من أمتع ما يمكن أن تقرأه طبعاً رباعيات عمنا صلاح جاهين

[ابراهيم الشدي]

تعليق الوميل المرسل


..:: مختارات من رباعيات صلاح جاهين ::..
طبعاً رباعيات عمنا صلاح جاهين
من أمتع ما يمكن أنا تقرأه

.
.
.
احترت ماذا أكتب .. كلهم أحلى من بعض
( يا جامد انت يا ماذا أكتب )
بس اخترت شوية رباعيات عشان ما حدا يزهق مني

وان شاء الله برفع ملف الوورد بكل ما عندي من رباعيات لعمنا صلاح جاهين
لمن أراد أن يحمله ويقرأه


وبلا ما أطول عليكم وأطفشكم بفلسفتي
!! و عجبي

من تعليقالت المرسل
.
._________________________________________________ _____________________
.
مختارات من رباعيات صلاح جاهين




يا عندليب ماتخافش من غنوتك
قول شكوتك و احكي عن بلوتك
الغنوة مش هتموتك إنما
كتم الغنا هو اللي هيموتك
!! عجبي
.
.

يا للي بتبحث عن إله تعبده
بحث الغريق عن أي شيء ينجده
الله جميل و عليم و رحمن رحيم
إحمل صفاته ... و انت راح توجده
!! عجبي
.
.

غمض عينيك و امشي بخفة و دلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك ... تقع
!! عجبي
.
.

يا للي انت بيتك قش مفروش بريش
تقوى عليه الريح ... يصبح مفيش
عجبي عليك حواليك مخالب كبار
و ما لكش غير منقار و قادر تعيش
!! عجبي
.
.

يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
!! عجبي
.
.

إقلع غماك يا تور و ارفض تلف
إكسر تروس الساقية و اشتم و تف
قال: بس خطوة كمان ... و خطوة كمان
يا أوصل نهاية السكة يا البير يجف
!! عجبي
.
.

أنا كل يوم أسمع ... فلان عذبوه
أسرح في بغداد و الجزاير و أتوه
ما اعجبش م اللي يطيق بجسمه العذاب
و أعجب م اللي يطيق يعذب أخوه
!! عجبي
.
.

الدنيا أوده كبيرة للانتظار
فيها ابن آدم زيّه زي الحمار
الهم واحد ... والملل مشترك
ومفيش حمار بيحاول الانتحار
!! عجبي
.
.

انشد يا قلبي غنوتك للجمال
وارقص في صدري من اليمين للشمال
ماهوش بعيد تفضل لبكره سعيد
ده كل يوم فيه ألف ألف احتمال
!! عجبي
.
.

إيديا في جيوبي وقلبي طِرب
سارح في غربة بس مش مِغترِب
وحدي لكن وَنسان وماشي كده
بابتعد ... ما اعرفش ... أو باقترِب
!! عجبي
.
.

فتحت شباكي لشمس الصباح
ما دخلش منه غير عويل الرياح
وفتحت قلبي عشان أبوح بالألم
ما خرجش منه غير محبة وسماح
!! عجبي
.
.

خرج ابن آدم من العدم قلت ياه
رجع ابن آدم للعدم قلت ياه
تراب بيحيا ... وحي بيصير تراب
الأصل هو الموت و لا الحياه ؟
!! عجبي
.
.

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت ياللعجب
لاتنين ريحتهم لها نفس العفن
!! عجبي
.
.

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس ولكن قلبي مليان كلام
!! عجبي
.
.

علي رجلي دم .. نظرت له ما احتملت
علي إيدي دم .. سألت ليه ؟ لما وصلت
علي كتفي دم .. و حتي علي رأسي دم
أنا كلي دم .. قتلت ؟ ولا اتقتلت
!! عجبي
.
.

يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
!! عجبي
.
.

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب وجرحي لهيب
ودواك فرغ مني .... و إيه العمل
!! عجبي
.
.

في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
!! عجبي
.
.

الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه ياهوه
اللي يقولوه بيرجعوا يكدبوه
!! عجبي
.
.

علي بعد مليون ميل من أرضنا
من الفراغ الكوني بصيت أنا
لا شفت فرق بين جبال وبحور
و لا شفت فرق ما بين عذاب أو هنا
!! عجبي
.
.

إنسان أيا إنسان ما أجهلك
ما أتفهك في الكون و ما أضألك
شمس وقمر وسدوم وملايين نجوم
و فاكرها ياموهوم مخلوقه لك
!! عجبي
.
.

سرداب في مستشفي الولاده طويل
صرخات عذاب ورا كل باب وعويل
وفي الطــريق متزوقين البنات
متزوقــين للحب و المواويل
!! عجبي
.
.

نسمة ربيع لكن بتكوي الوشـوش
طيور جميلة بس من غير عشـوش
قلوب بتخفق إنما وحــدها
هي الحياه كده .. كلها في الفاشوش
!! عجبي
.
.

يا طير يا عالي في الســما طظ فيك
ما تفتكرشي ربنا مصطــفيك
برضــك بتاكل دود وللطين تعود
تمــص فيه ياحلو .. و مص فيك
!! عجبي
.
.

أنا كنت شئ و صبحت شئ ثم شــئ
شوف ربنا .. قادرعلي كل شئ
هز الشجر شواشيه ووشوشني قال
لابد ما يموت شئ عشان يحيا شئ
!! عجبي
.
.

تسلم يا غصن الخوخ يا عود الحطــب
بييجي الربيع .. تطلــع زهورك عجب
و انا ليه بيمضــي ربيع وييجي ربيع
و لسه برضك قلـــبي حتة خشب
!! عجبي
.
.

دي مذكّرات و كتبتها من سـنين
في نوتة زرقا لون بحور الحنيــن
عترت فيها .. رميتها في المهمــلات
وقلت صحيح أما صحيح كلام مخبولين
!! عجبي
.
.

الدنيا من غير الربيع مــيته
ورقة شجر ضعفـانه و مـفــتته
لا يا جدع غلطان تأمل وشوف
زهر الشتا طالع فــي عز الشــتا
!! عجبي
.
.

ولدي نصحتك لما صوتي اتنبـــح
ما تخفش من جني و لا من شبـــح
و ان هب فيك عفريت قتيل إسألـــه
ما دافعش ليه عن نفسه يوم ما اندبح
!! عجبي
.
.

ولدي إليك بدل البالون ميت بالــون
انفخ وطرقع فيه علي كل لـــون
عساك تشوف بعينك مصيرالرجـــال
المنفوخين في السترة و البنطلــون
!! عجبي
.
.

أنا اللي بالأمر المحال اغتــوي
شفت القمر نطيت لفوق في الهـــــوا
طلته ما طلتوش إيه انا يهمنــــي
و ليه .. ما دام بالنشوة قلبي ارتوي
!! عجبي
.
.

لا تجبر الانسان و لا تخــــيره
يكفيه ما فيه من عقل بيحيـره
اللي النهارده بيطلبه و يشتهـيه
هو اللي بكره ح يشتهي يغيـــره
!! عجبي
.
.

إيه اللي خدته من مرور السنــين
يا قلبي الا دمعتك و النيــــين
بتئن و ترجع و بتفرح و ترجع تحــن
مع إن مش كل البشـــــر فرحانين
!! عجبي
.
.

اوقات أفوق و يحل عني غبــايا
واشعر كأني فهمت كل الخبايـا
و افتح شفايفي علشـان اقول الدرر
ما أقولش غير حبة غزل في الصبايـا
!! عجبي
.
.

لولا اختلاف الرأي يا محـترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
!! عجبي
.
.

يا وردة قلبي معاكي في الريح لعب
لا تعبتي م الريح و لا قلبي تعــب
احنا كده : نرتاح في صخب الجنون
و في السكون بنخاف قوي و نترعب
!! عجبي
.
.

يا خالق الكون بالحساب و الجبر
و خالقني ماشي باختيار و الجبر
كل اللي حيلتي زمزمية أمــل
وازاي تكفيني لباب القــبر؟
!! عجبي
.
.

وسط الحطام اتفرجوا يا أنــام
تمثال ملك .. و مبولة م الرخـام
لتنين نحَتهم نفس أسطي الحجـر
و كانوا ذات يوم كتلتين لسه خــام
!! عجبي
.
.

عيد و العيال اتنططوا ع القبــور
لعبوا استغمايه .. و لعبوا بابـور
و باللونات و نايلونات شفتشــي
و الحزن ح يروح فين جنب السرور
!! عجبي؟

__________________________________________________ ________________


أهداء من زميل

ابراهيم الشدي
.------------------------------------------------