يامشير القلب عن داعي غرامـه
خل قلبي فـي غرامـه لاتشيـره
اتركه مايجهـل الحـب ونظامـه
لاتعده ضمـن عميـان البصيـره
له من الخبره مايحفظ لـه مقامـه
وارثٍ له من سلوك الحسن سيره
لاتـراود شفـه وغايـة مرامـه
الهبايـب لـو تمـره ماتثـيـره
فوق غصنه حط عصفور وحمامه
وغرد الأول على نـوح الاخيـره
لو مراده قمزه وغمـزه وشامـه
كان شفته يومي لموكـب سميـره
فيه غيراللي علـى خـده علامـه
واحـدٍ عنـدي علاماتـه كثيـره
النزاهـه والوجاهـه والفهـامـه
والنبا الجذاب والنفـس الستيـره
سمعته تفرض على الناس احترامه
مارماها فـي الرحـاه المستديـره
ولايسحب حساب لبـاس العمامـه
لو لبسها شيخ شيخـان العشيـره
استلم قلبي ومـن يـوم استلامـه
ما تولا عرش قلبي حـي غيـره
كم يذوبنـي علـى زبـدة كلامـه
بالنقاش اللي على كيفـه يديـره
بينـي وبينـه مشاريـه وملامـه
ودمعتين بعين شوق وعين غيره
لو يقابلنـي بضحكـه وابتسامـه
هب في صدري هواه وطار طيـره
جر فكري بعد ماحـزت اهتمامـه
بالطواريـق الطويلـه والقصيـره
قلت احبك قال حبي لـك علامـه
قام يكبر قلت مدري قـال خيـره
كل منا لـو يعبـر عـن هيامـه
تقصر علومه عن اللي في ضميره
والطيوف اللـي تبلغنـي سلامـه
ما درت قلبي بفقده وش مصيـره
جعـل ربـي مايذوقنـي خصامـه
شاريٍ وصله على شـره وخيـره
يازعيم الوجـد تزهـاك الزعامـه
سير بي والله يصون احلى مسيره
هكـذا حـب تغـذيـه الكـرامـه
افتخربه واذكره فـي كـل ديـره
العلم رفرف علـى ذروة سنامـه
اتركوا قلبي مايسمع مـن يشيـره
مالحقني لوم مـن قصـة غرامـه
لو تبثه نشـرة أخبـار الجزيـره
ممــآ رــآآآآق لـــي:118:
