المساعد الشخصي الرقمي

مشاهدة النسخة كاملة : فلسفة عقـّال


abusalman
05-17-2005, 11:30 AM
هذه قصيده اعجبتني للشاعر جميل بن زريع حبيت اني انقلها لكم ....


على رتم العقول اللي تعالج وضعها بهْبال = سرى ليل القلوب اللي تهاوت في مساحاتي

وانا ماعاد لي قلب ٍ ايلا من قال , قال وطال = ولالي غير زفرات القصيد وطيب هقواتي

أتابع فيك مفرود القصايد وافتخر واخْتال = وأحس احيان بحْروق الحروف وحر جمراتي

أنا لو جيت لك مجنون قولي فلسفة عقال = واجـِبْري كسر تنويني معاك ابـْرفع ضمـّاتي

اباغيـّر مفاهيم النحو والصرف والاهمال = وقانون البلاغه والعروض ابـْكل كلماتي

أبا اخلق نون للنـّسوه , وبافتح باب للإحلال = وابدّل جمعكم مفرد وبَارفع كل كسراتي

أبا انصب مبتداك بْكاف وامسح منْه حرف الدال = واحط اللام في وسطه يبيـّن سر مأساتي

ابا الْعن خامس الفاعل , وأغيـّر صيغة الافعال = واحطه في خبر كانَ , واجدّد شكل صفحاتي

ابا الغي سـيـْبويه ابْحرفْ , واصْنع بالنـّقاط اجيال = وبَاشْطب طرْح أبو الأسود مع خالص تحياتي

أبيك انتي اجابة منْ , وعطف الواو , واسم الحال = وابيك الفعل والفاعل , وكل أهداف نظراتي

أبيك انتي قواعد صرف , وحزم الجد واستهبال = وابيك اعْقول تفكيري, وصوت الكذب بسكاتي

أبا اعقد مؤتمر قمه , وبافْرض حظر للتجوال = وبَامـْنع رجة امعمـّر , من الغاء اجتماعاتي

ابادعي قلبي وعقلي , وكل احساس صال وجال = واباجْمع كل احزابي , نقرّر ماهـو آتـي :

بما أنّ الظروف الآن , لاتسمح بأيـّة حال = بأي اجراء روتيني , على سائر دويلاتي

عليه الآن , فلْيـعـْـلـنْ , طوارىء والحمول اثـْقال = ومنـْـك انتي , ايصير اول ظهوري وانتصاراتي

أبي كفْ , وهدبْ عينْ , ونقاوةْ قلب واستبسال= وابيك القائد الاعلى , لكل اجْيوش قواتي

ابي وقفه من اعْيونك تكفـّي عن مية رجـّال = أبي فزعه , وابي نزعه وأغيـّر كل نزعاتي

وانا اخترتك لأن اسمك , يسرّي بي شجون ٍ طال = يشجعني على العليا , واحقّق كل طموحاتي

لانـّك رحمة الكافل , بعين ايتام وام اعـْيال = ولانـّك سطوة القاسي , بعين ادْموع وجناتي

ولانّي كل ماشفتك , عطيت الحمْل والحمّال = أهابك هيبة العالم , لحزني وانفعالاتي

أناظر عينك اليمنى , واشوف الليل والموال = وأناظر عينك اليسرى , أشوف ابشع نهاياتي

واضيع اهناك مابين الرموش وبين حبّة خال = واحب الموت لعيونك , وكنـْه اجمل محطاتي

أنا جيتك ولع عاشق , يدوّر فيك راحة بال = ولا فكرت لو لحظه , بجرحك لو بأبياتي

أنا الدمعه وهي دمعه , اذا طاحت وهي اذلال = أمد الـْها هدب عيني , والحّـفها عباياتي

واخلّي رمش يحظنها , ورمش الْـْها يصير اظلال = حرام اتموت في عيني , وهي رمز لمعاناتي

وبعـد هذا تجين انتي , تسوقين الجروح أشكال ؟ = وأنا اللي كنـْت احِـسـْب انـّك , حلاة الروح في ذاتي

أما تخـْشين أن يهلك , بفعْلك شاعرُ قد آل = بجرحِك للهلاك أمسى , طريح الالتفاتاتي

ألا ويح القلوب اللي , تهد ابصد صم اجبال = والا ويحي اذا بارضى , هواني أو مذلاتي

تراني ساكت ابـْكيفي , واذا شفت المعدّل مال = ابا اغـْسل كل مافيني , من احساسي بزفراتي

وابا حرّم على نفسي , لو اسْتسلمت لبس اعقال = ولو ما الغيت طاريـِّـك , نهائي من سجلاتي

وترى اللي فات ذا كلـّه , مجرد فلسفة عقال = وانا عاقل واموت ابـْرك , ولاترخص قناعاتي


جميل بن زريع

ذكريات
05-17-2005, 09:07 PM
صح السانه وسلمت يداك يابو سلمان صراحه قصيده في قمه الروعه في الاسلوب والمعاني واالأحاسيس يعجز التعبير والكلمات عن وصفها شي خيالي ابدع فيها 0000

مشكور يابو سلمان ولو عندك مثلها لاتحرمنا 000

AL2o0y0u5n
05-18-2005, 01:22 AM
بو سلمان

لا يكون طلعت تكتب شعر وانا مدري



اشكرك جزيل الشكر

ولك تقديري

abusalman
05-18-2005, 07:42 AM
صح بدنك ياذكريات ....

العيون2005 >>>>> ويني ووين كتابة الشعر ...... انا من اللي يسمونهم المتذوقين للشعر خخخخخخ