ملتقى مدينة العيون - .؛ (هـذي عـادتـكـ / ......!!

دايم و أنا أخطي و أنت تغفر لي و هذي عادتك
تغفر .. ولو ما تلمس بصوتي ندم و الا أعتذار

يا طيب قلبك كل ما يسجد على سجادتك
و يا حلو عفوك كل ما سامحت و أخطائي كبار

تكفى دخيلك حطني بينك و بين قلادتك
و أرجوك لا تضحك .. تراني صدق منها صرت أغار

مدري من أحسد شوفتك .. الأهل و الا وسادتك
هذي تضمك بالمسا .. و ذولا يشوفونك نهار

ما فادني صبري و لكن فلسفاتك فادتك
أنا أشهد أنك صرت تحكمني مثل حكم التتار

يا ليت الأشيا يوم قادتني لحبك .. قادتك
حتى تذوق الشوق .. و الحيره .. و طعم الأنتظار

يا عمري الباقي .. سعادة عاشقك سعادتك
في ذمتي .. تبطي و لك فالقلب مقدار و وقار

أسف .. أذا كاني غلطت و جيت عكس أرادتك
و أسف اذا كاني خذلتك دون قصد .. و بأختصار:

صدقني أنك كل ما مريت روحي .. نادتك
ما كنها تعرف سوى أسمك .. من كبار و من صغار

و الله ما أجمل من عتب صوتك .. سوى أشادتك
لا قمت تمدحني .. و تعطيني أمل بالأنتصار

أنت الحنان اللي نزل بالكون .. ساع ولادتك
و انا اليتيم اللي بدونك .. دون ربع و دون دار

من عادة الدنيا تجود .. و يوم جادت جادتك
جيت و نزعت الخوف من قلبي .. و قاطعت الحوار

متى على الله يقترب شوفك .. و تسكب سادتك
و أضم كفينك .. و ترفع عن محياك الخمار

هاك الغلا .. و الدمع خله جائزة نقادتك
و أصبر على اللي كل ما يفقدك ذاق الأنكسار

والفت قلبي و استحليته .. و روحي هادتك
و أيقنت بأنك صرت أهم أنسان .. و أعلنت القرار

قم لا عدمتك لا يهمونك .. ترى حسادتك
في كل بيت يمر في وصفك يحسون بمرار

و أنت الفريد .. بصحبتك .. و بطيبتك .. و عبادتك
و بكل شيء .. و غيبتك معنى حقيقي للدمار

أموت فيك .. و في غلاك .. و في دلعك .. و عادتك
و أرجع و أقول أني غلطت و جيت أبهديك أعتذار

عبدالله ذويبان