابن مصيخ وعايش وغضبان
ومناصر الدعوة هذاك ابن وهطان = أموات وله ذكرٍ بقى حي ما مات

والطا طريق المجد صعب اتباعه = لو كان مهما كان شفت اتساعه
لامن سلكته ميزه ثم راعه = تلقى دروبه لا تميزت وعرات
وعرات للي ما سعى للجميلة = عيبٍ على جماعته والقبيلة
ما عدّه إلا مثل خبل وهبيله = هيهات له والمجد هيهات هيهات

والظا ظفرت بمعرفة مجد الأجداد = مجدٍ كما نجمٍ ظهر بين الأمجاد
فيه افتخر وارقى على روس الأشهاد = والخافي أعظم لا بغيت الخفيّات
مجدٍ بنوه رجال باقوال وافعال = ابن حنيتم والندي وابن صلال
وجساس ابن عمهوج وذاك ابن مثال = رجال ما هابت سهوم المنيات

والعين عسر القاف شيّب ولا شبت = الى بغيت أجيب الأفكار لي جبت
إن ما وفيت القول لا شك ما طبت = ومناي أوفيها لو أسهر ولا آبات
أبذكر رجالٍ لهم فعل طيّب = وديد ابن عروج وابن الحبيّب
وهذاك ابن جاسر فعوله تشيّب = ويالله أنا طالبك تغفر للأموات

والغين غاب الميت والحي ما غاب = وابن جريّد دوم للضيف حبّاب
يا عز ضيفانه ويا عز الأجناب = تشهد له البيضا على كل ما فات
واذكر ابن مذود سليل الكثيري = شيخٍ على الصعبات ما يستخيري
أمير ولد أمير من صلب أميري = تاريخٍ موثق ويبقى بصفحات

والفا فرحت بجمعة عيال عمي = اللي ترد الروح وتزيل همي
أفديهم بقلبي وروحي ودمي = اللي بشوفتهم تحل المسرات
واليوم يومٍ كله أفراح وسرور = يومٍ به الشعار تضوي كما النور
نسمع قصايدهم من احساس وشعور = صوتٍ يهز القلب من بد الأصوات

والقاف قاف المظهري ما يشيبي = توه شباب وشرقته ما تغيبي
وليا حصله شي حظ ونصيبي = ويا جعل حظي ما يجي فيه ميلات
خليجنا واحد لنا عدة أوطان = في ظل شرع الله وذربين الأيمان
آل السعود مرجحة كل ميزان = اللي لهم في دنية العز رايات

والكاف كلٍ مثل اخوه وخويّه = ود ومحبة والعلاقة قويّة
حتى لو اختلفت علينا الهويّة = وحتى لو ابتعدت علينا المسافات
خليجنا واحد وحنا بني عم = وديارنا وحده بها الخير ينعم
يا ديرةٍ حكامها اخوان مريم = آل الصباح اللي تحل الصعيبات

واللام لي أعز كل الحروفي = فيه افتخر واعتز ولا هوب حوفي
ولا هو غريب إن قلت زين الوصوفي = واللام حرف وللحروف أبجديات
حنا بني لام النواسل وحنا = يوم القبايل ضد ما يربحنا
أولاد سعده لا غدينا ورحنا = نبقى مثل نجمٍ تعلا السموات

والميم منا اللي لبس حلة ملوك = أوس الجواد ولابها ريب وشكوك
موروثنا يبقى للأجيال متروك = وحنا لنا في صفحة العز بصمات
وترا الوفا فينا من الله طبيعة = واذكر مواقف حنظله في صنيعه
اللي حياته لاجل عهده يبيعه = ذولا هم أصحاب النفوس الوفيّات

والنون نذكر موقفٍ لابن دبّاس = اللي بجنسه نادرٍ بين الأجناس
أظهر خويّه من ورا ذيك الأحباس = ما فكر بقول العواقب وخيمات
عرض حياته للخطر والمهالك = ما قال مالي يا رفيقي ومالك
يا سعود فال الله ويا زين فالك = عليك مني يالكثيري تحيات

والها هواي وغايتي في حياتي = أشوف لم الشمل عقب الشتاتي
وتبقى حياتي لين وقت المماتي = كل الجماعة حولي بكل الأوقات
أشوفهم في كل لحظة وساعة = لو شوفهم يحتاج حب وشفاعة
ماهوب حب لمصلحة أو طماعة = حبٍ شريف ومالنا فيه غايات

والواو واجبنا وحقٍ علينا = نقدم الواجب وما في يدينا
ولا نقول من الجهل ما علينا = هذي يجي فيها حقوقٍ وشرهات
إنعين ونعاون بكل اجتهادي = ونذكر فعول رجال لام الشدادي
اللي لهم حقٍ علينا وكادي = مثل المهادي لا طرالي بالأبيات

واليا يجيك لكل حاجة بداية = ولكل مقصودٍ وسيلة وغاية
وانا بديت ومقصدي فالنهاية = أكتب قصيدة لاجل هاليوم بالذات
كتبتها لاجل الوجيه السفيرة = في حقهم لا شك ما هي كبيرة
وصلاة ربي عد رمل الجزيرة = على شفيع الخلق بازكى الصلاوات


الشاعر/رشيد بن سعد المظهري الكثيري