[خربشات مبدع]

أم الجماجم وحب في المقابر

الحلقة 24


ولكن الام قاطعتها قائلة لكلتا بنتيها : شو يا بنات انتن بنات جورجيت ولا بنات الدهري ولا نسيتن انكن حاملات العهد..

فقالت ياسمين : احنا ما نسينا ياأمي بس الزمن تغير وولاد الدهري اللي دفنوا جورجيت ماتوا واسم الدهري انمسح من الوجود ... وحتى ستي جورجيت اللي احنا عمرنا ما شفناها لو كانت طيبة كانت حتسامح

صرخت الام بغضب وقالت : اخرسي جورجيت ما ماتت وعمرها ما حتموت وحتى ولو هي سامحت احنا مش لازم نسامح..

فقالت وردة : يا أمي لا تزعلي بس احنا بنعرف انو جورجيت ماتت من زمان

غضبت الام وقالت : يا بنات بقلكن جورجيت ما ماتت افهمن ما ماتت وعمرها ما حتموت

فقالت ياسمين : كيف يا أمي كيف ؟؟؟

بكت الام وقالت : الملعونة عمرها ما بتموت وعمرها ما بترتاح وانا والله ما حخلي حدا من نسل الدهري يرتاح

خيم جو من الحزن والبكاء وانعكست الامور واخذت ياسمين واختها وردة في تهدئة امهما لعنة ابنة جورجيت وعيون الواحدة تقول للاخرى من ولد في الظلام كتب عليه ان يبقى في لعنة ويموت بها

وقفت وردة وقالت : خلص يا أمي لا تبكي ما في شيء بستحق دموعك احنا حنظل انطارد اولاد الدهري وحنجننهم وين ما كانوا ان شاء الله في اخر الدنيا وغمزت بعينها لأختها ياسمين.. " مش هيك يا ياسمين " اومأت ياسمين برأسها علامة على التأكيد وعيونها تقول : الى متى !!

لم يخفى على الام عدم رضا ياسمين ... فقالت موجهة كلامها لوردة : باين على اختك تغيرت كثير من يوم ما عرفت فارس ابن الدهري وقدر ينسيها انها بنت جورجيت وانا خايفة ينسيها العهد اللي حاملتوا يا وردة ... الحب المجنون دخل قلب اختك وسيطر عليه

ياسمين بقية صامتة ولم تعلق على أي كلمة مما قالته امها ووجهت الام كلامها لياسمين : اسمعي يا ياسمين اولاد الدهري شو ما كانوا بظلوا ولاد الدهري ... والدهري عدونا وحيظل عدونا وانت مسموحلك تختاري واحد منهم علشأن تتجوزيه ويكون ابو بناتك ويعيش معك هون تحت القبور وان كان بحبك حيطلعك ويطلع للنور .. .بس ولاد الدهري كلهم واحد ومش حيكون احسن من ابوك اللي تركنا وهرب.. وما صبر حتى يشوفكن .....

مر وقت وياسمين صامتة تطرق برأسها الى الارض لا تنبس بكلمة ، هادئة شاردة الذهن لا ترد ولا تبد أي رد فعل لكلام امها " لعنة " التي حاولت ان تجرها للحديث بكل طرق حتى انها شتمتها...

ويبدوا ان ياسمين قررت اخيرا ان تخرج من صمتها فقالت لامها : انا يا أمي بسنة وحدة من يوم ما سمحتي لي اطلع واشوف النور جبت اربعة من ولاد الدهري وخليتهم يفتحوا قبور ويدخلوها ... انا يا امي عمر ما حدا شاف وجهي وعقله ظل معوا ... فارس كان خامسهم وانا ما تعرفت على فارس علشأن احبه ... انا في الدنيا كلها تعلمت احبك واحب اختي واحب ستي جورجيت اللي ما شفتها بعمري .... وانت يا امي طلبت مني اتعرف على فارس وقلتي انوه الدور أجا عليه ، اتعرفت عليه وخليتو يفتح بدل القبر ثلاثة بس يا أمي القدر اللي بتحكوا عنه ما خلاه يتجنن والقدر خلاني احبه ... انا انسانة بحبه ومش بأيدي اني بحبه ويا ريت يا أمي هاللعنة تبعد عن فارس

استاءت الام من كلام ابنتها ياسمين وردت عليها بأمتعاض : بتحبيه يا ياسمين طيب تجوزيه وجيبيه يسكن معك هون حتى تخلفي بنتك الاولى واطلعي انت وياه للنور...

ردت ياسمين : ما بدي اتجوزه يا امي وما بدي يسكن هالقبور بدي نتركه بحاله

ردت الام : يا بنتي مش انت بتخططي اللعنة وبتحددي مين تصيب ومين ما تصيب .. حبيب قلبك فتح قبر ولازم يدخله وانت ما جبرتيه يفتحوا ولي بفتح قبر من بره لازم يسكروا من جوا

ياسمين : هذا الكلام بتحكيلهم اياه بس احنا بنعرف انه لو ما بندفعهم ليفتحوا القبر ما بفتحوه وما بتصيبهم اللعنة

احتدت الام وغضبت واخذت تصرخ بياسمين ، فتدخلت وردة لتهدئة الجو وقالت لياسمين : يا أختي ان كان فارس بحبك مثل ما بتحبيه... ممكن تتجوزيه ويسكن معك هون وممكن يصبر ونطلع كلنا للنور

ابتسمت ياسمين ونظرت لاختها بحزن وقالت : يا وردة الناس بره بتخاف من عتمة القبور افهمي انه الناس بره مش مثلنا ولا طباعهم من طباعنا انت تعرفتي عليهم قبلي وعشتي معاهم اكثر من ثلاث سنوات كنت معاهم قبل ما ييجي دوري واطلع انا .... وما فهمتي انه الدنيا بتختلف عن هون يا وردة في حد وصل عنا وظل بعقلاته يا حبيبتي فارس كان حيتجنن ولساتو ما شاف شيء وبدك اجيبو هون.....

ورغم الجو المشحون الا ان وردة لم تمنع نفسها من الضحك وكذلك فعلت ياسمين وهن يعلمن ماذا سيحدث لو وصل فارس الى حيث هن

دموع وكآبه وحزن وابتسامات ... امتزج الجو بمزيج من المشاعر المتناقضة ... وتسمرت عينا وردة بالاتجاه الاخر من الغرفة ولكزت بيدها اختها ياسمين لتلتفت بنظرها الى ما تراه " امها لعنة " وظهرت من بعيد عجوز ترتدي الابيض تسير نحوهم بخطى واثقة

ظهر القلق والارتباك بعيون وردة وياسمين وعلى عكسهن ارتسمت ابتسامة على شفتي امهن " لعنة "

اقتربت العجوز لتسرع اليها لعنة وتنحني وتقبل يدها وكذلك فعلت ياسمين ووردة

نظرت اليهن العجوز وقالت بحنان : شو القصة يا بنات ؟ .. شو اللي عم بصير ؟

اسرعت الام واجابت : شايفة يا خالتو ، شايفة البنات كيف تغيروا ؟.. شايفة كيف متفقات عليّ؟!

ربتت العجوز على كتف لعنة ... وقالت : معلش يا بنتي البنات لسه صغار وبكره بيكبروا

اطرقت ياسمين وكذلك وردة برأسيهما بالارض خجلا وطلبت العجوز البيضاء ان يجلسوا الى جانبها ويحدثوها عما يحصل ... ووجهت كلامها لياسمين بالذات وقالت لها : " شو اللي عملتيه يا ياسمين ؟ "

ردت عليها ياسمين برهبة دون ان ترفع عينيها : انا ما عملت شيء يا خالتي انا طول ما انا بره حافظت على العهد وصنته ... بس يا خالتو غصبن عني ... حبيتو يا خالتي حبيتو ..

واخذت ياسمين تبكي فربتت العجوز على رأسها وتنهدت وقالت : يا بنات انا بحبكن وما بدي حد يأذيكن وما بدي يصير فيكن مثل ما صار لجورجيت " العهد " اللي انتقل من ستك لأمك لاختك ما يمنعك انك تحبي بس ما يسمحلك تعملي اللي بدك اياه...

فقالت ياسمين : والحل يا خالتو شو اعمل ...؟!!!

ردت العجوز : شو يا ياسمين انت بدك تتركينا...؟

فقالت : لا يا خالتو انتو اهلي ومالي غيركم مش ممكن افكر هيك بس بكفي يا خالتو

ردت العجوز : احنا يا بنتي ما بنئذي حدا احنا بنذي اللي بئذينا بس .. ستك جورجيت قبل ( 100 ) سنة عاهدتنا وحافظت على العهد والعهد ما حولها للعنة عيلة الدهري هي اللي عملتها لعنة " والعهد " ساعدها وحماها ...

ستك جورجيت كان مطلبها انو كل ذكر من نسل الدهري ودمه وين مكان وفي أي بلد كان ان كان صغير لما يكبر انه تعرفوه على قذارة اصله وتخلوه يشوف عتمة القبر ويعيشها علشأن ما حد يحمل اسم الدهري من جديد وما تتكرر مأساة جورجيت من جديد وهي انذرت انه ما بنت من بناتها تعيش بالنور ما دام على وجه الارض ذكر من نسل الدهري ما شاف عتمة القبور وتركنا لكن " العهد " علشان ينتقل لبناتكن وبنات بناتكن..

وتركت الطريق مفتوحة انو ييجي يوم يتجوزها واحد من " ولاد الدهري " يضحي علشأن بنت من بنات جورجيت يتجوزها ويسكن معها تحت القبور وما بشوف النور لحد ما تخلف بنت يسموها جورجيت ومع مولدها حيدخل النور لعتمة القبور

وانت يا ياسمين ان كان فارس بحبك وانت بتحبيه خليه يسكن قبر لمدة سبعة ايام لوحدو لانو شاف وجهك وهذا عقابو وبعدها نزليه لهون وتجوزيه وخليه معك لحد ما تخلق بنت على وجهها تشوفو النور

فقالت ياسمين : يا خالة فارس راح يتجنن قبل ما يخلصو السبعة ايام ولو قدر يصمد ونزل عندي وتجوزني ممكن نخلف ولاد وما نخلف بنات وممكن هالشغلة توخذ سنين

فقالت العجوز : شو يا ياسمين ........ ؟؟


تابع الحلقة 25