[أبو طلال]

يوم الربوع بالليل كنت في الإستراحة مع الشباب
كانوا يلعبون بلوت ومنهم من يبي يلعب بلايستيشن
وأنا مالي في هذه اللعبة ولا تلك
لذا توجهت للغرفة الثانية عشان أكمل الفيلم بعيد الإزعاج

لكن الإزعاج والصياح واصل عندي
قمت سكرت الباب والحمد لله الصوت راح كثييييييييييير
جلست أشاهد الفيلم بهدووووووووووووووء

أنتهى الفيلم بعد ثلاث ساعات تقريبا
الفيلم طويل واللي زاده طول الدعايات الكثيرة والطويلة
مو هذا المهم لأني وجدت الباب مقفل بالمفتاح
أنادي الشباب مافيه أحد
أفتح النافذة ما القى أي شخص في الإستراحة
ناديت وناديت وناديت وناديت ولا أحد يرد
لا أحد من الشباب ولا الهندي حارس الإستراحة

قلت أكيد مزحة وبيطلعون بعد شوي وهم يتضاحكون
لكن خلني على هدوء الأعصاب وأرجع أشوف التلفزيون

مرت ساعة وثلاث وثمان ومافيه أحد
جوالي أسمعه يرن ويرن لكن ما أقدر أرد
الجوال في الغرفة الثانية يشحن

وش هالبلشة هذه ؟
أذن الفجر ،،، طلعت الشمس ،،، كبس النوم
بدأ الضجر ،،، هنا من أمس ،،، وبعد اليوم

نمت وجلست الظهر قلت يمكن الهندي جاء

لا والله للحين ماجاء الباب مقفل ومايرد على صوتي

أعوذ بالله وش اللي صار ؟
جوالي يرن ويرن ويرن
وفخاطري أقول :
عاد هالشباب يدقون علي وما أرد ما أحد يتفقدني وين أنا فيه

العصر دخل وطلع والشمس غابت وليّلت الدنيا
وأنا في هالغرفة ماغير تلفزيون وفواكه وحليب السعودية وماي

أكيد عقب العشاء بيجون
ما أحد جاء لا الشباب ولا الهندي

وبعدييييييييييييييين
شالسالفة ؟ ،، المشكلة هالجوال مو راضي يسكت

عـدت الساعة 12 ولا أحـد ظهر ، راح أكثر الليل وقرب يذن الفجر

أذن ومن بعد الأذان طلعت الشمس ووصلت الساعة 9 ونص
إلا هذاك الشخص اللي يدخل
ناديته بصوت عالي
إلتفت يمين ويسار مالقى أحد
النافذة فيها زجاج عاكس ، فتحتها وطلبت منه أنه يفتح الغرفة
قال لي والله المفتاح مو عندي عن الهندي
وقلت له على اللي صار ، أبو الشباب قام يضحك ويضحك ويضحك
وهاتك إتصال على البقية يعلمهم ويقول لهم السالفة

طيب يااااااااخي كلم الهندي خله يجي
يقول لي أبــــــــــــــــــــــــداَ
لازم الشباب يجون ويشوفون بعيونهم
بدوا يهلون ويجون والضحك واصل برج الفيصيلة
دوروا الهندي وجابوه الماخوذ كان نايم عند ربعه ربي ياخذه

كنا معزومين عند ناس وأبو الشباب الهندي
لقاها فرصة راح يشوف أفلام هندية عند ربعة ونام هناك

ومادرى أنه سوى فيني فيلم هندي على مستوى

الشباب لعبوا وطلعوا
الكل يحسبني رحت قبلهم
الهندي على عجل قفل ورى الشباب وراح

وأنا ياغافل لك الله ليلتين ويوم في هالإستراحة

وهم يوم أني ماجيت العزومة يتصلون علي كل شوي
حتى أهلي يكلمون وربعي اللي بالعيون وأولهم سعادة المدير باشا

طبعا اليوم الصبح صرت مضحكة اللي في العمل كلهم
السعوديين والأجانب وحسبي الله ونعم الوكيل