بدون زعل يا ادارة الملتقى ..ابي ادلو بدلوي وكل واحد عنده دلو يدلي به :*)

[سطل]

السلام عليكم ورحمة الله وبركاته

الى ادارة المنتدى ....الموقرين مع التحيه


ودي ارسل لكم هالرساله وعسى ان تكون ذات فائده لكم وللجميع

ممكن اعبر عن شعوري وشعور خلجات قلبي ؟؟

طيب ابي اتكلم بالعاميه عشان اخذ راحتي ولااحد يفكر اني اكتب هالشي عشان شي شخصي لي بذاتي لا بل للجميع وهذا مالاحظته
انتهينا من المقدمه (الحمدلله)
*************************************

ودي اسال بعض المشرفين اللي بالمنتدى

اول رساله للاخ الفضي 99:اول شي اشيد عليك لانك اول ماتدخل الملتقى تدخل قسمك العام وتشارك في ردود المواضيع

هذا شي طيب
وتتجاهل البعض هذا شي مش طيب

وبعدين يااخي كم مسمار معطينك الاداره عشان تثبت مواضيع ؟؟ من دخلت الملتقى ماعمري شفت غير موضوعين مثبتين وللحين معلقين فوق تقل شار لك خلاقين بالسطح ولو تغيب سنه وترجع مااظنتي بتلقى غيرهن والموضوعين مافيهم شي من النقاش بل يتشابهون في المعنى وواحد منهم لك

يااخ الفضي الملتقى العام وضع لكي يكون هناك مواضيع مهمه ذات نقاش تخص بالمجتمع العام ومافيه من مواضيع مرتبطه فيه والاولى ان يكون مشرف الساحه هو الاولى بكتابة مثل هذه المواضيع وتشجيع الاعضاء على الاقتدااء بصاحب المجلس
ثانيا

تشجيع الاعضاء اللذين يكتبون مقالات ومواضيع ذات نقاش وحوار هادف بتثبيت مواضيعهم اسبوع كحد ادنى

يااخي الواحد يتعب الين يلقى موضوع وبعدها يجيك واحد يكتب لك اربع مواضيع وينزل موضوع هالادمي تحت ولااحد ماعطيه وجه مثل ماانزلت انا موضوعين بالساحه وفيه من الاخوان اشادو بالموضوع ولكن الاخ الفضي يدخل ولايرد على هالموضوع (يمكن مااتعجبه مواضيعك ) يااخي حتى لو ماتعجبك قد تعجب الاخرين او تكون ذات اهميه في الطرح وتشجيع الاعضاء على الكتابه

يااخي الواحد ينبسط لاشاف موضوع له معلق ورازينه فوق ولااحد عنده ...--> كني مصختها
ارجو انك ماتزعل من النقد وتتقبله بصدر رحب ...

جينا للاخ اعدام
عاد انت كووم والمشرفين الباقين كوم ثاني

يااخي ماادري احس انك تمشي على عكس الدعايه اللي تقول نحن لاندعي التميز ولكننا الافضل

واعتقد بل اجزم انك تمشي على دعايه جديده من مزارعنا وهي تقول --(نحن لاندعي الفقر ولكن ماوراي الا الدجه )
الاخ اعدام حاط له بسطه ومتكي في قسم الملاهي والالعاب وكتبت قصتين مصرقعين ولاعمره رد علي ؟ ليه يااخي بيني وبينك شي ؟ طيب يااخي مفلس انت ؟؟ ماتعرف ترد على مواضيع مصرقعه ؟ وليه ناشبن عمرك وداخل قسم الصرقعه ؟؟

ياا اخ اعدام انا مااقول هالشي عشان بيني وبينك شي بل بالعكس حتى ماعمري صادفتك في موضوع ..بس يااخ اعدام ياليت تنتبه لقسمك وللمواضيع اللي فيه وياليت تكتب مواضيع .. والله ماعمري شفت مشرف مصرقع لاقيها غيرك انت ماعندك رصيد غير هالالعاب والموضوع اللي مشبصه بالساحه وكاتب فيه دستور الملتقى .. على فكره تراني انا اللي اقترحت يفرقون ساحة الالعاب عن قسم السوالف من حر مافيني اكتب موضوع اقعد عليه اسبوع اسبوعين واخرتها ينزل تحت والا القاه بالصفحه الثانيه عشان هالالعاب اللي مالها سنع ...ليه طيب ؟؟

شوف يا اعدام صدقني بالله انا ماا اقول هالشي الا من حبي للملتقى وحبي لتطويره .. يااخي فشيله كل يوم ادخل الملتقى من الدوام وربعي يقولون وهالمواضيع هي نفسها ماتحركت ..لايكون مافيه بطاريه بملتقاكم ؟ شفت عاد كيف

اماني العمر

والله ماعمري شفتك ولاعرفتك ولاعمري دخلت مطبخ الملتقلى الا هالحين عشان اشوف شلون ماشي

بس اعتقد دخلاتك قليله بعكس مواضيعك بالساحه كثيره وتكتبين وهذا شي طيب وبرضو ماعندها الا مسمارين مثبته فيهم موضوعين لها ... ولكن شي طيب ان مشرف الساحه يقوم باعماله على اكمل وجه وممكن يكون هناك تشجيع بعمل مسابقات بالطبخ او شي من هالقبيل للرقي بساحتك


ذكريات

بكل مكان تلاقيها وبعض مواضيع بساحة الجمال ماردت عليها وااعتقد نفس الحاله موضوعين مسمرين ومعلقين بساحتها نفس ماهم .... ولكن البنت متواجده اغلب الاوقات بالملتقى تحاول وتجتهد وهي من خيرة المشرفين بالساحه واقل شي انها تكون متواجده يوميا وترد على اغلب الساحات

رحال العمر

بصراحه وبدون مجامله هو يستحق نيل افضل مشرف بالملتقى
يااخي يكفيك مواضيعه اللي بساحته يكفيك هالمسامير اللي معلقه بساحته

يكفيك تشجيعه للاعضاء اللي بساحته
بس يعيبه انه يحط موضوع احيانا ولايرد عليه زي اللي حطه بساحة الصرقعه هع
وهالشي مايعيبه بل بالعكس الزود اللي عنده يغطي نقصه وعساك على القوه

صمت الجروح

قليل مااشاهدك بالشبكه

لكن دخلت على ساحتك عشان ابي انتقدك لقيت عال العال ومااقول الا الله يعطيك العافيه

بصراحه قسم القصص الهادفه قليل من يدخلها وقليل من يحبذ قرائة القصص لكن ممكن تجد طريقه مثلا كعمل مسابقه لكتابة قصه قصيره تتكون من موضوع القصه ومضمونها ونهايتها والعضو اللي ينسق الموضوع يفوز بالمسابقه وهكذا يتطور القسم

او تكتب احسن موضوع بالساحه ادخل هنا --> وتحط الاسماء اللي مشاركه بالمواضيع لتشد العضو لقسمك

وبصراحه مغطي قسمك على احسن مايكون

عاشق الجنان

تعجبني ثقافتك العلميه ولكن من يدخل قسم التعليم يلقاه مفلس ؟ اغلبه مواضيع لم يرد عليها احد واولهم انت ؟ يمكن هالعضو تقول مصخها معك بس وش تسوي مافي هالبلد الا هالولد ؟ يعني قسم التعليم يختص بمدارس العيون واخبارها والتعليم المدرسي والاختبارات والثقافه العامه واحوال الوزاره واخبارها ؟ هالشي هذا كله وينه ؟

عاشق الجنان اغلب مواضيعك تكون صور من تراث العيون واعتقد انت الاولى لنيل شرف قسم ملتقى التراث العيوني لما تملكه من رصيد في هالساحه ويعطيك العافيه على مجهودك الرائع وترانا صوتنا وخلصنا تصويت ولاشفنا الصور

ابوسلمان

يالشايب ماعمري دخلت وشفتك بالساحه لايكون حاط لك بسطه عند باب البيت وتبيع مساويك ؟

اخبار العيون هي نفسها ماتغيرت ومافيه شي جديد ؟ البلد يعيش في صمت ؟ مافيه مواضيع تخص الشارع العيوني ؟ ولا فيه اخبار عن البلديه ؟
انت تدري فيه موضوعين مكررين بساحتك وانت ولاتدري وش السالفه وكانو الموضوعين بنفس الوقت مع فارق التوقيت والمفروض انك تمسح موضوعي انا لان ستار نزل الموضوع قبلي ولا انتبهت له ؟
انت تدري ان فيه ناس مسافرين برى الديره ومايدرون عن الديره غير من الملتقى ؟ ويسالون مافيه احد مات احد تزوج احد تملك ؟ احد صار له حادث شي ماشيات كلش بلش خلش

العيون الفين وخمسه (السعدون)


ينقصك التواجد بالملتقى وماشفنا لك مواضيع كلش يااخي تحرك انت وياه شفيكم نايمين

القاضي

كنت شعله من النشاط اخبرك مدري وش اللي مخربك اكيد تعرف اعدام ؟؟ --> مسكين تولى الرجال

ترى على فكره دورة الكوكب خلصت من العام وجات دورات بعدها لايكون رسوم الاشتراك ماخلص بعد للحين ؟
اقول ورى مخلي ساحة دورة الكوكب للحين ورى ماتقرشعها وتشوف لنا دوره ثانيه ترى جت دورات كثيره بعدها

وثاني شي وين اخبار الدوري السعودي والاسباني والايطالي ..قسم الرياضه فقر ..مافيه شي جديد غير ان العيون خذو الكاس وبس

حرك ساحتك الله يعافيك

ابو طلال :سلامات مالك شووف

بصراحه انت شعله من النشاط وانا احبك زي انت ماتحبني غصبن عليك ...وياليت يكون الكنترول عندك احسن من كذا

العيون مدير الموقع
بالله كم مسمار موزعه على المشرفين ؟؟ وكم مدة العقد معهم ؟ طيب ماعندكم فيزا نجيب لكم مشرفين اجانب.. شكل السعوده ماوراها الا الكسل

ترى الملتقى مااحد يدري عنه ورى ماتسوون دعايه واعلانات عشان الكل يعرفه ؟
ورى ماتسوون مسابقات وبعدين ورى حاطين فوق موضوع مميز وعضو مميز ومشرف مميز ولا فيه احد من يوم دخلت بهالساحه ؟
ورى مافيه قسم خاص يكون متحف للمواضيع المميزه عشان تاخذ حقها ؟
وزعو القاب جديده للي يستحق ك قلم مميز .. قلم محترف .. كاتب يهبل .. كاتب مسطل --> هذا مش انا... شي من هالقبيل

تحركو اكثر ولاتغرزون فديتكم


اخيرا الا اعضاء الملتقى

وانتو بعد لاتناظروون ومبحلقين وكل واحد فاقن فمه وتحصل لسانه متدودل
انتو بعد ورى ماتكتبو مواضيع زي الناس واخص بالذكر هاللي داخلين الملتقى عشان الملاهي ؟ حبيبي ياللي تدخل قسم الملاهي عندك حبيبي لايكون ماعشت طفولتك على اكمل وجه ؟ لايكون داخل نت عشان تلعب وتطلع؟

يااخي لايشوفك اخوك الصغير والله تغدي مفتشل ويقول لك رح يالبزر رح العب بملاهي انت هع
ورى ماتكتبو مواضيع من خيالكم حتى اللي صارت معكم وانتو صغار ؟
اكتب مواضيع منقوله مافيها اشكال بس تعال ورد وياليت ماتكون مغبره ادري فقر




******************

الله يعطيكم العافيه ويساعدكم على جهودكم ولكن هل من مزيد ؟

يااخوان ثبتو مواضيع للتشجيع ترى العضو ينبسط وتنقز سنونه ويحاول يجيب موضوع احلى اذا تثبت له موضوع وصار مهم
يااخوان يامشرفين اكتبو موواضيع واعملو مسابقات تكون الجوائز فيها القاب مو لازم ماديه
يااخوان تواجدو اكثر بالساحه ..نبي نشوف اخضر واحمر وازرق ولمبات عرس

انا ماكتب اللي كتبته فوق الا من حر مافيني والله ولااحد يلومني
والله اني اشوف فيه اعضاء بالملتقى انهم يستحقون الاشراف رغما عن انف بطني
مثل اسيف الجزيره والمحروم وغيرهم
ولاتفكروني كتبت اللي كتبته عشان ابي يتثبت لي موضوع او اني ابي اصير مشرف لا والله

والله كل اللي كتبته ابيه يصحي بعض المشرفين ويكونون متواجدين والا كل واحد مايقدر وعنده ظروف يقول انا اعتذر وارشح واحد محلي والاداره يرجع لها الامر

انا واعوذ بالله من كلمة انا مااابي احد من المشرفين يحقد علي ويجيك طاير ويمسح هالموضوع ويكون متحمس والا يشيل بقلبه علي ويقول وش يبي هذا .. صحيح اني ماانعطى وجه لانك لو عطيتني وجه خذيته وخشيته عنك

اعذروني على مصالتي لكن من حبكم سويت هالشي وعادي قولو لاعاد نشوفك تكتب وابشرو باللي يرضيكم

توقيع سطل
نسخه الى الارشيف :o)"

[أبو طلال]

تحياتي لك وللمحروم اللي طبعا بيجي وبيقول اللي عنده

انا مع كلامك اللي قلت ياسطل
وانا بعد مع كلام المحروم اللي بيقوله

والاجازة هذه بيكون فيها كلاااااااااااام كثيييييييييير

وانا راجع اوضح اشياء اخرى لاحقا
الحين الوالدة تنادي عشان العشاء

[عاشق الجنان]

شكراً أخي سطل على نصائحك القيمة والنافعة وعلى جهدك الخارق في موضوعك هذا .. وأسال الله تعالى أن يجزيك عنا خير الجزاء على اهتمامك الغير مستغرب من ابن بار من أبناء العيون الطيبة أحسبك كذلك والله حسيبك ...
وأنا مستعد للإجابة على تساؤلاتك وبكل رحابة صدر :

يعني قسم التعليم يختص بمدارس العيون واخبارها والتعليم المدرسي والاختبارات والثقافه العامه واحوال الوزاره واخبارها ؟ هالشي هذا كله وينه ؟
لقد قمت بالتحدث لبعض منسوبي مدارس العيون إن كان لديكم أي خبر وأي حدث كان فعليكم بإخباري لكي أسلم لكم الكاميرا وتقوموا بتصوير هذه الأحداث وعلي أنا تضبيط الخبر والصور على الملتقى ورغم مضي فترة ليست بالقصيرة على ذلك إلا أنني لم أتلق إلا شيء بسيـط من ابتدائية تحفيظ القرآن
بحكم ظروف عملي كمعلم خارج العيون فإني ليس بمقدوري حضور هذه المناسبات ولابد من الجميع التعاون والتكاتف لخدمة ديننا أولاً ثم البلد... أما الأخبار العامة التعليمية فقد قمت بنقل حقيقة القليل منها وسوف ترى الكثير منها بإذن الله...
عاشق الجنان اغلب مواضيعك تكون صور من تراث العيون واعتقد انت الاولى لنيل شرف قسم ملتقى التراث العيوني
ياأخي ليست أغلب مواضيعي في التراث بل هي متنوعة .. والحقيقة أنني تحصلت على صور عيونية قديمة معدودة فأردت أن تطلعوا عليها ومعرفة تراث أجدادنا يرحمهم الله...

أخي سطل شكراً لك مرة أخرى على نقدك الهادف والبنّاء ...
وأتمنى صراحة أن تكثر منها !!

[ثبرالطرقىالوجاج]

اخى سطل لك منى تحياتى واعجابى
ولاتعليق لى على الموضوع الا ان اقول الله يعين

المواضيع ينتهى تاريخها ولامن مجيب ومحلها الارشيف تتم بالشهر بدون رد وفيه مواضيع ولاحتى ساعه الردود عليها حتى من قبل الاداره انا لااتهم الاداره بعدم الانصاف ولاكن اطلب من الاداره مرعاه ذالك على الاقل رد اعتبار للمشترك وكلمه شكر مقابل تعبه من الاداره او المشرفين او المراقبين على كلا ربنا يسهل

ويكتب الى فيه الخير والصالح ويوفق الملتقى لانه يحمل اسم العيون

وانت مشكور على ما كتبت اوفيت ولا قصرت والله معاك
ولا يزعلوا منى الاداره
شكرا سطل يا ابن البلد المخلص وهذا واضح من كتباتك يدل على غيرتك وحبك لبلدك واسمها من الضياع
استودعك الله تحياتى لك وللمحروم
سلام للجميع

[المحــــــروم]

اخوي سطل كفيت ووفيت وربي


وانا لي رجعه ان شاءالله

اثلجت صدري يالغالي وربي

مع تحياتي واشواقي
المحـــــــــروم


حجزززززززززززززززززززززززززز مقعد

[ابراهيم الشدي]

موضوع نقدي وهادف وموضوعي

الطرح ممتع ودعابي لا يزعج المتلقين وهذا أسلوب جيد للنقد في سبيل التطوير والنهوض في أي مجال


حتى المعنيين يقبلوه بكل ترحيب

وهذا رأي

شكرآ للأخ سطل وتحياتي لك

وتصبحون على خير

[المحــــــروم]

السلام عليكم ورحمة الله وبركاته

انا أسف على التأخير يالغالين لكن عذري معي اخواني اتمنى انكم تعذروني !!!

[line]

اخوي سطل

الله يعطيك الف مليون عافيه على هذا الجهد الذي يدل على ابداع الفكر وبالأصح الصدق في كيانك والشجاعه التي تملكها والقليل منا يمكلك هذه الصفه ...

انت اختصرت علينا الكثير من الجهد في أسلوبك الصادق وبنفس الوقت الذي يدل على صدق كاتبه ...
انت رسمت لنا لوحة رسام الذي عجز عنه الرسام رسمها ...
انت اهديتنا عبارات عجز عنه الشاعر في الوصف ..
انت ابدعت في العبارات ولذي عجز عنه الصحفي في كتابتها

** لالا تقول لي اني انا ابالغ لا وربي يالغالي ..
اكثر الأعضاء والمشرفين يقفون خلف الجدار والقليل الذي يواجه المشكله في موقف صادق والنيه الصافيه التي تدل على شخصية الكاتب يالغالي

سطل ...
انت شخص مرح و عندك علم مما يكفي ان ترد على ضعاف النفوس الذين يتصيدون على اقل حرف ويحاسبونك على اقل جهد منا ..

اسمح لي ان اقدم لك الشكر من اعماق قلبي يالغالي ....
لانك شخص اجتماعي و ذو شخصية متزنه واسلوب الفكري واضح وانت بعيد من كل المسافات عن التناقض و غيرها .. يالغالي سطل اتمنى لك التوفيق في حياتك اخوي وانا متاكد انك صاحب فكر وابداع وهذهـ الصفه لا تجتمع في شخص واحد عبثا ً لا يالغالي انت جمعتها في شخصيتك لانك صاحب تجارب وخبرات كثيرهـ

من حقي ان اعبر عن نفسي اخوي (( سطل ))
لا تحاسبني في هذا لان هذا الشي ليس بستطاعتي كتمانه اخوي ..

اتمنى ان اضيف على كلامك اخوي واتمنى جميع الاعضاء التفاعل ... لان هذا الشي راح يأتي بعده نتائج طيبه ومرضيه على ابناء العيون العيون اللي تربينا فيها العيون اللي عشنا فيها العيون اللي تكون لنا فخر وعزهـ

العيون هي الأم التي تحضن ابنائها العيون اللي نعيش من خيرهاااا ........

مهما اكتب في سطور ملتقى العيون ماراح اعطيها جزء من حقها ....

[line]

انا بكتب اللي في قلبي مثل قبل واكثر و هالمره راح اضيف بعض العتب على بعض اخواني واتمنى انكم محد ٍ ياخذ في خاطرهـ علي واذا تعديت حدودي ارجوكم نبهوني وانا مستعد اجيه الى مكانه واتأسف منه ....


العيون مدير الموقع
بعد السلام والتحيه الى صاحب العيون ...

كذا مرهـ أسألك كذا سؤال ولكن لا ارى الأجابه .. مدري هل هذا السؤال ليس في مكانه او الرد عليه مستحيل مثل اللي يقلون ( اذا حجة البقره على قرونها ) لان مستحيل تحج البقره على قرونها ..

اخويالعيون هذا الموقع صحيح انت اللي أسسته من جهدك وتعبك يالغالي لكن هذا لا يعني ان هذا الموقع صاحب لأحد لا وربي هذا الموقع صاحبه كل عيوني له غيره لبلدهـ ولدينه اللي تنور طريقه برضى الرحمن ومن ثم الوالدين
اخوي العيون انا لا اجد لك نشاط في هذا الملتقى يالغالي ولا اجد لك مشاركات تدل انك مدير هذا الموقع اخوي لمااااااااااااااااااااااااااااذا ؟

لا تقول لي مشغول او هدفك انك تأسس وخلاص انتهى مشواري لا حبيبي الله يرحم ولديك ويخليك لجدك وجدتك وعمك وعمتك وخالك وخالتك لا تكرر علينا اسطوانة الأجابه ..

ابي تواجه السؤال بكل شجاعه وتجاوبني بصدق وعلشان نطور الملتقى لازم اول شي نطور فيما انفسنا ومن ثم نطور الادارهـ ومن ثم المشرفين ومن ثم الأعضاء ..

ياخي تعال معي خلينا نبحث بصدق عن خلل فيما يختص انفسنا تعال وافتح معي صفحه جديده كلها اماني واهداف وانا وانت وهو وهي وهم ونحن نسعى في تحقيق هذهـ الأهداف ولو بشكل مرضي للجميع ..

انا لا اطلب منك اكثر من طاقتك لا وربي انا اطلب منك قد طاقتك لا اريد اكثر اخوي الغالي ...
وهديتك لنا هي انك تتواجد معنا وتبحث الحلول معنا في كل ما يتعلق في الملتقى من الاداره والمشرفين والأعضاء ..

يمكن اكون قسيت معك في العتاب لكن لابد ان نواجه المشكله بيد واحده وفي قلب واحد و تذكر اخوي الغزيز انك القدوه في هالملتقى ولكي نحقق اهداف الملتقى لابد ان تسعى معنا في تحقيقها ....

[line]

ابو طلال : المشرف العام للملتقى

بعد التحيه والتقدير اخوي ابو طلال ...

انا أمون عليك عزيزي ابو طلال وتذكر انك غالي على قلبي وربي يشهد علي وانا لا الومك لكن اعاتب فيما نفسي اسمح لي اعبر عنها ولو بحرفين يالغالي .... اتمنى انك تتحملني مثل ما تحملتني سابقا ً ..

قد فتحت مع الأعضاء نقاش بخصوص تطور الملتقى بدون اعتمادنا على الأدارهـ واعتقد اني ما اخطيت يوم جعلت الاداره خارج التنفيذ لان هذا الشي توقعته ان الاداره في وادي واهداف الملتقى في وادي .... لكن بعد النقاش الذي تم معك تغيرت نظرتي للادارهـ ولكن بعد فترهـ من النقاش لا ارى اي تغير سوى كذا عضو رجع للملتقى .. لكن هذا الشي لا يعني ان الادارهـ له مخطوطات مسبقه او تنظيم بشكل احترافي في تحقيق اهدافها ...
لكن انا أسأل نفسي كيف نسيت النشاط الذي تريده والادارهـ ليس لها نشاط .. ...
يمكن لازم اذكرك يومياً لكي تحقق المطلوب لكن ارجع واقول لك تذكر هذا الموضوع يمكن تذكرت فيما اقصد

اجتماع لجميع الأعضاء بسرعه تعالوا !!! (http://www.aloyun.com/vb/showthread.php?t=4273) ( ارعص على الموضوع )

سؤاللي لك يابو طلال ..

س / ماذا فعلت بعد هذا النقاش الطويل ؟؟؟

[line]

اسمح لي اخوي مدير الملتقى واسمح لي اخوي ابو طلال ...

علينا ان نذكر اهداف الملتقى من جديد ولكي تكون واضحه لدى الجميع ونسعى في تحقيها ...
وانا اطلب من اخواني الأعضاء جميعهم ان يذكروا لنا اهداف الملتقى (( يعني اي شي يتعلق في شؤون العيون )) نصيغها بصياغة الاهداف ونسعى في حقيقها ... علما ً ان كل سنة تتجدد الأهداف مع تطور مدينتنا الغاليه العيون
وانا ابدأ في وضع الأهداف اللي في راسي ( قبل ما تنقطع علي حبل افكاري )

1- عن مستشفيات العيون لابد ان نضع ذات صله بين المرضى والملتقى و المستشفى ومطالبة كل ما ينقص من كوادر اللازمه لعلاج المرضى ( اشياء كثيره ومع البحث المستمر نحصل على اشياء لم تكون في الحسبان )

2- بلدية العيون كذلك لازم نضع صلة بينا الادارة البلدية العيون والملتقى ( مع البحث المستمر نستطيع في تنفيذ مشاريع للعيون والتي نستطيع بعد مطالبة الدوائر الحكوميه والمراجعه جميع الدوائر في تنفيذ مطالبنا ولو ان جبرنا ان نضع شخص يهتم لهذه القضايا ولو كانت بالماده ( الأجره ) المهم ان ننفذ مخطوطات المسبقه للاداره )

3- كل ما يختص بالرياضة العيونيه اي نضع ( كذا عضو يجلب لنا الاخبار بالصوت والصورة والتقارير )

4- كل ما يتعلق بتراث العيون ( وهي مقابله للشيبانا ان يرون لنا الماضي بالصوت والصوره )

5- مقابلة مع المبدعين من الخطاطين و الرسامين والشعراء والمشايخه وكل شي يبرز ابداعه بالصوت والصوره ..

6- اقامة مسابقات في الملتقى بشكل شهري في كل شهر في قسم مسابقه .. وهذا الشي يتوقف على ميزانية الملتقى وانا مدري اذا كان هناك ميزانية للملتقى او لا .. اذا لا توجد ميزانية للملتقى علينا ان نبحث على طريقة في تأسيس هذه الميزانيه ... ( والطرق كثيره ومنها اقامة دورات نتشيطيه في الرياضه وذلك بدفع الرسوم اشتراكي وهذهـ الرسوم تكون من تبع ميزانية الملتقى للمسابقات وغيرها في تطوير الملتقى بتطور التقنيات الحديثه .. وفيه كذلك طريقة اخرى ان يكون هناك محل تجاري والأرباح تكون من نصيب ميزانية الملتقى .. والله في طعش طريقة بس نبي العزيمه )

والباقي اتركها للاعضاء والمشرفين والاداره

ملاحظه ........

نحصل على الحلول بعد النقاش ولكن في وقت التنفيذ ننسى الحلول ..
هذا الشي يذكرني بقول اليهودي عن العرب ( لعنة الله عليه ) عندما احد الصحافه تسأله وكان السؤال انت تتفق مع العرب في الصلح ثم ترجع وتنقض الصلح ووجب عليك العقوبه لكن نرى عكس ذلك لماذا .. قال هذا العرب كثير التفكير والكلام لكن كثير النسيان ... ( في بعض النص حجبة لانه يصعب علي كتابته لاني عربي من جد واب )

واسف للجميع على الاطاله

[line]

ابو طلال الله يسلمك يالغالي وربي انك عزيز وغالي اخوي ونقاش في القضيه لا تفسد الود ...
ولك مني اجمل الأمنيات اخوي الغالي

ثبرالطرقىالوجاج .. وربي اكن لك الاحترام والتقدير يالغالي واتمنى لك التوفيق والسداد يالغالي

سطل .. تشرفت بك اخوي ولي الفخر يالغالي وانت صاحب الأوله ..

مع تحياتي واشواقي
المحروم

[AL2o0y0u5n]

وعليكم السلام ورحمة الله وبركاته



اهلا يا اخي سطل


واشكرك على المبادرة الطيبة منك





العيون الفين وخمسه (السعدون)

ينقصك التواجد بالملتقى وماشفنا لك مواضيع كلش يااخي تحرك انت وياه شفيكم نايمين





انا اتواجد بين الحين والاخر


وان شاء الله يكون التواجد على طول



بس ابي اعرف

وش قصدك العيون الفين وخمسه (السعدون)

[ذكريات]

ذكريات

بكل مكان تلاقيها وبعض مواضيع بساحة الجمال ماردت عليها وااعتقد نفس الحاله موضوعين مسمرين ومعلقين بساحتها نفس ماهم .... ولكن البنت متواجده اغلب الاوقات بالملتقى تحاول وتجتهد وهي من خيرة المشرفين بالساحه واقل شي انها تكون متواجده يوميا وترد على اغلب الساحات



في البدايه اشكرك على المبادره في الكتابه وباالنسبه للتقصير انا احاول قد ماقدر اني مأقصر ومع ظروفي اتواجد اكثر وحده باالملتقى واحاول اسد النقص الموجود طبعآ في مشرفين كثير عندهم اعذار ومو ملزومين يكتبونه هنا في العام يكفي يبلغون الأدراره فيه واقصد اماني العمر 000

وباالنسبه للمواضيع اللي مأرد عليها يمكن هذي لك حق فيها لأني ابي ارجع لها وانساها وباالنسبه للمواضيع المسمره ومافي غيرها لأن مثل مأنت شايف مافي تفاعل في قسم الأناقه ولا في موضوع يستحق التثبيت الى الأن 000

طبعآ انت كتبت الصحيح وانا مأدري كتابتك عني ذم ام مدح 000

[الفضي99]

وعليكم السلام ورحمة الله وبركاته

أخي العزيز سطل

موضوعك مادري هل هو http://www.asmilies.com/smiliespic/sad/001.gif (http://www.asmilies.com) على حال الملتقى أو http://www.asmilies.com/smiliespic/happy/003.gif (http://www.asmilies.com) على اسلوبك في الكتابة .

أخي لقد أصبت في بعض الكلام ونحن نتقبل كل مايجول فيه خاطرك من نقد بناء وهادف يخدم المصلحة العامة للملتقى وسوف يكون لي رجعة بأذن الله للرد عليك بأسلوب حواري .......... جزاك الله خير على هذا الموضوع .

[صمت الجروح]

عليكم السلام ورحمة الله وبركاته

يعطيك العافيه اخوي سطل

مدري من وين ابدأ لكن اشوف ان كلامك وتقييمك يعني مو كله صحيح

بهذا الموضوع اللي كتبته نستطيع نتحاور وننهض بالملتقى بالمحاوره الجاده وعدم المجامله

طبعا انا اشوف في بعض كلامك مجامله وعندما تتكلم عن المشرفين والتقصير انا ارى اني انا اول واحد

مقصر وعندما تريد ان تصل لهدف لابد ان يكون هناك وعي ودرايه تامه انا ارى كلامك انه قراءه سريعه جدا

في الملتقى وما تأنيت فيها انا معك ان 70 % من كلامك صحيح وفيه تقصير واضح من المشرفين ولكن عندما تكتب

انت رأيك لابد يكون مجهودك واضح في الملتقى لكي يسمع نداءك وتعرف

وهذا مو تقصير بحقك لكن انت لك مجال معين في الملتقى ومالك تواجدفي جميع الاقسام

المقصود من الكلام انه فيه بعض الاعضاء يشارك في مجلس او اثنين ويقيم الجميع وهذا خطا

فكما هو مطلوب من المشرفين الاجتهاد والنشاط كذلك مطلوب من الاعضاء الاعزاء النشاط لان اليد الوحده ما تصفق

بالنسبه لملتقى القصص فكما قلت انت قليل من يدخله ويقرأ فيه فهو للقرأءه يكون دائما اما عن المسابقه اضمن لي ناس تكتب

وابشر فيها

عزيزي سطل ارجوا انك تأخذ كلامي من بدأ الحوار الهادف والبناء اللي من خلاله نستطيع النهوض بالملتقى الى الافضل

وفي النهايه اشكرك على هذا الموضوع الجريء

تقبل تحياتي

[لعيون دمعه]

مشكورر اخووي سطــل على الموضووع الرائـــــع


والي الامــــــــــــامـ دائمـــــــــــاً

[سطل]

باك

ماشاء الله فيه تواجد وتفاعل واعتقد لم تكتمل الردود

لكن بعقب على كل من دخل وله مني جزيل الشكر

بسم الله

ابوطلال يالله مير تحييه ...وبانتظار عودتك كالعاده -----> دايم يقول برجع اعقب ولا اشوف وجهه <--- ا شغاله تنسيه لاتلومه


انشاء الله تفضى يابوطلطل وتوضح لنا ماعندك وشاكر لك تعقيبك والسبق في الرد

[سطل]

عاشق الجنان
الله يعطيك العافيه على جهودك اللي تبذلها ....
وعذرك معك لكن هناك اشياء لابد من تطويرها بالقسم

مثلا ... لقاء مع مدير مدرسه.. مع مدرس ... مع موجه ..نبذه عن مدارس العيون ... يعني تكوين حلقات بالساحه ويكون فيها طرح اسئله ..انجازات المعلمين والمدراء والموجههين .. اخبار الوزاره والنقل ... حوادث المدارس .. وهذي بتكون سهله التواصل مع زملائك المعلمين او المدراء بصفتك زميل المهنه ... او مثلا اسئله مراجعه الاختبارات للثانويه العامه ...وهكذا لما في ذلك من جلب الانظار للملتقى (دعايه) ..وممكن ترشح كم طالب من كل مدرسه باسم الملتقى كمراسل للملتقى وفيها دعايه جميله وهالطالب طبعا يكون له تصريح بانه يعمل نشاط ثقافي بالمدرسه باسم الملتقى وهكذا ......

اما بالنسبه لموضوع الصور انا من اول المعجبين بما تملكه من تراث لمدينتنا وانا لست بضدك ولكن هذا وسام اعلقه لك لما تبذله من جهود في احياء التراث العيوني العريق
واشكر لك تفهمك وحسن الرد

[سطل]

ثبر الطرقي الوجاج

انا لن اعتب فيما قلت للاداره

يعني تبي الاداره بترد على كل المواضيع ؟
طيب وينك انت ماترد عليها ؟ ويني انا ماارد عليها ؟؟ وين الاعضاء مايردون ؟

مو كل شي نحمله الاداره في هالموضوع لا .. صحيح انا معك في كلامك ان العضو يتعب ولكن مامن تقدير ... في المواضيع الحساسه اللي تخص الصالح العام .. لكن مااقصد في كل المواضيع ...

اين انت من كتابة المواضيع .... سبق وان رأيت موضوعك عن اللعب القديمه بالعيون ولم تكملها ... لماذا ؟

انا من هنا اشد على ساعدك لكي تمتعنا بما فاضت به قريحتك وان نستمتع سويا برقي الملتقى الى اعلى المستويات واشكر لك حسن الاطراء وانا لم افعل شيئا يستحق الشكر لانه واجب علينا جميعا ذلك ...
ويعطيك العافيه على تعقيبك وردك ودمت بخير اخي

[سطل]

المحروووم

الله لايحرمك من والديك ولا من الجنه قولو امين ومن يقراء بعد

ماادري وش اقول لك بس حمرت خدودي من جد :)
فديتك والله
وانا عارف اللي في قلبك كله ... ومابين الاحباب غير العتاب وشي حلو انك تعتب على اصحابك بدون تجريح وهذا ماا فعلته انت وانا وكل عضو
وانا وانت وغيرنا من الاعضاء ماعتبنا على ادارتنا الكريمه الا حبا فيهم وفي ملتقانا وهذا شي طيب لما فيه من المحبه والموده


ااما بالنسبه لتواجد مدير الموقع في الملتقى فما ادراك يمكن هو متخفي باسم عضو لكي ياخذ حريته في التعبير كما يفعله الكثير من مدريري المواقع الكبيره .. وفيه منهم يدخل باسم مدير الموقع ويحمس الاعضاء سواء بترحيبهم او بمشاركتهم افراحهم واحزانهم او بكتابة او رد على مواضيع

لكن نقص تواجد الاداره ربما يكون في كتابة ماهو جديد في الساحه من مواضيع او مسابقات وربما كلفت تلك لمشرفين اخرين كـ ابو طلال او غيره


وجميل ماطرحته من اقتراحات وانا هذا اللي ودي به من الصبح احياء الساحات بمبدعين من خارج اسوار الملتقى لجذب اكبر عدد ممكن منهم في الساحه ولايهون الموجودين

المحروم لله درك .. قلم يمتلك كثير من الفكر الراقي والهادف وتسلم لي على ماخطت به يداك ولاعدمناك يالغالي

[سطل]

العيون الفين وخمسه -----> هذا اسم عضويتك على مااعتقد

السعدون -------> مدري ان كان هذا اسم عضويتك سابقا او لا بس اعتقد انك هو

وانشاء الله تواجد مع مواضيعك وابداعاتك تكون اكثر ودمت بخير يالغالي

[سطل]

ذكريات

في مشرفين كثير عندهم اعذار ومو ملزومين يكتبونه هنا في العام يكفي يبلغون الأدراره فيه واقصد اماني العمر 000

من المعلوم ان هناك قسم خاص بالمشرفين يتم الابلاغ عن مايدور داخل المنتديات وعن ااخبار المشرفين ولكن هنا نقطه انا اشرت اليها في الموضوع وهي الغياب وعدم الحضور من قبل مشرفي الساحات ... طيب لماذا لاتكون هناك جرأه من قبل المشرف بانه غير قادر على تكملة المشوار لما لديه من ظروف ....... وانتي قصدتي هنا اماني العمر كضرب مثال .. انا لم اقصد احد بذاته ... والاخت اماني العمر ارى انها تتواجد بين الحين والاخرى ولكن سؤالي هنا .. هل اماني العضور تدخل كعضو ام مشرفه ؟؟ وهنا نجد الفرق .. في التطوير والانشاء ووالبناء وبين الديكور والزخرفه -----> اتمنى ان تقرأي مابين السطور

ذكريات كلامي لك لم يكن مدحا ولا ذما لكي لا اكون متعاطفا مع احد دون الاخر ولكني اشيد على ماتقومين به من مجهود بقدر الاستطاعه ونتمنى المزيد ودمتي بخير

[سطل]

الفضي
أخي العزيز سطل

موضوعك مادري هل هو على حال الملتقى أو على اسلوبك في الكتابة .

انت وش تبيه يكون ؟
بس ماادري اكيد اسلوبي بالكتابه مايعجبك لكن يكفي انك تاخذ الزبده والخلاصه منه ان استطعت :)
والاسلوب بالكتابه لايعني شي بمضمون الموضوع ومافيه ...وكل واحد يمشي على الجنب اللي يريحه يادكتور

أخي لقد أصبت في بعض الكلام ونحن نتقبل كل مايجول فيه خاطرك من نقد بناء وهادف يخدم المصلحة العامة للملتقى وسوف يكون لي رجعة بأذن الله للرد عليك بأسلوب حواري .......... جزاك الله خير على هذا الموضوع

نحن قوم نخطيء والخطاء وارد بكل الاحوال .. وقد لا اعلم ماهو مخفي ... واتمنى ان تصحح مااخطأت به لكي نكون على بينة من امرنا ...فموضوعنا هنا للتوصل الى حل يرتقي به ملتقانا الى مانسعى وماتسعون اليه ...واكيد هذا هو اسلوب الحوار اللذي اردت التخاطب فيه

بالاخير قد نختلف باسلوب الحوار وهذا يعود على الكاتب ونعتبره شخصي وقد نختلف في الحوار لان هناك اطراف تتحاور وكل له وجهة نظر ونحترمها وبشده .. والشي الوحيد اللذي لن نختلف فيه اننا من كيان واحد وملتقى واحد يجمعنا بامنا مدينة العيون
وننتظر ماتبوح به لنا يااخ الفضي ودمت بخير

[سطل]

صمت الجروح
بالبدايه احييك على صراحتك المتناهيه
ولكن

طبعا انا اشوف في بعض كلامك مجامله وعندما تتكلم عن المشرفين والتقصير انا ارى اني انا اول واحد مقصر وعندما تريد ان تصل لهدف لابد ان يكون هناك وعي ودرايه تامه انا ارى كلامك انه قراءه سريعه جدا

اول شي اانا ماقد تصادفت انا وياك بموضوع ولا اعرفك الا يوم دخلت اشوف قسمك لاكتمال النقد على جميع المشرفين

وانا واعوذ بالله من كلمة انا اكتب القصص ولكن الساخره منها ...ولكن لم امتنع من قراءه القصص الهادفه وهالشي مو مجبور عليه اني ادخله لاني عضو وافضل عدد من الساحات الخاصه
لو كان هناك مايجذب في ساحتك انا اول الواصلين اليك ...

انت ذكرت انفا انك مقصر .. طيب هل جراءتك فقط تكون بالاعتراف ام باتخاذ القرار ؟؟
الخيار يعود اليك ... وانا افضل انه يكون اعترافا مع اتخاذ القرار بالتصحيح

اما عن اتخاذي القرار بنظره سريعه .. قد تكون صائبا وقد اكون انا الصائب من حيث مارأيته بساحتك .. والموجود يثبت تواجد بالمواضيع مع قلتها

واتمنى ان يكون اعترافك نقطة بداية للتحول نحو مانصبو اليه جميعا

احب اضيف حاجه

قد اكون مثل ماقلت سابقا انني لا اتواجد بجميع الساحات ولكن تواجدي بالملتقى لفترات طويله وردود المشرفين ومواضيعهم قد تعطيني نظره عن كل شخص

ويااخي يكفي اذا بتشوف الساحه ونشاطها اول ماتنظر اليه من هو مشرفها ؟ مثل ذلك ينطبق تماما في جميع المجالات العمليه والعلميه

عزيزي سطل ارجوا انك تأخذ كلامي من بدأ الحوار الهادف والبناء اللي من خلاله نستطيع النهوض بالملتقى الى الافضل

احييك مره اخرى على صراحتك واسلوبك الحواري الشيق بالكلام ودمت بخير

[AL2o0y0u5n]

غلطان يا طويل العمر



انا اسمي قبل


العـ05ــيــ20ــون

هذا هو اسمي سابقا

مش السعدون

[!~¤§¦ وهج الأمل ¦§¤~!]

<< تتأمل ان يتغير حال الملتقى بأسرع وقت
انا معك سطل

حتى حنا الأأعضاء لنا دور في الرقي بالملتقى
بتواجدنا في أغلب المواضيع ووضع آرائنا وشكرنا
وتعليقاتنا عليها
وبإثراء الملتقى بين الحين والآخر بالمواضيع الهادفه
واهم شي المتنوعه مره في العام ومره في الاسلامي
ومره هنا بالشكاوى >> عادي خذوا راحتكم بس في المهم
ومره هناك بالالعاب ...........
واهم شي نوعية ردودنا وأثرها

انا مقصره اكييييييييييييد في الملتقى وماراح اقول مشغوله لأني مشغوله صدق
بس هالعذر انشربت مويته وماباقي الا اللي مايبل الريق
لو نحب الملتقى من جد بنحاول نعطيه من وقتنا ولو ربع ساعه تزيده حركه ونشاط ..
ان شاء الله مستقبلا تظهر شهرزاد في أرجاء الملتقى بأكمله بس لا تملون منها

[صمت الجروح]

يعطيك العافيه سطل

اشكرك على مرونتك في الحديث

تعليقي انا ما اجبرك على دخول القصص او غيره ولكن اتكلم من مبدأ التقصير ومن فيه من الاعضاء او المشرفين غير مقصر

اما بالنسبه لقصص فهي ماتحتاج كثره او كميه فهو ادب محتاج للقرأه وليس للكثره والاغراق ..

وبعدين انا ابديت رأي شخصي مو علشان انك مدحتني او ابديت رأيك في ولم انظر في كلامك لشخصي انما نظره شامله

على العمووم ماودي اطول لكن عسى بكلامك ذا تكون بدايه للنهوض بهذا الملتقى

ودمتم بخير

تحياتي

[المحــــــروم]

اللهم آآآآآآآآآآآآآآآآآآآآآآآآآآآمين يارب العالمين ....

سطل الله يعطيك الف عافيه حبيبي من جد احرجتني يالغالي.....

لكن يالغالي تعال ابيك في كلمة راس ...


** بعد النقاش اخوي ممكن تشوف النتائج من الاداره فقط ( اي ماذا يفعلون بعد هذا الحوار هل نرى رد فعل واضح وصريح بنفس الوقت يالغالي )

انا وربي لا اضع الحمل على الاداره فقط لا وربي لكن انا اوضح واضع خطوط العريضه عن الملتقى واهدافه واساسه واهميته من الاعضاء والمشرفين والاداره ....

اذا مدير الموقع لا يتواجد بالشكل الرسمي ولا يظهر لنا في مثل هذه الحوارات ولا يناقش معنا الحلول ولا يشجع الأعضاء المبدعين ولا يعرف ما يدور في الملتقى من الخفايا الظلام وغيرها من خلف الجدران ماذا تكون هذه الاداره

تعال ياصاحبي نناقش عن امور الاداره واهميتها في فن التعامل


للاداره انواع واهمها او ابرزها هي

1- مدير تسلطي ( والتحدث عن هذا المدير اي يجعل من الاداره السلطه والتحكم وتنفيذ القرارات على العاملين اي قرارات صارمه ولا يتهاون في الرحمه او التسامح اي انه يجعل من ادارته في تحقيق اهداف مطلوبه منه وزياده والزياده هذه تكون من اهدافه الخاصه ... )

2- مدير تسيبي ( والتحدث عن هذا المدير اي انه مسير في قراراته ووالتهاون في جميع القضايا بدون اي هميه تذكر اي تحقق المطلوب والا ما تحقق الامر عنده عادي جدا ً ما عنده اي مشكله وهذا المدير يستقلونه ضعاف النفوس في تنفيذ قراراتهم على جميع العاملين المدير الله يسلمك ما يدري وين ربه حاطه ..)

3- مدير اجتماعي ( والتحدث عن المدير اي انه مدير مواقف يقدر العمل والعامل بنفس الوقت والمجهود والجهد وتقبل الأعذار المقبوله فكريا ً وعاطفيا ً والتسامح عن المقدره بدون اي ضرر للعمل وما شابه ذلك وهذا افضل المدراء ويكون ذا صله مع جميع العاملين من مرؤسين ورؤساء والعاملين وكل جهد وعمل له تقيمه الصحيح بدون اي ضرر للعمل ويشجع كل العاملين في عملهم وتحفيزهم بالجديد والفن في عمله واتقانه ... )

4- مدير مصلحه ( والتحدث عن هذا المدير هو انه يهتم عن العاملين اللي لديهم مصلحه معه او انه له صله قرابه للمدير او انه تكون معرفه سابقه والعاملين الباقين لا يذكر لهم وجود لانهم بعدين كل البعد عن التحفيز والتشجيع وغيرها من هذه الامور )

تعال يا صاحبي ادارة الملتقى ( تقدر تحدد لي اي نوع من هذه الانواع والمقصود به هو المدير وليس الطقم الاداره وبالأصح مافيه اداره لكن يوجد اداري واحد وهو ابو طلال فقط على حد علمي ...

وينبغي على المدير توزيع المهمات بشكل الصحيح في انجاز المشروع طوال السنه علما ً كل سنه تتجدد الاداره حسب القدرات المشرفين ....

لازم يا صاحبي تضع يدك بيدي ونضع جميع ايادي الاعضاء والمشرفين في انجاز الأهداف بشكل المطلوب والمرضي بدون اي فوضى او ضغوطات على شخص واحد ...

وابو طلال وربي كل المسؤليات على راسه يعني يجب علينا قبل ان نتهم اي مشرف او عضو او المدير لا بد ان نتحقق عن السبب في التقصير ويمكن علاج هذا السبب نستطيع اصلاح المركب من الغرق وهكذا تسير المركب وسط بحار الثقافه وتتخطى جميع الحواجز ...

انا اسف اذا تعديت حدودي ولكن هذا مافي نفسي

مع تحياتي واشواقي
المحروم

[الفضي99]

انت وش تبيه يكون ؟
بس ماادري اكيد اسلوبي بالكتابه مايعجبك لكن يكفي انك تاخذ الزبده والخلاصه منه ان استطعت :)
والاسلوب بالكتابه لايعني شي بمضمون الموضوع ومافيه ...وكل واحد يمشي على الجنب اللي يريحه يادكتور
[/size][/color]

أخي الفاضل سطل يعجبني اسلوبك الفكاهي في كتابة المواضيع بالعكس أشجع هذا الأسلوب الذي يضفي على المواضيع شيء من القبول والحلاوة لقراءته فهنيئاً لك أخي الكريم على هذه الموهبة القليل ممن يستخدمها في كتاباته .

بالنسبة لمحور الحديث ذكرت عدة نقاط وتوجيهات ونحن كمشرفين لهذا الصرح نتقبل هذه التوجيهات بصدر رحب وأن شاء الله تكون لنا نقاط قوة ودافعاً للأمام حيث انك امطرتنا بوابل من الكلمات اللاذعة ونسيت باقي الأعضاء لم تلتفت لهم ونحن معك الإدارة مقصرة والمشرفين مقصرين وكذلك الأعضاء مقصرين واذا لم نتكاتف جميعا للنهوض بهذا الملتقى فلن نستطيع إكمال المسيرة ومثل ما اضاف أخي العزيز المحروم عدة نقاط مهمة ولكن مالفائدة اذا لم تكن هناك نتيجة .

يعطيك العافيه أخي سطل على موضوعك ودمت بخير .

[سطل]

ياعيني ياعيني

والله ياليت هالفكر اللي عندكم يكون موجود بالمواضيع الثانيه مثل ماهو موجوود هنا

والله فيه عقليه من الاعضاء تفوق الخيال لكن يبي من يحركها ( جيب ملعقه هاهااي )...
فيه فكر ناضج .. حتى في الرد تقف وقفة احترام وتقدير .. فيه تفاهم ..وفيه احترام ... وفيه اعتراف

كل هذا وجدته ووجدتموه انتم من حيث الردود هنا وهناك واخص بالذكر هنا للترافع عن انفسهم ... فياليت هذا يكون بجميع الساحات

ونرجع الان للردود

شهرزاد..
اعترافك بالتقصير جميل مع كونك عضوه جديده بالملتقى ... ولكن بعض الردود يبقى لها صداها وبعض المواضيع تبقى لها هيبتها وفخامتها من حيث الاثر والكفر والنضوج العقلي .....

فا اجد ان عضو يكتب موضوع فعال وله اثر في اسبوع احسن من عضو يكون متواجد كل يوم في ساحة الالعاب ولاهو باللي يفيد ولا هو باللي يستفيد ..

ويعطيك العافيه على تعقيبك اللي يوسع الصدر وننتظر مواضيع منك شبيهه بردودك الفعاله

صمت الجروح

اشكرك على تقبلك الرد بروح مرنه وتفهمك للموضوع ونظرتك بالرد بصوره شامله بعيده كل البعد عن الانانيه

وهذا يدل على روحك الطيبه واتمنى ان تكون هذه بداية الانطلاقه للنهوض بالملتقى الى اعلى المراتب

وشكرا لك من الاعماق

المحروم
يااخي وياصديقي

ارجو ان لاتتشعب بالموضوع الى شعب (مال امها داعي )
احنا هنا نبي نحل مشكله مو القصد منها تفخيمها .... انت جريئ بمافيه الكفايه لكي تتحدث ... ولكن هناك حدود اتمنى منك عدم الخروج عنها .. نحن هنا نحل ونوجد الحلول وليس نعتب (ونشتره) على الاداره بما يخص (الكنترول) ...

فانت اجعل من نفسك حلا لهذه المشكله ... وليس بالقاء كل اللوم على الاداره واليد الوحده ماتصفق يابعدي
شكرا لك على حرصك .. شكرا لك على صراحتك .. شكرا لك تعقيبك .. شكرا لك على جرئتك

الفضي

اعجابك انما هو وسام اضعه على صدري واشكرك على هذه الاطراء

وانا لم القي اللوم على جميع الاعضاء والقيته على كاهل الاداره من مشرفين

لاننا اتجهنا للاساس فاذا صلح الاساس صلح باقي الجسد ...
هذا ينطبق في جميع المجالات كالنادي ومدى نشاط الاداره واعضاءها ... نتيجته تكون على اللاعبين والنشاطات الرياضيه

ومثله على المدارس وغيرها الكثير

لانقول ان الاعضاء غير مقصرين ... ( االا مقصرين ونص ) ولكن تكون الانطلاقه منكم ثم منا


رساله الى الاداره والمشرفين والاعضاء
انشرو اسم الملتقى بكل مكان .. بالمدارس .. بالعمل .. بالنادي .. بالمحلات ..الخ

فمثلا يكون هناك صفقة عمل بين الملتقى واسم مطعم مشهور بالعيون .. عمل دعايه للمطعم مقابل دعايه للملتقى بالمطعم ويكون اسم الملتقى موجود بالفاتوره ومعلق بالمطعم نفسه لكي يتسنى للجميع معرفته ... وهذه قد تكون حلت مشكله كبيره في انتشار اسم المنتدى

شكر للجميع وتقبلو مني خالص الود والاحترام

[hالقاضيS]

السلام عليكم ....

الله يعطيك الف عافيه اخوي سطل على انتقادك

الذي اتقبل بصدر رحب واتمنى من كل قلبي

انك لا تتوقف على الانتقادات التي تصب اولاَ

في مصلحتنا .............................

اما عن الانتقاد الاول :- اخوي سطل

انا ماعندي الصلاحيه كي احذف قسم

احذف موضوع صح

اعدل في موضوع صح

اثبت موضوع صح

لكن احذف قسم لااقدر ، يمكن توجهها الى

اخي ابوطلال والا اخي العيون ........

واما عن انتقادك الثاني :-.

نعم اقول انني قصرت كثيراً

لكن انت لاتدري عن الظروف التي امربها

واوعدك باذن الله انني سوف ابذل قصارى جهدي

بعد ماتنتهي الظروف .................................

شاكر لك ومقدر حسن تعاونك معي ......

[أعــــدام]

يعطيك ألف ألف عافيه ياأخوي سطل
لسببين :
1- على الموضوع الرائع والاكثر من رائع والحاد في نفس الوقت.

2- أنك حطيتني الثاني في الترتيب.

وسبب غيابي وتأخيري في الرد على الموضوع هو

الوالد لاني انا اللي ماسك شغل الوالد كله ، ولولا ظروفي وكل

أشغال الوالد اللي انا مسؤول عنها في هذه الفتره ولولا سرية النك كان علمتك بالاشغال .

ولا تحاسبنا أنت وزملائك على فتره قصرنا فيها

والحين بنبدأ التعليق على كلامك:

يا أخ سطل مثل ماتفضلت برد عليك بقولك ( كلاًَ يدلي بدلوه)


1- على قولتك اذا انا( كوم وباقي المشرفين كوم ثاني ) فهذا ولله الحمد لاني احب

تكون لي شخصيتي المستقله.

ـــــــــــــــــــــــــــــــــــــــــــــ

2- اما بالنسبه لمثل (نحن لاندعي الفقر ولكن ماوراي الا الدجه).

أنت على قولت بذا المثل أني ماوراي الا الدجه ، انت وش تعرف عن الملتقى في بدايته وش

تعرف كيف الأداره وانا وباقي المشرفين اللي انت توك جاي الملتقى عضو جديد وتعلمهم اخطائهم أحنا اللي مو

عاجبينك ولا يهينون باقي الاعضاء حنا اللي اسسنا الملتقى يا..أخ سطل.

ــــــــــــــــــــــــــــــــــــــــــــــــــ

3ـ أما بالنسبه للبسطه (اللي أنت ناشبنا عليها ) اللي مبسط فيها بملتقى الملاهي والالعاب

أكيد ببسط لأن(كل راعٍ مسؤول عن رعيته ) وبالنسبه لي (

أنا قسمي مثل ولدي

يعني بالله عليك بكون مسؤول كل المسؤوليه عن ولدي واولاد غيري ماأختلفنا أكون مسؤول عن اولاد

غيري بس مو أبديهم على أولادي )

أقصد أني ماراح أبدي بقية الاقسام على قسمي .

ــــــــــــــــــــــــــــــــــــــــــــــــــ ــ

4- أما بالنسبه لـ ( وليه ناشبن عمرك وداخل قسم الصرقعه ؟؟ )

ماقلتلك أن قسمي مثل ولدي والله رزقني اياه أقول لا.

ولا وش رايك

ـــــــــــــــــــــــــــــــــــــــــــــــــ

5- أما بالنسبه لـ ( والله ماعمري شفت مشرف مصرقع لاقيها غيرك انت ماعندك رصيد غير

هالالعاب والموضوع اللي مشبصه بالساحه وكاتب فيه دستور الملتقى .. )

يا أخ سطل يعني نقول الرازق في السماء والحاسد

في الارض .
ـــــــــــــــــــــــــــــــــــــــــــــــ

6- وبالنسبه لاقتراحك والله تشكر عليه .

وعموما ياسطل مثل ما وضح أخوي صمت الجروح

أذا(أنا مقصر وعندما تريد ان تصل لهدف لابد ان يكون هناك وعي ودرايه تامه و انا ارى أن

كلامك انه قراءه

سريعه جدا في الملتقى وما تأنيت فيها و انا معك ان 70 % من كلامك صحيح وفيه تقصير واضح من المشرفين

( وهذه اضافه من أعدام : وانا منهم ) ولكن عندما تكتب انت رأيك لابد يكون مجهودك

واضح في الملتقى لكي يسمع نداءك )

وكما قال المثل ( الشجره المثمره هي من يكثر عليها الرمايه)

ودي اعطيك نصيحه لله

***************

تذكر دائما ثلاث :

تحب ـ تضحي ـ تسامح . وأتمنى انك تكون كذا .

وحاسب من ثلاثه :

تجرح ـ تكره ـ تخون. أتمنى انك ماتجرح ولا تكره ولا تخون.

ولا تصاحب ثلاثه :

متكبر ـ خاين ـ جاهل . وان شاء الله انت بعيد عنهم .

وأعطي الناس ثلاثه :

المحبه ـ الوفاء ـ الاخلاص . وهذا اللي انا ارجيه منك .

***************

وعموماً يا أخ سطل

أتمنى اني أنا وكلامي نكون خفيفين الظل عليك

ومثل ماوضحت أنت بنفسك

( بدوون زعل)

ولك خالص حبي وأحترامي وتقديري

تحياتي

[سطل]

القاضي

يعطيك العافيه على روحك الرياضيه وتقبلك للنقد بصدر رحب واعترافك بالتقصير شي مذهل
لكن
بالنسبه للحذف بامكانك الاقتراح على الاداره بصفتك عضو من اعضائها بحذف قسم دورة الكوكب او استبدالها بشي جديد على الساحه وهذا حق من حقوقك
وبالنسبه للتقصير كلنا مقصرين لكن (مو لهالدرجه) .. القسم يفتقر الى اخبار الساحه الرياضيه السعوديه والعربيه والعالميه من بطولات ونتائج وغيرها ........ وانا مستعد اجيب لك عضو يساعدك بهالشي ولكن نبي منك بذل المجهود والله يقويك

[سطل]

اعدام (ماقلت لك انك كلام ثاني )
لكن عجبتني حركة التلوين :*)

كلامك كله مردود عليك وانت مغالط نفسك بكل شي قلته ومثل ماقلنا بدون زعل

خلني اول شي ابين لك وش الغلط اللي انت قلته ومردود عليك
7
7
انت وش تعرف عن الملتقى في بدايته وش

تعرف كيف الأداره وانا وباقي المشرفين اللي انت توك جاي الملتقى عضو جديد وتعلمهم اخطائهم أحنا اللي مو

عاجبينك ولا يهينون باقي الاعضاء حنا اللي اسسنا الملتقى يا..أخ سطل.

ههههههههههههههههه يااخي شوف رقم عضويتي وشوف رقم عضويتك واترك الحكم للجمهور ... وبعدين مافيه شي اسمه عضو جديد او قديم الا بالعطاء ... وبعدين على قولتك انا مااعلم احد اخطائه لكن هذا يسمى انتقاد ويمكن انت ماامر عليك هالشي او ماعمرك سمعت به يامؤسس

أنا قسمي مثل ولدي

يعني بالله عليك بكون مسؤول كل المسؤوليه عن ولدي واولاد غيري ماأختلفنا أكون مسؤول عن اولاد

غيري بس مو أبديهم على أولادي )

أقصد أني
ماراح أبدي بقية الاقسام على قسمي
والله ليتك ماقلتها ...

يااخي انت تغالط نفسك والا تعاندها ؟؟ ..... ترى اللي يداري قسمه ويراعيه يراعي اللي فيه ويرد على المواضيع المهمه وحتى الطويله مثل ماتفضلت (اانا ) وكتبت اكثر من موضوع وحضرتك ولارديت ولا ابي اذكرك بشي مضى .... على العموم اتمنى انك ماتقصر يا ابو الصرقعه

يا أخ سطل يعني نقول الرازق في السماء والحاسد

في الارض .
مدري وش دخل المثل هذا في ردك علي ؟؟ او انك ماخذ مقلب ؟؟.. يااخي اقول لك عن المواضيع المشبصه يعني المثبته ماعمري شفت ساحه صرقعه مافيها مواضيع مثبته غير هالموضوع اللي فيه دستور الساحه تقل مسمار جحا .... انا اقول لك طور ساحتك لانها فقرااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااانه ... وبصراحه هالملاهي هي اللي تمشي سوقها ومافيه شي مفيد


وعموما ياسطل مثل ما وضح أخوي صمت الجروح

أذا(أنا مقصر وعندما تريد ان تصل لهدف لابد ان يكون هناك وعي ودرايه تامه و انا ارى أن

كلامك انه قراءه

سريعه جدا في الملتقى وما تأنيت فيها و انا معك ان 70 % من كلامك صحيح وفيه تقصير واضح من المشرفين

شوف انا قرائتي سريعه للساحات اللي ماا انتمي لها اما قسم الصرقعه فهو انتمائي الاول للاسف .... ونظرتي لهالقسم عن كثب وعن درايه (بعد للاسف ).. وساحتك تختلف عن ماقاله صمت الجروح وطيب انك قريت جميع الردود عشان تستند لشي

( وهذه اضافه من أعدام : وانا منهم ) ولكن عندما تكتب انت رأيك لابد يكون مجهودك

واضح في الملتقى لكي يسمع نداءك )

يعني تبيني اصارخ ؟

شكلك والله انت اللي توك جديد او انت مثل السمكه ماتطلع من ساحتك .... انصحك( تاشر على (اسمي) وتشوف مشاهدة جميع مواضيعي) ..

هههههههههههههه قال ايش قال مجهودك بالملتقلى

يااخي للاسف كلامك يخلي الواحد يطلع من طوره ووده يدلو بدلاديله مو دلوه ... وترى الخافي اعظم

ليتك معترف بخطئك مثل الاخرين وانهم ودهم يبذلون المزيد ويتقبلون الانتقاد بصدر رحب

بس شكلك والله اعلم تبي بالقوه تصير غير ... بس يالله عسى الله يقويك وتصير فتوة الشله

وشكرا على نصايحك اللي مادري وش تبي بالموضوع ومدري وش دخلها هنا اساسا ... وياليتك تطبقها على نفسك قبل لاتصرفها على الاخرين ... (ماعندك حبوب بندول )

وياليت في المره المقبله ماتستعجل وترد علي الا وانت مستند بشي او بدليل عشان يكون عندك حجه قويه لاني انا مااقول شي الا وعندي لكل شي (شي مقابل) ....... ونشوفك انشاء الله في مواضيعك الجديده بالصرقعه ياراعينا :)

السموحه على قطة الميانه لكن طلعت لاشعوريا هع

[العــ روح ــيون]

الظاهر الموضوع دخل في الزعلوانتم كاتبين بدون زعل
ومن الحكمه والمصلحه العامه بالملتقى
ان الاداره تحاول تهدئة الموضوع او وقفه

سلامي .....

[أعــــدام]

عموما شكرا على النصيحه وجزاك الله خير

ياأخ سطل

عموما

ترى هذا الكلام مو قصة فتونه او غيره

القصه ومافيها اني أحب أشعلل المواضيع

أما بالنسبه للفتونه فهي عندك مو عندي لانك انت اللي جيت وقلت انتو وانتو .... والى آخره

وأما بالنسبه لرقم عضويتك فمن السهوله اني أسجل وأحط رجلي

أما أنا صدق سجلت متأخر بس ماأهملت

وبالنسبه للتثبيت المواضيع ترى ماأحد جاء من بطن امه عالم

وبعدين حاول تمسك العصا من النصف اذا بغيت تضرب

ياأخ سطل

وعلى قول المثل اللي من مزارعنا ( كلٍ يشق جيبه ويشوف عيبه )

والي عنده شي ينفع فيه الملتقى بدون اهانه يقوله.

والي يقول بأسلوبك ياسطل لايقول أحسن .

واذا بغيت تقول شي تنبه فيه المشرف او العضو عندك الرسائل الخاصه

اتوقع ان حنا مالغيناها

وكفايه لان بصراحه طفح الكيل يافاهم

ولكم خالص حبي وأحترامي

تحياتي

[سطل]

رووح العيون حبيبي لا لا ماهناش زعل ولاحاقه ايه ده وتسلم لي على مداخلتك ياجعلني مااذوق حزنك

**********

نرجع حق فتوة الشله

يااخي شفيك معصب ... معليش يمكن اسلوبي ماجاز لك بس وش اسوي انا انسان عفوي وصريح بنفس الوقت الكلمه اللي بقلبي على لساني


نرجع لردك

ترى هذا الكلام مو قصة فتونه او غيره

القصه ومافيها اني أحب أشعلل المواضيع

أما بالنسبه للفتونه فهي عندك مو عندي لانك انت اللي جيت وقلت انتو وانتو .... والى آخره

احد جاب طاري الفتنه ؟ (الفتونه على قولتك) ... وبعدين وش اللي تشعل الموضوع حضرتك ؟

يااخي كل شي لازم تاخذه بالمنطق ... والمنطق انك تقنعني بمثال خارجي ينطبق على ماانت وانا عليه

بعدين يوم اقول انتو وانتو مو معناها اني بقصر بحقكم ... اعتقد كلهم فهمو المعنى الا انت اخذتها من زاويه وحده وهي بشكل الموضوع وابتعدت عن المضمون ..


وأما بالنسبه لرقم عضويتك فمن السهوله اني أسجل وأحط رجلي

أما أنا صدق سجلت متأخر بس ماأهملت

ماكان ودي اعترف لكن الحين بعترف لك على الحقيقه
انا يوم سجلت هنا كنت متحمس وكتبت موضوع من عرقي وشقاي ---> متعوب عليها ... واخر شي اشوف الموضوع بالصفحه الثانيه ..طيب ليه ؟؟ الاخ مشرف الساحه اللي هو (انت) منزل مواضيع العاب جديده وراد عليهم كلهم الا موضوع متعوب عليه ولاشكر ولاشي ... وبصراحه بعدها انسدت نفسي وطلعت وكان تسجيلي المبكر حجز موقع وترى المعنى مو في كثرة مواضيع العضو وتحقيق رقم قياسي .. المعنى الحقيقي هي جودة مواضيع العضو ومدى اثرها على المنتدى ككل ... وشهادة كبار كتاب المنتدى لي لهو فخر اعتز به وعلى راسهم مدير الموقع ..

وبالنسبه للتثبيت المواضيع ترى ماأحد جاء من بطن امه عالم

وبعدين حاول تمسك العصا من النصف اذا بغيت تضرب

انت مجتهد كثير بكتابة الامثله لكن للاسف كل امثلتك مو في محلها لاني برد عليك بالمثل عشان تقتنع
فيه مثل يقول ( الله ماشفناه بس بالعقل عرفناه )
يعني المثال اللي انت تقول فيه (مااحد انولد من بطن امه عالم ) البته البته ماينطبق على تثبيت المواضيع لان الشي هذا مايحتاج لعلم ولا لدرايه ولكن يحتاج الى مدى قياس المشرف وتحكمه على زمام الامور ... ومعرفته للاولويه بالمواضيع ومدى اهميتها وتاثيرها على باقي الاعضاء .. وهذا يحتاج الى الخبره ولا يحتاج الى العلم على حد قولك يا اخ اعدام

وعلى قول المثل اللي من مزارعنا ( كلٍ يشق جيبه ويشوف عيبه )

والي عنده شي ينفع فيه الملتقى بدون اهانه يقوله.
والي يقول بأسلوبك ياسطل لايقول أحسن .

هههههههههههههههههههه والله عجبني هالمثل
وبالعكس انا احترم وجهة النظر ... وشي طيب اذا واحد لقى عيب فيني وقال لي عنه احسن من اني اتمادى بالشي واقع في شي لايحمد عقباه وبالاخير اخسر كل شي .... وانا بالعكس مااهنت احد ولا اشوف اني اهنت احد انا اخاطب مشرف ساحة الصرقعه والسوالف ..واللي المفروض انه يكون موسع صدره وخاطره للاخر وحتى في ردوده يكون وسيع بال ومبسوط ويطبع على كتاباته روح الدعابه والمرح وهذا شي للاسف وبكل صراحه ولاتزعل مني لا اجده فيك البته ( لاتزعل من صراحتي ) ترى انا كذا وبتم كذا

واذا بغيت تقول شي تنبه فيه المشرف او العضو عندك الرسائل الخاصه

اتوقع ان حنا مالغيناها

والله انا اتوقع اني كاتب موضوع بدون زعل ياادارة الملتقى والكلام موجه للاداره ككل مو مخصص احد معين بما فيهم مدير الموقع وهذا الموضوع للتصليح والتطوير لا للتحيز والمجاامله واتوقع كان لها الموضوع اثره في تغيير حال المنتدى واذا انت ماشفته فا انا شفته وغيري شافه وهذا شي ملموس وهذا ليس بمدح لذاتي لا والله ... وانما لهو فخر لي ان تكون من هنا نقطة البداية ....

وعسى تكوون روحك مرحه في الرد على المواضيع

[أعــــدام]

اولا وبصراحه صدقني اللي يخليني أكمل معك هو سبب واحد

وهو ان اسلوبك شيق جداجداجدا

وبعدين ياعزيز الغالي اقرأ بتمعن

أقصد كلمتك ( أحد جاب طاري الفتنه ) أنا يوم اقولك فتونه موقصدي فتنه قصدي ( فتوة = فتونه ) ذي صفه وذيك بعد صفه

فهمتني .

وبالنسبه لموضوعك اللي أنت تعبت فيه صدقني ممكن تكون انت كتبته وانا مازلت عضو او ممكن تكون كتبته وانا سهيت عنه

وبعدين انا في النهايه انسان يعني اخطأ انسى اسهى المفروض أنك تنبهني تعلمني مو على طول تهاجمني .

وبالنسبه لفقداني روح الدعابه والله كلامك يخلي الواحد يطلع من طوره بس يله تمون لانك عضو بالملتقى .

وبالنسبه لتثبيت المواضيع أنا أعترف في بدايت نشاطي بالملتقى كنت لك عليه شوي وأنا يوم أني اقولك المثل ( ماأحد خرج

من بطن امه عالم ) معناتها اني ماكنت اميز المواضيع صح، لان ملتقى العيون الاول بالنسبه لي .

وعموما ياأخ سطل اذا تبي تصير مشرف الصرقعه انا ماعندي مانع

واذا انت تشوف ان نشاطي ضعيف اوكي انا مستعد اعطيك البسورد وانت ادخل باسمي لمدة ساعتين يوميا

وخلينا نشوف نشاطك

وعموما لاتاخذ في خاطرك علي وانا اعلنها امام الملا :

وأتقدم باأسفي وأعتذاري .

لاني بصراحه أكثر من كذا ماأقدر

<<< خايف يصير زعل بيني وبينك .

ولك خالص حبي وأحترامي

تحياتي

[سطل]

عموما يعطيك العافيه يااخ اعدام والله يقويك انشاء الله والظاهر اننا مانبي نخرج خارج الموضوع

واهم شي كل واحد يعرف دوره ويغطي خانته وصحتين عليك ياغالي وماصار الا الخير

[المحــــــروم]

سطل : أسف على التاخير اقصد التعقيب لكن وربي عندي اختبارات وهي السبب في الأنقطاع عن النت يالغالي

يالغالي انا لا اشعب المواضيع عزيزي سطل لكن ارد ان اصل الى حل يقنع الجميع اخوي سطل

وانا امد لك أيدي و تعال امسكها وخلنا نبحث عن الجديد الأجازهـ على الأبواب ونبي نشاط جديد لكل عضو ومشرف

وانا ان شاءالله اخلص من الأختبارات في نهاية الأسبوع القادم ولي رجعه كلها حماس ونشاط جديد ...

مع تحياتي واشواقي
المحــــــــــروم


ملاحظه /

سطل عزيزي انت شخص متفهم وشخص تعرف معنى الحروف اقصد ماخلف الجمل ...
اتمنى اشوفك على خير وفي صحه وسعاده
لا تنسى دعواتك يالغالي

[شَ ـآعُ ـٌر ٍ مُـً ِش‘ـًآعٌ َـْر ِ]

ووووووال وال وال وش صاير كل هالدخان والعفسه الي على باب هالقسم

كله من هذا الموضوع ليش طيب؟؟

اول شي
سطل انت غلطان لانك مادعيتني في الموضوع هذا واسامينا تتقارب

ثاني شي مو من حق اي واحد هنا يزعل
فهمتوا لان كل الي قاله وربي عين الصواب وطريقته احلى شي

والله لو انا كاتب هالموضوع كان سويت نفس اسلوبه يمكن انتوا ماتفهمون هالاسلوب لكنه اسلوب
فكاهه ومرررح وبعدين على الامثال كلها عن طريق المزح ويبي يخلي الموضوع فيه ضحكه شوي
وبعدين يا اعدام انت مشرف الصرقعه يعني لازم تكون مصرقع مع اني ماشوفك مصرقع
بس الشكوى لله
اخوي سطل وربي موضوعك ماعليه كلام والي يزعل يزعل
ويمكن انا اكثر واحد معني هنا لاني ما ادخل الا قسسسم الصرقعه بسسسس

وهذا مايخليني عضو كامل هنا لازم اني ارد بكل المواضيييع

ومالزعل داعي ترااا
هذا كل الي عندي

ملاحظه

(( سطل اذا بس لقيت احد مقصر قلي بس وانا اساعدك في موضوع جهنمي ههههه ))

يالله سييو يالزعوليييييييييين

[بايعها ومخلص]

جينا للاخ اعدام
عاد انت كووم والمشرفين الباقين كوم ثاني

يااخي ماادري احس انك تمشي على عكس الدعايه اللي تقول نحن لاندعي التميز ولكننا الافضل

واعتقد بل اجزم انك تمشي على دعايه جديده من مزارعنا وهي تقول --(نحن لاندعي الفقر ولكن ماوراي الا الدجه )
الاخ اعدام حاط له بسطه ومتكي في قسم الملاهي والالعاب وكتبت قصتين مصرقعين ولاعمره رد علي ؟ ليه يااخي بيني وبينك شي ؟ طيب يااخي مفلس انت ؟؟ ماتعرف ترد على مواضيع مصرقعه ؟ وليه ناشبن عمرك وداخل قسم الصرقعه ؟؟

ياا اخ اعدام انا مااقول هالشي عشان بيني وبينك شي بل بالعكس حتى ماعمري صادفتك في موضوع ..بس يااخ اعدام ياليت تنتبه لقسمك وللمواضيع اللي فيه وياليت تكتب مواضيع .. والله ماعمري شفت مشرف مصرقع لاقيها غيرك انت ماعندك رصيد غير هالالعاب والموضوع اللي مشبصه بالساحه وكاتب فيه دستور الملتقى .. على فكره تراني انا اللي اقترحت يفرقون ساحة الالعاب عن قسم السوالف من حر مافيني اكتب موضوع اقعد عليه اسبوع اسبوعين واخرتها ينزل تحت والا القاه بالصفحه الثانيه عشان هالالعاب اللي مالها سنع ...ليه طيب ؟؟

شوف يا اعدام صدقني بالله انا ماا اقول هالشي الا من حبي للملتقى وحبي لتطويره .. يااخي فشيله كل يوم ادخل الملتقى من الدوام وربعي يقولون وهالمواضيع هي نفسها ماتحركت ..لايكون مافيه بطاريه بملتقاكم ؟ شفت عاد كيف

توقيع سطل
نسخه الى الارشيف :o)"


ياخي وش ذنب اعدام ومن معة اللي مسوي عليهم انت فاهم

والله انهم ابرك منك ومن مواضيعك المسروقة