المساعد الشخصي الرقمي

مشاهدة النسخة كاملة : مها والحب


أعــــدام
07-24-2005, 05:11 AM
الام : مهاااااااااااااااااااوي يا مهااااااااااااااااااوي وينها فيه ذا البنت
مها : نعم خير........ وش تبين ... بسرعه فكيني وراي لعب دوري بيجي بعد شوي

الام: اعقلي شوي ما وراك الا ذا الكوره اقول روحي صلحي شعرك وحطي لك شوي مكياج بيجون حريم بعد شوي يسلمون على جدتك وابغاك تسلمين عليهم

مها : ليش ؟

الام: خلي الناس تشوفك ودي الناس تصدق ان عندي بنات ما عمرهم شافوك

مها : اقول جد ما عندك سالفه اروح اكمل لعب ليكون مشو دوري بس

الام: الله يهداك

الخاله : بنتك ما بتوب من ذا العربجه

الام : ما ظنتي

فواز : الا اقول خالتي وش رايك نشرك مهاوي معنا في الفريق

الام : يا خف دمك هي بس فترة المراهقه كذا بعدها بتشوف كيف راح تصير بنتي احلى من كل البنات

فواز : خالتي انتي لسه عندك امل انها بنت ذي واحد من الربع كلمه منها تمشي بلد

الام : فواز بتسكت ولا كيف

(تدخل مها بعد ما سمعت الكلام الي بين امها وفواز )

مها : كاني سمعت احد يحش فيني ؟؟؟؟؟؟؟ يلا قولو مين ؟؟؟؟ فيكم خير قولو .؟ وش فيني انا هاه وش فيني انطق يا دلوع امك

فواز: ما فيك شيء تاخذين العقل

مها : تتطنز انت ووجهك اقول تلايص لا اخرب تقاطيع وجهك

فواز : والله حرام تكونين بنت


( بعد كم يوم مها واختها ريم وبنت خالتهم مشاعل قاعدين يسولفون )

مشاعل : اليوم شفت واحد بالسوبر ماركت ياخذ العقل مملوووووووووووح

ريم : مشاعل انتي كل الناس عندك تاخذ العقل انا ما يعجبني اي احد

مها : تصدقون سوالفكم تطفش ما عندك غير ذاك مملوح وذاك طيب وحبوب وذاك وذاك احكو بشي يحمس كورة مصارعه افلام حومتو كبدي

مشاعل : بعد ما ودك نقوم نلعب بلوت حشا وشو قالولك عيال بنات وقاعدين يسولفون وشو تبينهم يحكون بشي غير كذا

ريم : ايه والله مشاعل قوليلها طفشتني ما تحكي بشيء يونس ما عندها غير الكورة

مشاعل : من عذرها قاعده محد مصدق انها كبرت كل الناس تحسبك ولد من ذا الحركات

مها : وش قصدك اني عربجيه مثلا ؟

مشاعل: لا ابد حشا انتي عربجيه ابد محد قال كذا اصلا من يقول انتي مو عربجيه انتي رجال

مها : تستهبلييييييييييييييييييين

مشاعل : اتحداك يوم واحد تفكين شعرك تلبسين تنورة تحطين مكياج وتحكين بشويش

ريم : ايه وبعد لما تقعدين تحطين رجل على رجل مو تطقين ربوعه فوق الكنب

مها : تتحدوني يعني ؟

ريم : ما اظنك قد ذا التحدي ابد

مها: تشوفون بكره

( صباح الجمعه الغدا في بيت جدهم تدخل مها وامها وريم مها لا بسه تنورة فاكه شعرها ومستشورته ورافعته بنظاره حاطه مكياج ولابسه كعب )

مشاعل : ماااااااااااااااااااا اصدق احد يقبصني

ريم : اسكتي انا ما عرفت شكلها اول ما شفتها

فواز : مين هاذي ؟

مشاعل: ذي مها يا ذكي

مها ترد بدلع : وش فيكم ....... وش صاير

فواز : مها وشو في صوتك ؟؟؟؟؟؟؟؟؟ شلتي احبالك الصوتيه

مها : هاهاهاهاه حلوه هاهاهاهاه

فواز: غريببببببببه تردين بضحك ؟؟؟ العاده كفوف

مشاعل : انا قلت احد يقبصني

ريم : ترا والله ما احسها اختي

الام : عسا دوم يا رب لا تنظلون بنتي

( بعد شهر على ذا الحال شعر ومكياج و رقه )

مها : اقول ريم ترا طفشت انا من ذا الوضع احس اني ماصله

ريم : تبين الصدق شكلك كذا احسن حتى الحريم قامو يحكون عنك

مها : وشو يحكون عني ما عاش من يحش فيني قولي لي من هي بنته وانا اخرب خشتها

ريم : وشو وش فيك محد حش فيك اقول يحكون عنك يعني يبون يخطبونك يعني يقولون انك حلوه

مها : يللللللللللللللللللللللللعن والله اني منيب سهله

ريم : اقولك شيء بس قولي والله ما تعصبين وتسوين مصيبه

مها: والله ما اسوي شيء بس قولي

ريم : فواز قال لمشاعل انه يبي يخطبك

مها : ايش هههههههههههههههههههههههههههههه فواز ههههههههههههههههههههههههههههههه مب صاحي صدق اللعبه ههههههههههههههههههههههههههههههههههههههههههههههههه

ريم : اي لعبه

مها : شكلي لعبه مو انا احس اني في مسرحيه

ريم : استهبل معك انا اقولك من جده الولد

مها : يعني كيف

ريم : يعني يحبك

مها : حبته الدود والعقارب السود قولي آمين

ريم :اقولك يحبك تقومين تدعين عليه هذا بدل ما تقولين يا حليله

مها : وش يحليله يعني وشو تبين اقوم اناقز فوق السرير واقول يحبني هييييييييييه يحبني هييييييييييه

ريم : انا ما قلت كذا انا بس اقول فكري في الموضوع بجديه شوي يعني هذا الشيء غرزيه فيك يعني مفروض تميلين لاي احد يعجبك احد تحبين احد

مها : يعني اذا رقمني احد اكلمه

ريم : مها استهبل معك انا اقولك تحبين ما قلت لك صيعي يعني حبيه شعور داخلك لا تسوين شيء غبي

مها : انا احب منتب صاحيه ما حبيتك انتي وامي عشان احب واحد هههههههههههههههههههههههههههه امزح ترا والله احبكم

ريم : انا احكي معك جد ما امزح متى بتتغيرين؟ يعني انتي الحين بثالث ثانوي ولا راسبه سنتين ولسه حركات ذا العربجه

مها : تتشمتين فيني عشاني راسبه لي كم سنه عادي اصلا الرسوب دليل المثابره فيني وحده غيري يأست وتركت الدراسه

ريم : انا بس اقولك فكري بالموضوع وانتي بكيفك

( بعد كم يوم في بيت الجد مها قاعده منسدحه تتفرج على التلفزيون)

فواز : احم

مها وهي تعدل جلستها : ادخل وش فيك مستحي ؟

فواز : لا بس اكح

مها : سلامتك من الكحه

فواز: الله يسلمك......... هاه كيف الدراسه معاك ماشيه ابيك تنجحين عاد ذي السنه

مها : ايه وش عليك قول كذا انا الي باختبر ولا انت

فواز : لا بس ودي تنجحين هاذي السنه يعني وضعك مو عاجبني

مها : ليش انت امي وانا ما ادري

فواز : لا مو لازم اكون امك عشان اهتم تهمني دراستك لانك انتي اتهميني

مها : انا اهمك ايه صح مو انا بنت خالتك

فواز : لا مو عشان كذا مها ليش انتي مو حاسه فيني؟؟

مها : كيف مو حاسه فيك هاذا انا احاكيك انت بالغرفه وتتكلم كيف ما احس لو انك ساكت كان قلت مو حاسه فيك

فواز : هذا طبعك ما راح تغيرينه اللف والدوران والاستهبال شكلي انا انفخ بقربه مقطوعه

مها :وش فيك زعلت دلوعة ماما؟

فواز : الله يصلحك استاذن

مها :دلوعة ماما تعال وش فيك نمزح

( في نفس اليوم بالليل قالت مها لريم الي صار مع فواز )

ريم : غبيه انتي غبيه .؟

مها : ليش وشو سويت ؟

ريم : حرام عليك يقولك مو حاسه فيني قصده مو حاسه بحبي

مها : انا داريه ان قصده كذا بس وشو تبين اقوله وانا بعد احبك استحيت وشو ارد عليه قمت استهبل

ريم : والله حرام عليك حطمتيه من جد اتحدا الحين ان كان حتى يفكر انه يحبك حرام عليك من جد قطيتيه على صخر احسه كرهك من قلب قال هاذي عربجيه وبتبقى عربجيه ولا حتى تفكر فيني ولا تحبني

مها (ترد وهي تصيح ): حرام عليك لا تقولين لي كذا انا ما كان قصدي اسوي فيه كذا

ريم : مها تصيح الله واكبر وانا وشو سويت لك اول مره اشوفك تصيحين وشو فيك

مها:وشو انا انسان ما اصيح زي باقي الناس

ريم : اسفه بس وشو فيك

مها : انا احببببببببببه ما تفهمين انا احبه

( بعد الي صار في بيت جد مها قاعده بالحديقه لوحدها يمر فواز بيطلع من البيت )

مها : فواز

فواز : هلا مها معليش مستعجل

مها: بس ابغاك شيء ضروري

فواز : آمري وش فيك في مشكله شيء خوفتيني وشو فيه

مها : لا ولا شيء بس كنت ابغا اسالك زعلت مني ذاك اليوم ؟

فواز : اي يوم؟

مها: يوم قعدنا نحكي وانت زعلت ورحت

فواز يرد وهو معصب : ما اذكر يوم زي كذا وعن اذنك انا مستعجل

مها : اقعد الا انت تذكر يوم قعدت تقول اني مو حاسه فيك انا كنت ابغى اقول.......

فواز : وشو بتقولين ؟

مها :كنت ابغى اقول ...... تراني حاسه فيك وترا العكس انت الي مو حاس فيني

فواز : ههههههههههههههههههههههههههههههههههههههههههههههههه وحارقه اعصابي ليه ؟

مها ووجها محمر : لا تضحك ما يضحك فشلتني

فواز :هههههههههههههههههههههههههههههههههههههههههه وجهك احمر اقول متى تبين الخطبه اليوم بكرا السبت ولا العرس وشو خطبه بسرعه حددي قرري؟

مها : وشو عرس وشو اقرر قول لامي بعدين يصير خير اخاف تطلع مو من مستوانا

فواز : اقول رجعنا للهبال بس اعقلي شوي

( مرت ثلاث شهور وصارو مخطوبين لبعض فواز دق على مها )

فواز : الو مهاوي عمري

مها : اهلين كيفك ؟

فواز : بخير دامي اسمع صوتك اقول مهاوي عندي لك شيء بيخليك تنبسطين اعرفك تحبين ذا الاشياء اليوم بنطلع الثمامه نفحط انا والربع

مها : وانت معاهم ؟

فواز : لا اخذك ونروح نتفرج

مها : الله وناسه متى بتجي ؟

فواز : نص ساعه وانا عندك

( بعد ما راحو وهم يتفرجون )

فواز : هاه كيف مبسوطه ؟

مها : وناااسه ربعك ذولي خطيرين الي يشوفهم ما يصدق ان صديقهم

فواز: يا سلام على بالك ان هم احسن مني الحين اوريك

( ينزل فواز من السيارة ويركب سيارة واحد من اخوياه ويركبها ويبدا يسوي زي حركات ربعه وفجاأ÷ وهو يسوق انفقع الكفر وتنقلب فيه السيارة اكثر من ثلاث قلبات ويتجمعون كل ربعه حوله وتنزل مها من السيارة الي موقفه بعيد عن المكان الي قاعدين فيه الشباب وتركض لين ما توصل المكان اللي هم فيه بس لما وصلت )

واحد من ربعه يقول للثاني : لا حول ولا قوة الا بالله انا لله وانا اليه راجعون

مها وهي تصرخ : لا مو معقول مو معقول انا السبب لا انا السبب مستحيل ما يصير

يرد عليها واحد من اصدقاءه : اخر كلمه كان يقولها مها لا تخافين انا بخير مين مها هاذي؟

( مها لما سمعت هذا الكلام طاحت واغمي عليها)

( بعد ثلاثة ايام ومها في غيبوبه فتحت عينها وتشوف امها وريم قدامها )

مها وهي تصرخ : وين فواز فواز وينه وشو صار

الام تبكي : اهدي يا بنتي هذا قضاء الله وقدره ذاك كان يومه

مها : لا لا ما يصير لا ما يقدر يموت لالا كان قدامي انا الي خلتيه يروح يركب السيارة مات قدام عيني شفته بعيني الحادث الي صار ما يقدر يموت ويخليني لااااااااااااااااااااا

فواز مات قدام مها بحادث كانت هي السبب فيه مها عاشت طول حياتها وهي تحس انها هي السبب في موت فواز

النـــــــهايــة

صمت الجروح
07-24-2005, 06:03 AM
قصه بدايتها سعيده ومضحكه

ولكن كان القدر اسرع منهم

وصار الحزن اقرب لهم

مجهود رائع اعدام

شكرا جزيلا لك

تقبل تحياتي

كاتم الاحساس
07-24-2005, 11:47 AM
شكرا اخوي اعـــــدام على القصة

بس ممكن سؤال ؟؟؟؟؟

فيه بنات زي كذا يعني عرابجة !!!!!!!!!!!